(តាកែវ)៖ កូនឈើចំនួន ២៥០ដើម ដែលជាអំណោយរបស់លោក ងិន ងិនដា អភិបាលរងខេត្តតាកែវ ត្រូវបានលោក អ៊ុំ ចំរើន អភិបាលស្រុកទ្រាំង នាំយកទៅប្រគល់ជូនរដ្ឋបាលឃុំជីខ្នា កាលពីព្រឹកថ្ងៃទី២១ ខែកក្កដា ឆ្នាំ២០២៦ ដើម្បីយកទៅដាំបន្តនៅលើខ្នងប្រឡាយក្នុងភូមិយុលចេក ឃុំជីខ្នា ស្រុកទ្រាំង ខេត្តតាកែវ។

លោក អ៊ុំ ចំរើន អភិបាលស្រុកទ្រាំង បានចាត់ទុកថា ការដាំកូនឈើតាមបណ្តោយខ្នងប្រឡាយធារាសាស្ត្រនេះ នឹងផ្តល់អត្ថប្រយោជន៍យ៉ាងច្រើនទាំងផ្នែកកសិកម្ម បរិស្ថាន និងសេដ្ឋកិច្ច។ លើសពីនេះ វាក៏អាចប្រែក្លាយ តំបន់នេះឲ្យក្លាយជាតំបន់ទេសចរណ៍ដ៏ទាក់ទាញ សម្រាប់ភ្ញៀវជាតិ និងអន្តរជាតិ មកលេងកម្សាន្ត ស្រូបយកខ្យល់អាកាសដ៏បរិសុទ្ធ និងចូលរួមក្នុងពិធីបុណ្យជាតិផ្សេងៗផងដែរ។

អភិបាលស្រុកទ្រាំង ក៏បានអំពាវនាវអាជ្ញាធរមូលដ្ឋាន និងបងប្អូនប្រជាពលរដ្ឋទាំងអស់ ឲ្យចូលរួមដាំ និងថែរក្សាដើមឈើដែលបានដាំនៅពេលនេះ ព្រោះការដាំ និងថែរក្សាព្រៃឈើ គឺជាកាតព្វកិច្ចរបស់ប្រជាពលរដ្ឋគ្រប់រូប។ ដើមឈើដែលដាំនៅតាមប្រឡាយដើរតួនាទីយ៉ាងសំខាន់ក្នុងការទប់ស្កាត់ការបាក់ស្រុតដី ការពារច្រាំងប្រឡាយ កាត់បន្ថយការហួតទឹក និងផ្តល់ម្លប់ដ៏ត្រជាក់ដល់ប្រជាពលរដ្ឋ។ សកម្មភាពនេះបង្ហាញពីការប្តេជ្ញាចិត្តរបស់អាជ្ញាធរក្នុងការលើកកម្ពស់បរិស្ថាន និងជីវភាពរស់នៅរបស់ប្រជាពលរដ្ឋក្នុងមូលដ្ឋាន៕