(ភ្នំពេញ)៖ លោក សារិន វណ្ណា ប្រធានមន្ទីររៀបចំដែនដីរាជធានីភ្នំពេញ តាមរយៈបណ្តាញទំនាក់ទំនងសង្គមផ្លូវការរបស់លោក បានសំណូមពរស្នើសុំក្រសួងរៀបចំដែនដី នគរូបនីយកម្ម និងសំណង់ គួរបង្កើតឱ្យមានកន្លែងផ្តល់សេវាថ្មី «មជ្ឈមណ្ឌលប្រជាពលរដ្ឋ» តាមផ្សារឯកជនដូចជា ផ្សារអ៉ីអន ជាដើម ដើម្បីងាយស្រួលបម្រើសេវាជូនពលរដ្ឋ។

បន្ថែមលើសពីនេះ លោកឱ្យមា​នការប្រើប្រាស់នូវប្រព័ន្ធឌីជីថលផងដែរ ដើម្បីងាយស្រួលក្នុងការបំពេញបែបបទស្នើសុំនានា ខណៈក្រសួងរៀបចំដែនដី បានសាកល្បងសម្រាប់មន្ទីរដែនដីរាជធានីភ្នំពេញផងដែរ។

លោកបានបង្ហោះសារដូច្នេះថា៖«សម្រប់កំណែទម្រង់សេវារដ្ឋបាលលើវិសយ័ដីធ្លី ប្រកបដោយសេវាគាប់ចិត្ត មន្ទីររៀបចំដែនដីរាជធានីភ្នំពេញ និងគោរពស្នើសុំមកក្រសួងរៀបចំដែនដី នគរូបនីយកម្ម និងសំណង់ គួរបង្កើតកន្លែងផ្តល់សេវាថ្មី (មជ្ឈមណ្ឌលប្រជាពលរដ្ឋ) តាមផ្សារឯកជនដូចជា (ផ្សារអ៉ីអន 1 2 និង3) ដោយប្រើប្រាស់ប្រព័ន្ធឌីជីថល និងមានមន្ត្រីជំនួយការអាចជួយបំពេញទម្រង់បែបបទតាមប្រព័ន្ធអនឡាញ (ចំនួន៤តំបន់ទូទាំងប្រទេស) ងាយស្រួលដល់អ្នកស្នើសុំសេវាមានការសម្រេចចិត្ត ដោយមិនចាំបាច់ជ្រើសរើសមន្ទីររៀបចំដែនដីរាជធានី ខេត្ត។

សេវាសាធារណៈតាមប្រព័ន្ធអនឡាញជាសេវាគាប់ចិត្ត (បរិវត្តកម្មឌីជីថល) ស្របតាមឆន្ទៈ និងអ្វីដែលរាជរដ្ឋាភិបាល អណាតិ្តទី៧ ចង់បាន។ សេវាសាធារណៈតាមអង្គភាពច្រកចេញ ចូលតែមួយតាមបណ្តារាជធានី ខេត្ត (ថ្នាក់ក្រោមជាតិ) និងមជ្ឈមណ្ឌលប្រជាពលរដ្ឋ (ក្រសួងរៀបចំដែនដី) មានជម្រើសពីរ ដែលអ្នកស្នើសុំសេវាសាធារណៈ ត្រូវសម្រេចចិត្តតាមការជ្រើសរើសសេវាណាដែលពេញចិត្តសម្រាប់ការស្នើសុំ។ ចំពោះសេវាអនឡាញដែលកសាងឡើងដោយមន្ទីររៀបចំដែនដីរាជធានីភ្នំពេញ សហការជាមួយ ក្រសួងរៀបចំដែនដី នគរូបនីយកម្ម និងសំណង់ បានសាកល្បងប្រើប្រាស់រួច អាចដំណើរការបាននូវស្តង់ដារទូទាំងប្រទេស»៕