(កំពង់ធំ)៖ ប្រជាពលរដ្ឋ៤គ្រួសារ ដែលរស់នៅភូមិឫស្សីជះ ឃុំត្បែង ស្រុកកំពង់ស្វាយ ខេត្តកំពង់ធំ កំពុងស្វែងរកកិច្ចអន្តរាគមន៍ពីអាជ្ញាធរ និងថ្នាក់ដឹកនាំ ដើម្បីបានការបើកផ្លូវក្នុងភូមិចាស់មួយខ្សែប្រវែង ៥០០ម៉ែត្រ ដែលត្រូវមេភូមិ និងបក្ខពួកបិទ មិនឱ្យពួកគាត់បានធ្វើដំណើរ អាស្រ័យផលដូចសព្វដង កាលពីពេលថ្មីៗនេះ។

តាមការអះអាងរបស់ប្រជាពលរដ្ឋ បានឱ្យដឹងថា នាពេលថ្មីៗនេះ មេភូមិឈ្មោះ កែ សឿង រួមជាមួយបក្ខពួក បានដើរប្រមូលស្នាមេដៃ និងឈ្មោះអ្នកភូមិដើម្បីចូលរួមបិទផ្លូវសាធារណៈមួយខ្សែ ដោយអះអាងថា ស្រុកបានសម្រេចបិទផ្លូវនេះ។ ការបិទផ្លូវនេះ ទទួលបានផលចំណេញតែអ្នកមានដី​នៅខាងមុខផ្លូវតែប៉ុណ្ណោះ ដោយក្នុងនោះក៏មានដែរនូវផ្ទះនិងដីរបស់មេភូមិ ចំណែកអ្នកនៅខាងក្រោយ ដែលធ្លាប់ចេញចូលតាមផ្លូវនេះ ត្រូវតម្រូវឱ្យធ្វើដំណើរតាមផ្លូវផ្សេងដែលវាងឆ្ងាយទៅវិញ។

តាមរយៈវីដេអូ ឈ្មោះ សឿន ប្រជាពលរដ្ឋរស់នៅភូមិឫស្សីជះ ដែលរងគ្រោះដោយការបិទផ្លូវខាងលើនេះ បានឱ្យដឹងថា ផ្លូវលំក្នុងភូមិ១ខ្សែនេះ គឺគាត់ធ្វើដំណើរតាំងពីតូចម្ល៉េះ។ លោកបានស្នើសុំដល់អាជ្ញាធរគ្រប់ជាន់ថ្នាក់ និងថ្នាក់ដឹកនាំដើម្បីអន្តរគមន៍បើកផ្លូវនេះឡើងវិញ ដើម្បីឱ្យរូបគាត់ និងអ្នកភូមិមួយចំនួនទៀត បានអាស្រ័យផលដូចសព្វដង៕