(កណ្តាល)៖ យុវតីម្នាក់បានរងរបួសធ្ងន់ធ្ងរដោយសារកណ្ដៀវជាប់ខ្នង ខណៈកំពុងជិះម៉ូតូជាមួយមិត្តភក្ដិ ក្រោយពីជនសង្ស័យម្នាក់បានគប់កណ្ដៀវដោយស្មានច្រឡំថាជាក្រុមយុវជនដែលបានជេរប្រមាថម្ដាយរបស់ខ្លួន។

ហេតុការណ៍នេះបានកើតឡើងកាលពីថ្ងៃទី១៨ ខែកក្កដា ឆ្នាំ២០២៦ វេលាម៉ោង ២២៖២០នាទី នៅចំណុចផ្លូវលំជិតវត្តខន្តី ស្ថិតក្នុងភូមិវាលត្រែង ឃុំតាលន់ ស្រុកស្អាង ខេត្តកណ្តាល។

យោងតាមរបាយការណ៍របស់សមត្ថកិច្ចបានឱ្យដឹងថា ជនរងគ្រោះមានឈ្មោះ វ៉ាន់ ចាន់សល់ អាយុ២១ឆ្នាំ បានរងរបួសធ្ងន់ធ្ងរដោយសារកណ្ដៀវជាប់ខ្នង ខណៈដែលឈ្មោះ រស់ រិទ្ធី អាយុ២០ឆ្នាំ ជាអ្នកឌុប។ ក្រោយកើតហេតុភ្លាមៗ សមត្ថកិច្ចជំនាញខេត្ត សហការជាមួយកម្លាំងស្រុកស្អាង និងកម្លាំងប៉ុស្តិ៍តាលន់ បានបើកប្រតិបត្តិការស្រាវជ្រាវយ៉ាងយកចិត្តទុកដាក់។

លទ្ធផលនៃការស្រាវជ្រាវ បានឈានដល់ការឃាត់ខ្លួនជនសង្ស័យម្នាក់ឈ្មោះ ថុល កន អាយុ២៩ឆ្នាំ នៅថ្ងៃទី២០ ខែកក្កដា ឆ្នាំ២០២៦។ ជនសង្ស័យរូបនេះត្រូវបានរកឃើញថាមានវិជ្ជមានសារធាតុញៀន និងបានសារភាពថា ខ្លួនពិតជាបានយកកណ្ដៀវគប់ទៅលើជនរងគ្រោះដោយស្មានច្រឡំមែន។ ចំណែកជនសង្ស័យម្នាក់ទៀតឈ្មោះ វ៉ាន្នី ស៊ី ភេទប្រុស អាយុ២៦ឆ្នាំ បានរត់គេចខ្លួនបាត់។

បច្ចុប្បន្ន ជនសង្ស័យឈ្មោះ ថុល កន ត្រូវបានឃាត់ខ្លួននៅអធិការដ្ឋាននគរបាលស្រុកស្អាង ដើម្បីកសាងសំណុំរឿងចាត់ការតាមនីតិវិធីច្បាប់។ សមត្ថកិច្ចកំពុងបន្តស្វែងរកចាប់ខ្លួនជនសង្ស័យដែលរត់គេចខ្លួន ដើម្បីយកមកផ្ដន្ទាទោសតាមច្បាប់។ ករណីនេះជាការដាស់តឿនដល់យុវជនទាំងអស់ឱ្យចៀសវាងអំពើហិង្សា និងការប្រើប្រាស់គ្រឿងញៀន ដែលអាចនាំឱ្យមានផលវិបាកធ្ងន់ធ្ងរដល់ខ្លួនឯង និងអ្នកដទៃ៕