(ព្រះវិហារ)៖ មន្ទីរពេទ្យបង្អែក ១៦ មករា ខេត្តព្រះវិហារ នៅថ្ងៃទី២១ ខែកក្កដា ឆ្នាំ២០២៦ បានទទួលសម្ភារៈបរិក្ខារវេជ្ជសាស្ត្រ និងសម្ភារៈសម្រាប់បម្រើសេវាព្យាបាលមួយចំនួនធំ ពីក្រុមគ្រូពេទ្យស្ម័គ្រចិត្តយុវជនសម្តេចតេជោ (TYDA) ដែលដឹកនាំដោយសម្តេចមហាបវរធិបតី ហ៊ុន ម៉ាណែត ប្រធានក្រុមប្រឹក្សាភិបាលក្រុមគ្រូពេទ្យស្ម័គ្រចិត្ត (TYDA) និងលោកជំទាវបណ្ឌិត ពេជ ចន្ទមុន្នី អនុប្រធានក្រុមប្រឹក្សាភិបាល។

ពិធីប្រគល់ និងទទួលនេះធ្វើឡើងនៅក្នុងគោលបំណងយកទៅប្រើប្រាស់ក្នុងការបម្រើសេវាថែទាំ និងព្យាបាលអ្នកជំងឺប្រកបដោយប្រសិទ្ធភាពខ្ពស់។

សម្ភារៈដែលបានឧបត្ថម្ភនាពេលនេះរួមមាន គ្រែអ្នកជំងឺចំនួន ៣៥, ពូកចំនួន ៣៥, កៅអីកន្ថោចំនួន ៣០, គ្រែពិនិត្យរោគស្ត្រីចំនួន ១, រទេះជនពិការចំនួន ៣ និងអាវអ្នកជំងឺចំនួន ២,០០០។ អំណោយដ៏ថ្លៃថ្លាទាំងនេះ គឺជាការរួមចំណែកដ៏សំខាន់ក្នុងការលើកកម្ពស់គុណភាពសេវាសុខាភិបាលនៅមន្ទីរពេទ្យបង្អែក ១៦ មករា ខេត្តព្រះវិហារ។

លោកវេជ្ជបណ្ឌិត គួង ឡូ ទីប្រឹក្សាក្រសួងសុខាភិបាល និងជាប្រធានមន្ទីរសុខាភិបាលខេត្តព្រះវិហារ បានថ្លែងអំណរគុណយ៉ាងជ្រាលជ្រៅចំពោះសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត ពេជ ចន្ទមុន្នី ព្រមទាំងក្រុមគ្រូពេទ្យស្ម័គ្រចិត្ត TYDA ដែលតែងតែយកចិត្តទុកដាក់គាំទ្រដល់វិស័យសុខាភិបាល ជាពិសេសចំពោះមន្ទីរពេទ្យនៅតាមបណ្តាខេត្ត។

លោកវេជ្ជបណ្ឌិតបានបញ្ជាក់ថា អំណោយទាំងនេះនឹងជួយពង្រឹងសមត្ថភាពមន្ទីរពេទ្យ ក្នុងការផ្តល់សេវាពិនិត្យ ព្យាបាល និងថែទាំអ្នកជំងឺប្រកបដោយគុណភាព សុវត្ថិភាព និងផាសុកភាព កាត់បន្ថយការខ្វះខាត និងបង្កើនប្រសិទ្ធភាពក្នុងការបំពេញបេសកកម្មថែរក្សាសុខភាពប្រជាពលរដ្ឋ។

ការឧបត្ថម្ភជាបន្តបន្ទាប់ពីក្រុមគ្រូពេទ្យស្ម័គ្រចិត្ត TYDA បានឆ្លុះបញ្ចាំងពីការយកចិត្តទុកដាក់ខ្ពស់របស់ប្រមុខរាជរដ្ឋាភិបាល និងលោកជំទាវបណ្ឌិត ចំពោះសុខុមាលភាពរបស់ប្រជាពលរដ្ឋនៅគ្រប់ទិសទី ស្របតាមគោលនយោបាយលើកកម្ពស់គុណភាពសេវាសុខាភិបាល។

មន្ទីរសុខាភិបាលខេត្ត និងមន្ទីរពេទ្យបង្អែក ១៦ មករា ប្តេជ្ញាថែរក្សា និងប្រើប្រាស់សម្ភារៈទាំងអស់ឱ្យមានប្រសិទ្ធភាពខ្ពស់បំផុត ដើម្បីបម្រើផលប្រយោជន៍ប្រជាពលរដ្ឋ និងលើកកម្ពស់គុណភាពសេវាសុខាភិបាលនៅក្នុងខេត្តព្រះវិហារ៕