(ឌូបៃ)៖ នាវាដឹកប្រេងចំនួន ២គ្រឿង ដែលផ្ទុកប្រេងឆៅរបស់ប្រទេសអារ៉ាប៊ីសាអូឌីត ឆ្ពោះទៅកាន់ប្រទេសចិន និងឥណ្ឌា បានបង្វែរទិសដៅត្រឡប់ក្រោយវិញនៅក្នុងសមុទ្រក្រហម នៅថ្ងៃអង្គារនេះ បន្ទាប់ពីទទួលរងការគំរាមកំហែងពីក្រុមឧទ្ទាមហ៊ូទីនៅយេម៉ែន។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការគំរាមកំហែងនេះកើតឡើងស្របពេលដែលជម្លោះនៅមជ្ឈិមបូព៌ាកាន់តែរីករាលដាល បន្ទាប់ពីអាមេរិកបានវាយប្រហារលើភាគខាងត្បូង និងខាងលិចអ៊ីរ៉ង់កាលពីយប់មិញ ខណៈអ៊ីរ៉ង់ក៏បានវាយប្រហារលើទីតាំងអាមេរិកនៅបារ៉ែន កូវ៉ែត និងហ្សកដានី ផងដែរ។ មិនតែប៉ុណ្ណោះ នាវាដឹកប្រេងមួយគ្រឿងក៏រងការវាយប្រហារនៅច្រកសមុទ្រហ័រមូស ដែលទង្វើទាំងនេះស្ទើរតែបំផ្លាញកិច្ចព្រមព្រៀងសន្តិភាពបណ្តោះអាសន្នទាំងស្រុងទៅហើយ។

ការប្រកាសបិទខ្ទប់ផ្លូវសមុទ្រប្រឆាំងនឹងអារ៉ាប៊ីសាអូឌីតពីសំណាក់ក្រុមហ៊ូទីកាលពីថ្ងៃចន្ទ គឺជាការបើកសមរភូមិថ្មីមួយទៀត ដែលបង្កើនការគំរាមកំហែងដល់ការផ្គត់ផ្គង់ថាមពល និងពាណិជ្ជកម្មសកល។ ទោះជាយ៉ាងណា ប្រភពបានបញ្ជាក់ថា កំពង់ផែ Yanbu របស់អារ៉ាប៊ីសាអូឌីតនៅសមុទ្រក្រហម នៅតែដំណើរការជាធម្មតា។ តម្លៃប្រេងបានកើនឡើងប្រមាណ ២ភាគរយ ក្រោយការវាយប្រហារថ្មីៗនេះ ប៉ុន្តែសញ្ញាដែលបង្ហាញថា អាមេរិក និងអ៊ីរ៉ង់នៅតែចង់បន្តការចរចា បានជួយទប់តម្លៃប្រេងមិនឱ្យហក់ឡើងខ្លាំង។

បញ្ជាការដ្ឋានកណ្តាលអាមេរិក (CENTCOM) បានបញ្ជាក់ថា ខ្លួនបានវាយកម្ទេចមជ្ឈមណ្ឌលបញ្ជាការយោធា និងប្រព័ន្ធការពារដែនអាកាសរបស់អ៊ីរ៉ង់។ ចំណែកឯ​ ប្រព័ន្ធផ្សព្វផ្សាយរដ្ឋអ៊ីរ៉ង់បានរាយការណ៍ពីការវាយប្រហារនៅតាមទីតាំងជាច្រើននៅភាគខាងត្បូង និងខាងលិចប្រទេស។ មន្ត្រីសុខាភិបាលអ៊ីរ៉ង់បានបញ្ជាក់ថា ជនស៊ីវិល ៥០នាក់ត្រូវបានសម្លាប់ និង ៥០០នាក់រងរបួស នៅក្នុងការវាយប្រហាររបស់អាមេរិកនាពេលថ្មីៗនេះ៕