(ភ្នំពេញ)៖ លោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា នៅថ្ងៃទី២១ ខែកក្កដា ឆ្នាំ២០២៦នេះ បានអញ្ជើញចូលរួម ក្នុងពិធីចុះអនុស្សរណៈនៃការយោគយល់គ្នា រវាងនិយ័តករធានារ៉ាប់រងកម្ពុជា និងសាកលវិទ្យាល័យ ពាណិជ្ជសាស្ត្រ អេស៊ីលីដា ឯ.ក។

លោក ប៊ូ ច័ន្ទភីរូ បានលើកឡើងថា ភាពជាដៃគូនេះ បង្កើតឡើងក្នុងគោលបំណង ជំរុញការកសាងធនធានមនុស្ស ដើម្បីអភិវឌ្ឍវិស័យធានារ៉ាប់រង ប្រកបដោយចីរភាព តាមរយៈការបង្កើនសមត្ថភាពយល់ដឹង និស្សិត នៃសាកលវិទ្យាល័យ ពាណិជ្ជសាស្ត្រ អេស៊ីលីដា អំពីការធានារ៉ាប់រង។

បន្ថែមពីនោះទៀត លោក ប៊ូ ច័ន្ទភីរូ បានគូសបញ្ជាក់ថា ភាពជាដៃគូនេះ នឹងអនុញ្ញាតឱ្យនិស្សិត ត្រៀមខ្លួនរួចរាល់ ក្នុងការចាប់យកឱកាសការងារ ក្នុងវិស័យធានារ៉ាប់រង ដែលកំពុងមានសក្តានុពល។

បើតាមអគ្គនាយកនិយ័តករធានារ៉ាប់រងកម្ពុជា, គិតត្រឹមឆ្នាំ២០២៥ ក្រុមហ៊ុនធានារ៉ាប់រង មានវត្តមានសរុបចំនួន៣៩ក្រុមហ៊ុន និងក្រុមហ៊ុនអន្តរការីធានារ៉ាប់រង ចំនួន៦៥ក្រុមហ៊ុន ដែលកំពុងមានប្រតិបត្តិការនៅកម្ពុជា ការណ៍នេះ បានបង្ហាញថា តម្រូវការទីផ្សារការងារ ក្នុងវិស័យធានារ៉ាប់រងនៅកម្ពុជា កំពុងមានការកើនឡើងជាបន្តបន្ទាប់។

លើសពីនេះ ទីផ្សារធានា-រ៉ាប់រង សម្រេចបានបុព្វលាភធានារ៉ាប់រងដុល ប្រមាណ៣៦៧លានដុល្លារអាម៉េរិក ដែលមានកំណើនប្រមាណ២.៨% ធៀបនឹងឆ្នាំ២០២៤។ អត្រាភាគទានធានារ៉ាប់រង ក្នុងសេដ្ឋកិច្ចសម្រេច បាន១.១១% ខណៈដង់ស៊ីតេធានារ៉ាប់រង២០.៩៥ដុល្លារអាម៉េរិក សម្រាប់មនុស្សម្នាក់។

ទោះជាយ៉ាងនេះក្តី បើធៀបទៅនឹងប្រទេសក្នុងតំបន់ និងលើសកលលោក ទំហំទីផ្សារធានារ៉ាប់រងកម្ពុជា នៅមានកម្រិតទាប ដែលបង្ហាញនូវសក្តានុពលធំធេង សម្រាប់ការអភិវឌ្ឍនាពេលខាងមុខ។ នេះជាការបញ្ជាក់របស់លោក ប៊ូ ច័ន្ទភីរូ។

លោក ប៊ូ ច័ន្ទភីរូ បានឲ្យដឹងថា ការធានារ៉ាប់រង គឺជាឧបករណ៍ហិរញ្ញវត្ថុដ៏មានឥទ្ធិពល ក្នុងការជំរុញដំណើរការសេដ្ឋកិច្ច ជួយសង្គមក្នុងការរក្សាសុវត្ថិភាពហិរញ្ញវត្ថុ និងជំរុញស្ថិរភាព ហិរញ្ញវត្ថុរយៈពេលវែង។ ទីផ្សារធានារ៉ាប់រងកម្ពុជា គឺជាទីផ្សារមួយ ដែលកំពុងមានការវិវត្តន៍ឆ្ពោះ ទៅមុខយ៉ាងឆាប់រហ័ស គួរឱ្យកត់សម្គាល់ពីមួយឆ្នាំទៅមួយឆ្នាំ៕