(ពោធិ៍សាត់)៖ អង្គភាពពន្ធនាគារខេត្តពោធិ៍សាត់ សូមប្រកាសបដិសេធ និងច្រានចោលទាំងស្រុង ចំពោះការចុះផ្សាយរបស់គណនីហ្វេសបុកឈ្មោះ «BKK TV Show» កាលពីថ្ងៃទី២១ ខែកក្កដា ឆ្នាំ២០២៦ ដែលបានចោទប្រកាន់ថា មានជនជាប់ឃុំស្លាប់ក្នុងមន្ទីរពេទ្យដោយពន្ធនាគារបញ្ជូនមកគ្មានឯកសារ និងស្លាប់ដោយសារការប្រើអំពើហិង្សាចោទមានរបួសស្នាម។

នេះបើយោងតាមសេចក្តីបំភ្លឺព័ត៌មាន របស់ពន្ធនាគារខេត្ត ដែលអង្គភាពព័ត៌មាន Fresh News ទទួលបាននារសៀលថ្ងៃទី២១ ខែកក្កដា ឆ្នាំ២០២៦នេះ។

សេចក្តីបំភ្លឺព័ត៌មានបានបញ្ជាក់ថា ការចុះផ្សាយដោយគ្មានមូលដ្ឋានច្បាស់លាស់នេះ គឺជារឿងសន្និដ្ឋានខុសពីការពិតទាំងស្រុង ដែលមានចេតនាទុច្ចរិត បង្កើតការយល់ច្រលំពីសំណាក់សាធារណមតិ និងប៉ះពាល់យ៉ាងខ្លាំងដល់កេរ្តិ៍ឈ្មោះ សេចក្តីថ្លៃថ្នូររបស់មន្ត្រី និងអង្គភាពអនុវត្តច្បាប់។

ដើម្បីជម្រះរាល់មន្ទិលសង្ស័យ និងផ្តល់នូវព័ត៌មានពិតជូនសាធារណជនជ្រាប អង្គភាពពន្ធនាគារខេត្តពោធិ៍សាត់ សូមបញ្ជាក់ជូននូវអង្គហេតុ និងដំណើរការជាក់ស្តែងដូចខាងក្រោម៖

*ប្រវត្តិនៃការឃុំខ្លួន៖ ជនជាប់ឃុំឈ្មោះ សាន់ ចាន់ ត្រូវបានពន្ធនាគារទទួលយកមកឃុំខ្លួនកាលពីថ្ងៃទី០៩ ខែមេសា ឆ្នាំ២០២៦ តាមដីការបស់តុលាការខេត្តពោធិ៍សាត់ ក្រោមការចោទប្រកាន់ពីបទហិង្សាដោយ ចេតនាមានស្ថានទម្ងន់ទោស។

*កិច្ចខិតខំប្រឹងប្រែងសង្គ្រោះបន្ទាន់៖ ក្នុងអំឡុងពេលឃុំខ្លួន នៅថ្ងៃទី១៦ ខែកក្កដា ឆ្នាំ២០២៦ វេលាម៉ោង ០៩:១០នាទីព្រឹក ជនជាប់ឃុំរូបនេះមានអាការៈថប់ និងពិបាកដកដង្ហើម ហើយត្រូវបានបញ្ជូនទៅពិនិត្យនៅប៉ុស្តិ៍ សុខភាពពន្ធនាគារជាបន្ទាន់។ ដោយអាការៈកាន់តែធ្ងន់ធ្ងរ (ជីពចរញាប់ សម្ពាធឈាមធ្លាក់ចុះទាប) ពន្ធនាគារបានបញ្ជូនបន្តទៅមន្ទីរពេទ្យបង្អែកខេត្តពោធិ៍សាត់ភ្លាមៗនៅវេលាម៉ោង ០៩:៤០នាទីព្រឹក ដើម្បីសង្គ្រោះដោយក្រុមគ្រូពេទ្យជំនាញ។

*កិច្ចសហការជាមួយអាជ្ញាធរ និងក្រុមគ្រួសារ៖ ក្នុងពេលជាមួយគ្នានេះ ពន្ធនាគារបានព្យាយាមទាក់ទងសាច់ញាតិ ប៉ុន្តែមិនអាចទាក់ទងបាន ទើបសម្រេចសហការជាមួយអាជ្ញាធរមូលដ្ឋាន និងប៉ុស្តិ៍រដ្ឋបាលឃុំដើម្បីជួយផ្តល់ដំណឹង។

សាច់ញាតិបានមកដល់មន្ទីរពេទ្យនៅយប់ថ្ងៃទី១៦ ដដែល ប៉ុន្តែគួរឱ្យសោកស្តាយ ទោះបីជាក្រុមគ្រូពេទ្យខិតខំជួយសង្គ្រោះយ៉ាងណាក៏ដោយ ជនជាប់ឃុំបានទទួលមរណភាពនៅវេលាម៉ោង ០៧:២៨នាទីព្រឹក ថ្ងៃទី១៧ ខែកក្កដា ឆ្នាំ២០២៦។

លទ្ធផលកោសល្យវិច័យត្រឹមត្រូវតាមច្បាប់ ក្រោយពេលកើតហេតុ ព្រះរាជអាជ្ញាអមសាលាដំបូងខេត្តពោធិ៍សាត់ បានអនុញ្ញាតឱ្យសហការជាមួយនគរបាលព្រហ្មទណ្ឌ ការិយាល័យបច្ចេកទេស និងវិទ្យាសាស្ត្រ នៃស្នងការដ្ឋាននគរបាលខេត្ត និងក្រុមគ្រូពេទ្យបង្អែកខេត្ត ធ្វើកោសល្យវិច័យយ៉ាងហ្មត់ចត់។ លទ្ធផលសន្និដ្ឋានជាក់ច្បាស់បញ្ជាក់ថា ការស្លាប់គឺបណ្តាលមកស្ទះសរសៃឈាមបេះដូង រីឯស្លាកស្នាមនៅលើគូថគឺជាជំងឺរមាស់ និងស្លាកស្នាមនៅលើខ្នងគឺជាជំងឺបូស ដែលមានការពិនិត្យព្យាបាលរួចជាស្រេច។

អង្គភាពពន្ធនាគារខេត្តពោធិ៍សាត់ ក្នុងនាមជាអង្គភាពអនុវត្តច្បាប់ តែងតែគោរពយ៉ាងខ្ជាប់ខ្ជួននូវគោលការណ៍មនុស្សធម៌ ធានាសន្តិសុខ សណ្តាប់ធ្នាប់ ផ្តល់ការអប់រំកែប្រែ និងការថែទាំសុខភាពជូនជនជាប់ឃុំគ្រប់រូបដោយគ្មាន ការរើសអើង ហើយពន្ធនាគារពុំមែនជាកន្លែងអនុញ្ញាតឱ្យមានការប្រព្រឹត្តអំពើហិង្សា ឬទារុណកម្មឡើយ។

អាស្រ័យហេតុនេះ សូមសាធារណជន និងបណ្តាញសារព័ត៌មានទាំងអស់ មេត្តាជ្រាបជាព័ត៌មាន និងកុំមានការភាន់ច្រឡំតាមការចុះផ្សាយខុសពីការពិតរបស់គណនីហ្វេសបុកឈ្មោះ «BKK TV Show»។ ទន្ទឹមនឹងនេះ អង្គភាពស្នើឱ្យម្ចាស់គណនីហ្វេសបុកខាងលើធ្វើការលុប ឬកែតម្រូវព័ត៌មាននេះឱ្យបានត្រឹមត្រូវវិញ។ ក្នុងករណីមានការងឿងឆ្ងល់ ឬចង់បានព័ត៌មានលម្អិតបន្ថែម សូមអញ្ជើញទាក់ទងមកកាន់ពន្ធនាគារខេត្តផ្ទាល់ ដែលជានិច្ចកាលតែងមានភាពរីករាយក្នុងការសហការផ្តល់ព័ត៌មានពិតជូនជានិច្ច៕