(កណ្ដាល)៖ អ្នកភូមិជាច្រើននាក់នៅនៅទីប្រជុំជនស្រុកខ្សាច់កណ្ដាល បានស្នើថ្នាក់ដឹកនាំខេត្តកណ្ដាល ជួយសម្រួលបញ្ហាទីលានចាក់សម្រាមជាង ៦ហិកតារបស់ក្រុមហ៊ុន «ស៊ិនទ្រី» ដែលតែងតែដុតបំផ្លាញសម្រាមរបស់ខ្លួន បង្កើតជាផ្សែងខ្មួលខ្មាញ់បំពុលផ្លូវដង្ហើម បំពុលបរិយាកាស បំពុលបរិស្ថាន ប៉ះពាល់សុខភាពពលរដ្ឋជាច្រើននាក់ រហូតខ្លះធ្លាក់ខ្លួនមានជំងឺទាំងចាស់ទាំងក្មេង នាំឲ្យខកខានសិក្សារៀនសូត្រ ព្រួយបារម្ភពីចំណេះដឹងរបស់ សិស្សសាលា ដោយសារឧស្សាហ៍ឈឺមិនបានទៅរៀនសូត្រ។

ភ្នាក់ងារព័ត៌មាន Fresh News បានចុះផ្ទាល់ដល់ទីតាំង និងបានសម្ភាសន៍ពលរដ្ឋផ្ទាល់ ដោយពួកគាត់បានបង្ហាញពីភ្លើង និងផ្សែងឆេះកាន់តែខ្លាំងឡើងនៅទីលានចាក់សម្រាមរបស់ក្រុមហ៊ុន «ស៊ិនទ្រី» ដែលមានទីតាំងស្ថិត នៅឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល។

ដោយឡែកពលរដ្ឋទទូចសុំអង្វរថ្នាក់លើមេត្តាចុះជួយសង្រ្គោះបន្ទាន់។ សេចក្ដីរាយការណ៍ពីពលរដ្ឋបានអះអាងថា ពួកគាត់ថតបានពិតៗ ជាក់ស្ដែង តែមិនហ៊ានទៅប៉ះពាល់អ្នកដុតទេ ខ្លាចមានបញ្ហាកើតឡើង។

ពាក់ព័ន្ធនឹងបញ្ហានេះលោក ចេង ឌីណា អភិបាលស្រុកខ្សាច់កណ្ដាល ធ្លាប់ឲ្យដឹងថា អ្នកដុតសម្រាមគឺអ្នកកាយសម្រាម ហើយពួកគាត់ត្រូវបានអប់រំច្រើនលើកមកហើយ។ រីឯអាជ្ញាធរតែងតែចេញរថយន្តពន្លត់អគ្គិភ័យ ទៅពន្លត់ជារឿយៗផងដែរ៕