(តាកែវ)៖ លោក វ៉ី សំណាង អភិបាលខេត្តតាកែវ បានលើកឡើងពីភាពវៃឆ្លាត និងសមត្ថភាពរបស់កូនខ្មែរពីមួយជំនាន់ទៅមួយជំនាន់ថា កាន់តែមានការរីកចម្រើនគួរឲ្យកត់សម្គាល់។ លោកបានសង្កត់ធ្ងន់ថា ខួរក្បាលរបស់កូនខ្មែរពិតជាមិនចាញ់ខួរក្បាលរបស់កូនបរទេសនោះទេ ជាពិសេសគឺមិនចាញ់បណ្តាប្រទេសជិតខាងឡើយ។

ការលើកឡើងនេះធ្វើឡើងក្នុងឱកាសលោកអញ្ជើញជាអធិបតីបើកកម្មវិធីសិក្ខាសាលាស្តីពី «ការពង្រឹងប្រតិបត្តិការសម្រាប់មជ្ឈមណ្ឌលបច្ចេកវិទ្យាសហគមន៍» កាលពីថ្ងៃទី២១ ខែកក្កដា ឆ្នាំ២០២៦ នៅសាលាខេត្តតាកែវ។

អភិបាលខេត្តបានបន្តថា ការរីកចម្រើនរបស់ប្រទេសជាតិបច្ចុប្បន្ន បានធ្វើឲ្យស្ថានភាពជីវភាពរស់នៅរបស់ប្រជាពលរដ្ឋមានភាពល្អប្រសើរ ដែលនាំឲ្យការចិញ្ចឹមបីបាច់កូនចៅមានរបបអាហារគ្រប់គ្រាន់ ជួយដល់ការ លូតលាស់ផ្នែករាងកាយ និងប្រាជ្ញាស្មារតីកាន់តែល្អប្រសើរ។ ជាមួយគ្នានេះ យុវជនខ្មែរយើងក៏ទទួលបានការអប់រំយ៉ាងទូលំទូលាយ ដែលធ្វើឲ្យពួកគេមានសមត្ថភាពខ្លាំងក្លា និងអាចប្រកួតប្រជែងជាមួយកូន បរទេសបានយ៉ាងពេញលេញ។

លោក វ៉ី សំណាង បានលើកជាឧទាហរណ៍ជាក់ស្តែងអំពីសមត្ថភាពរបស់កូនខ្មែរ តាមរយៈការបង្កើតប្រព័ន្ធទូទាត់ប្រាក់ «App Bakong បាគង» ដែលជាប្រព័ន្ធទូទាត់ប្រាក់បែបទំនើបថ្មីមួយរបស់កម្ពុជា។ ប្រព័ន្ធបាគងនេះមិនត្រឹមតែបានចូលរួមចំណែកយ៉ាងសំខាន់ក្នុងការលើកកម្ពស់វិស័យហិរញ្ញវត្ថុប៉ុណ្ណោះទេ ថែមទាំងបានលើកមុខមាត់កម្ពុជាលើឆាកអន្តរជាតិទៀតផង ដោយមានប្រទេសមួយចំនួន បានបង្ហាញចំណាប់អារម្មណ៍ចង់ទិញយកប្រព័ន្ធនេះទៅប្រើប្រាស់ក្នុងប្រទេសរបស់ខ្លួនទៀតផង។ នេះជាភស្តុតាងបញ្ជាក់យ៉ាងច្បាស់ពីសក្តានុពល និងភាពវៃឆ្លាតរបស់កូនខ្មែរក្នុងការបង្កើតថ្មី និងរួមចំណែកដល់ការអភិវឌ្ឍជាតិ៕