(ព្រះវិហារ)៖ មន្ទីរបរិស្ថានខេត្តព្រះវិហារ បានសហការជាមួយអាជ្ញាធរមូលដ្ឋាន និងអង្គការដៃគូ រៀបចំកម្មវិធីដាំស្តារព្រៃឈើឡើងវិញ នៅលើទីតាំងដែលបានដកហូតក្នុងតំបន់ការពារធម្មជាតិ ក្នុងដែនជម្រកសត្វព្រៃឆែប-ព្រះរការ នាថ្ងៃទី២១ ខែកក្កដា ឆ្នាំ២០២៦។

ពិធីនេះធ្វើឡើងក្រោមប្រធានបទ «យើងរួមគ្នាបង្កើនគម្របបៃតង ដើម្បីចូលរួមអនុវត្តន៍យុទ្ធសាស្ត្រចក្រាវិស័យបរិស្ថានឆ្នាំ២០២៣-២០២៨ ស្របតាមយុទ្ធសាស្ត្រទី២ «ភាពបៃតង»។

ពិធីដាំកូនឈើនេះបានប្រព្រឹត្តទៅក្រោមអធិបតីភាពលោក ជា សំអាង រដ្ឋលេខាធិការក្រសួងបរិស្ថាន និងលោក សុខ សាន្តតារ៉ា អភិបាលរងខេត្តព្រះវិហារ ដោយមានការចូលរួមពីតំណាងរដ្ឋបាលខេត្ត ស្រុក តំណាងអង្គការដៃគូ មន្ត្រីរាជការ មន្ត្រីឧទ្យានុរក្ស អ្នកសារព័ត៌មាន និងប្រជាពលរដ្ឋនៃសហគមន៍តំបន់ការពារធម្មជាតិជាច្រើននាក់។ កម្មវិធីនេះបង្ហាញពីការប្តេជ្ញាចិត្តខ្ពស់ក្នុងការអភិរក្សបរិស្ថាន និងលើកកម្ពស់ជីវភាពសហគមន៍ ស្របតាមគោលនយោបាយរបស់រាជរដ្ឋាភិបាល។

លោក មឿន សុភេទ ប្រធានមន្ទីរបរិស្ថានខេត្តព្រះវិហារ បានបញ្ជាក់ថា គោលបំណងសំខាន់នៃការដាំស្តារព្រៃឈើ និងថែទាំដំណុះពីធម្មជាតិ គឺដើម្បីទប់ស្កាត់បទល្មើសធនធានធម្មជាតិ ប្រែក្លាយតំបន់រុករានឱ្យទៅជាព្រៃធម្មជាតិ ជម្រកសត្វព្រៃ និងជីវចម្រុះសំបូរបែប ព្រមទាំងជួយទប់ស្កាត់បម្រែបម្រួលអាកាសធាតុ។ លើសពីនេះកម្មវិធីក៏មានបំណងបង្កើនការចូលរួម និងការទទួលខុសត្រូវពីគ្រប់ភាគីពាក់ព័ន្ធ ក្នុងការការពារធនធានធម្មជាតិផងដែរ។

លោក សុខ សាន្តតារ៉ា បានលើកទឹកចិត្តដល់អាជ្ញាធរ និងប្រជាពលរដ្ឋនៅតាមសហគមន៍មូលដ្ឋានទាំងអស់ ឱ្យចូលរួមដាំដើមឈើ និងការពារព្រៃឈើ ដោយបានសង្កត់ធ្ងន់ថា ការថែរក្សាព្រៃឈើអាចផ្តល់ប្រាក់ចំណូលយ៉ាងសំខាន់ដល់សហគមន៍ តាមរយៈការប្រមូលផលផ្សិត និងបន្លែធម្មជាតិផ្សេងៗ។

លោក ជា សំអាង បានលើកឡើងថា ការដាំស្តារព្រៃឈើ និងថែទាំដំណុះពីធម្មជាតិ ចាំបាច់មានការចូលរួមពីគ្រប់ភាគី ដើម្បីប្រែក្លាយតំបន់រិចរិលឱ្យក្លាយជាព្រៃធម្មជាតិ ជាជម្រកសត្វព្រៃ និងប្រព័ន្ធអេកូឡូស៊ី។

មន្ត្រីជាន់ខ្ពស់ក្រសួងបរិស្ថាន បានជំរុញឱ្យមានចលនាដាំដើមឈើនៅគ្រប់សហគមន៍មូលដ្ឋាន ព្រោះកិច្ចការនេះមិនត្រឹមតែចូលរួមការពារ និងអភិរក្សព្រៃឈើប៉ុណ្ណោះទេ ថែមទាំងបានផ្តល់ប្រាក់ចំណូលជូនប្រជាពលរដ្ឋទៀតផង៕