(បន្ទាយមានជ័យ)៖ លោក ស្រី វុឌ្ឍី អនុរដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ និងជាប្រធានក្រុមការងារអនុវត្តគម្រោង EMPOWER ប្រចាំក្រុងសិរីសោភ័ណ នៅថ្ងៃទី២០ ខែកក្កដា ឆ្នាំ២០២៦ បានដឹកនាំក្រុមការងារអនុវត្តគម្រោងលើកកម្ពស់ជីវភាពប្រកបដោយប្រសិទ្ធភាពសេដ្ឋកិច្ច ដើម្បីកាត់បន្ថយភាពងាយរងគ្រោះ និងពង្រឹងភាពធន់ (EMPOWER) ថ្នាក់ខេត្ត រួមជាមួយមន្ត្រីកសិកម្មឃុំ-សង្កាត់ បើកកិច្ចប្រជុំពិនិត្យវឌ្ឍនភាពការងារ ពិភាក្សាដោះស្រាយបញ្ហាប្រឈម និងពន្លឿនការផ្សព្វផ្សាយព័ត៌មានគម្រោង តាមរយៈការចែកខិតប័ណ្ណដល់ប្រជាពលរដ្ឋ។

បន្ទាប់ពីកិច្ចប្រជុំ លោក ស្រី វុឌ្ឍី និងក្រុមការងារ បានចុះជួបប្រជាពលរដ្ឋដោយផ្ទាល់នៅសង្កាត់កំពង់ស្វាយ ក្រុងសិរីសោភ័ណ ដើម្បីពិនិត្យស្ថានភាពជាក់ស្តែង និងធានាថាប្រជាពលរដ្ឋដែលមានប័ណ្ណសមធម៌ក្នុងសង្កាត់គោលដៅទាំង៣ ទទួលបានព័ត៌មានអំពីគម្រោងយ៉ាងគ្រប់ជ្រុងជ្រោយ។

ជាមួយគ្នានោះ ក្រុមការងារក៏បានកំណត់ទីតាំងគោលដៅសម្រាប់បង្កើត សហគមន៍កសិកម្មទំនើប ដើម្បីរៀបចំចងក្រងសមាជិក និងជំរុញការអភិវឌ្ឍផលិតកម្មកសិកម្មប្រកបដោយប្រសិទ្ធភាព បង្កើនប្រាក់ចំណូល និងលើកកម្ពស់ជីវភាពប្រជាពលរដ្ឋឱ្យកាន់តែប្រសើរឡើង។

ទន្ទឹមនឹងនោះ លោក ស្រី វុឌ្ឍី ក៏បានបន្តការដឹកនាំកិច្ចប្រជុំជាមួយមន្រ្តីអនុវត្តគម្រោងថ្នាក់ខេត្ត ដោយមានការចូលរួមពីតំណាងរដ្ឋបាលក្រុងសិរីសោភ័ណ និងតំណាងលោកចៅសង្កាត់គោលដៅទាំង៣។

លោក ក៏បានស្នើសុំកិច្ចសហការយ៉ាងជិតស្និទ្ធពីអាជ្ញាធរមូលដ្ឋាន ជាពិសេសរដ្ឋបាលសង្កាត់ និងភូមិក្នុងសង្កាត់គោលដៅទាំង៣ ឱ្យបន្តជួយជំរុញការផ្សព្វផ្សាយព័ត៌មានអំពីគម្រោង ដើម្បីធានាថាប្រជាពលរដ្ឋដែលមានសិទ្ធិទទួលផលទាំងអស់ ទទួលបានព័ត៌មានគ្រប់គ្នា និងអាចចូលរួមទទួលអត្ថប្រយោជន៍ពីគម្រោង ស្របតាមគោលបំណង និងគោលនយោបាយរបស់គម្រោង EMPOWER៕