(ឧត្តរមានជ័យ)៖ លោក ឃិន ញ៉ាណ អនុប្រធានអចិន្ត្រៃយ៍គណៈកម្មាធិការសាខាកាកបាទក្រហមកម្ពុជា ខេត្តឧត្តរមានជ័យ តំណាងលោក មាន ចាន់យ៉ាដា ប្រធានគណៈកម្មាធិការសាខា នៅថ្ងៃទី២០ ខែកក្កដា ឆ្នាំ២០២៦ បានដឹកនាំក្រុមការងារនាំយកអំណោយមនុស្សធម៌របស់សាខាកាកបាទក្រហមកម្ពុជាខេត្ត ចុះសួរសុខទុក្ខ និងចែកជូនដល់ប្រជាពលរដ្ឋដែលរងគ្រោះដោយសារខ្យល់កន្ត្រាក់ធ្វើឱ្យខូចខាតផ្ទះសំបែង សរុបចំនួន៣ភូមិ មាន១៦គ្រួសារ ស្ថិតនៅក្នុងសង្កាត់កូនគ្រៀល ក្រុងសំរោង។

នៅក្នុងឱកាសនោះ លោក ឃិន ញ៉ាណ បានថ្លែងពាំនាំនូវការផ្តាំផ្ញើសួរសុខទុក្ខ និងក្តីនឹករលឹកពីសំណាក់ថ្នាក់ដឹកនាំកាកបាទក្រហមកម្ពុជា ព្រមទាំងបានសម្តែងការសោកស្តាយចំពោះការខូចខាតផ្ទះសម្បែង និងទ្រព្យសម្បត្តិរបស់ប្រជាពលរដ្ឋ ដែលបណ្តាលមកពីគ្រោះធម្មជាតិខ្យល់កន្ត្រាក់។

លោកបានថ្លែងលើកឡើងថា កាកបាទក្រហមកម្ពុជា តែងតែប្រកាន់ខ្ជាប់នូវគោលការណ៍មនុស្សធម៌ «ទីណាមានទុក្ខលំបាក ទីនោះមានកាកបាទក្រហមកម្ពុជា» ដោយតែងតែចុះជួយសង្គ្រោះ និងផ្តល់ការគាំទ្រដល់ ប្រជាពលរដ្ឋដែលជួបការលំបាក ឬរងគ្រោះដោយគ្រោះមហន្តរាយផ្សេងៗ ដោយមិនប្រកាន់និន្នាការនយោបាយ សាសនា ឬជាតិសាសន៍ឡើយ។

ជាមួយគ្នានេះ លោកក៏បានថ្លែងអំពាវនាវឱ្យបងប្អូនប្រជាពលរដ្ឋបន្តយកចិត្តទុកដាក់ប្រុងប្រយ័ត្នខ្ពស់ ចំពោះបាតុភូតធម្មជាតិ ជាពិសេសខ្យល់កន្ត្រាក់ និងភ្លៀងធ្លាក់ខ្លាំង ដែលអាចកើតមានក្នុងរដូវវស្សា ដោយត្រូវតាមដានព័ត៌មានព្យាករណ៍អាកាសធាតុ និងអនុវត្តតាមការណែនាំរបស់អាជ្ញាធរមានសមត្ថកិច្ច ដើម្បីការពារអាយុជីវិត និងទ្រព្យសម្បត្តិ។

អំណោយមនុស្សធម៌ដែលបានផ្តល់ជូននាពេលនេះ បានរួមចំណែកជួយសម្រាលការលំបាករបស់គ្រួសាររងគ្រោះ និងបង្ហាញពីការយកចិត្តទុកដាក់ និងស្មារតីសាមគ្គីរបស់កាកបាទក្រហមកម្ពុជា ក្នុងការឈរជាមួយប្រជាពលរដ្ឋគ្រប់កាលៈទេសៈ៕