អង្គការសង្គមស៊ីវិលនិងអាជ្ញាធរមូលដ្ឋានក្នុងខេត្តស្ទឹងត្រែង គាំទ្រយុទ្ធសាស្ត្រកសាងសង្គមឌីជីថលរបស់រាជរដ្ឋាភិបាលនិងប្ដេជ្ញាបន្តកិច្ចសហការជិតស្និទ្ធក្នុងការជំរុញការអភិវឌ្ឍសេដ្ឋកិច្ចសង្គមឱ្យកាន់តែល្អប្រសើរថែមទៀត
22-07-2026 11:42
(ស្ទឹងត្រែង)៖ ក្នុងអង្គវេទិកាសន្ទនាស្ដីពី «ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល» កាលពីព្រឹកថ្ងៃទី២១ ខែកក្កដា ឆ្នាំ២០២៦ ដែលបានសហការរៀបចំដោយវេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្ត្រី និងរដ្ឋបាលខេត្តស្ទឹងត្រែង ក្រោមអធិបតីភាពលោក ប៉ៃ សំបូរ អគ្គលេខាធិការ វ.ស.ស. និងលោក យឹម ផែន អភិបាលរងនៃគណៈអភិបាលខេត្តស្ទឹងត្រែង អង្គការសង្គមស៊ីវិលដែលមានប្រតិបត្តិការក្នុងខេត្តនេះ បានបង្ហាញនូវការគាំទ្រយ៉ាងពេញទំហឹងចំពោះយុទ្ធសាស្ត្រកសាងសង្គមឌីជីថលរបស់រាជរដ្ឋាភិបាល ព្រមទាំងបានប្ដេជ្ញាចិត្តខ្ពស់ក្នុងការចូលរួមយ៉ាងជិតស្និទ្ធជាមួយអាជ្ញាធរមូលដ្ឋានក្នុងការអភិវឌ្ឍសេដ្ឋកិច្ចសង្គមក្នុងសហគមន៍ឱ្យកាន់តែល្អប្រសើរថែមទៀត។
ថ្លែងក្នុងអង្គវេទិកាដែលមានការចូលរួមពីតំណាងសង្គមស៊ីវិលនិងអាជ្ញាធរមូលដ្ឋានជាច្រើននាក់លោក ប៉ៃ សំបូរ អគ្គលេខាធិការ វ.ស.ស. បានមានប្រសាសន៍ថា វេទិកាសន្ទនានាថ្ងៃនេះ គឺជាការបន្តរក្សានិងលើកកម្ពស់នូវវប្បធម៌សន្ទនាក្នុងគ្រួសារនៃអង្គការសង្គមស៊ីវិល ដែលយើងត្រូវប្រកាន់ខ្ជាប់ក្នុងស្មារតីថែរក្សាសុខសន្តិភាពនិងសុខដុមនីយកម្មសង្គមស៊ីវិល និងពង្រឹងកិច្ចសហប្រតិបត្តិការល្អរវាងគ្រប់តួអង្គពាក់ព័ន្ធ ដើម្បីជំរុញការអភិវឌ្ឍមូលដ្ឋានឱ្យកាន់តែរីកចម្រើនថែមទៀត។
លោកក៏បានគូសបញ្ជាក់អំពីគោលជំហររបស់រាជរដ្ឋាភិបាលនីតិកាលទី៧ នៃរដ្ឋសភា ក្រោមការដឹកនាំរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា ដែលតែងតែចាត់ទុកអង្គការសង្គមស៊ីវិលជាដៃគូមិនអាចខ្វះបាន សម្រាប់ការអភិវឌ្ឍសេដ្ឋកិច្ចសង្គមនិងការពង្រឹងនីតិរដ្ឋ។ ទន្ទឹមនឹងនេះ លោកបានអំពាវនាវឱ្យអាជ្ញាធរដែនដីនិងអង្គការសង្គមស៊ីវិលក្នុងខេត្ត ជួយជំរុញឪពុកម្តាយឱ្យបញ្ជូនកូនៗទៅរៀនវគ្គវិជ្ជាជីវៈខ្លីៗនៅមជ្ឈមណ្ឌលបណ្តុះបណ្តាលវិជ្ជាជីវៈខេត្តស្ទឹងត្រែង ដើម្បីចាប់យកឱកាសការងារតាមរោងចក្រក្នុងតំបន់។
ក្នុងអង្គវេទិកាសន្ទនានាព្រឹកនេះ លោក យឹម ផែន បានកោតសរសើរដល់តួនាទីយ៉ាងសកម្មរបស់សង្គមស៊ីវិលក្នុងការអភិវឌ្ឍខេត្តស្ទឹងត្រែងនាពេលកន្លងមក ដែលគ្របដណ្តប់លើវិស័យជាច្រើន ដូចជាអប់រំ សុខភាព អនាម័យ បរិស្ថាន សុខុមាលភាព និងការអភិវឌ្ឍជនបទ រួមទាំងការចូលរួមចំណែកក្នុងកំណែទម្រង់ជាតិ និងការពង្រឹងនីតិរដ្ឋផងដែរ។ លោកក៏បានអំពាវនាវដល់អង្គការសង្គមស៊ីវិលនិងដៃគូអភិវឌ្ឍន៍ទាំងអស់ ជួយបន្តផ្សព្វផ្សាយអំពីយុទ្ធនាការទប់ស្កាត់គ្រឿងញៀនក្នុងសហគមន៍ ដើម្បីរួមគ្នាលុបបំបាត់បញ្ហាគ្រឿងញៀនក្នុងមូលដ្ឋានក្រុង-ស្រុកទាំង៦ នៃខេត្តស្ទឹងត្រែង។
លោកអភិបាលរងក៏បានលើកទឹកចិត្តឱ្យអង្គការសង្គមស៊ីវិលបន្តសហការយ៉ាងជិតស្និទ្ធជាមួយអាជ្ញាធរមូលដ្ឋាន ដើម្បីជំរុញការអភិវឌ្ឍសេដ្ឋកិច្ចសង្គម និងលើកកម្ពស់សុខុមាលភាពប្រជាជនឱ្យកាន់តែល្អប្រសើរថែមទៀត។
ដើម្បីពង្រឹងសមត្ថភាពបន្ថែមសម្រាប់អង្គការសង្គមស៊ីវិលក្នុងខេត្តស្ទឹងត្រែង វ.ស.ស. បានរៀបចំបទបង្ហាញចែករំលែកចំណេះដឹងលើប្រធានបទ «ការយល់ដឹងអំពីអក្ខរកម្មឌីជីថល និងសុវត្ថិភាពតាមប្រព័ន្ធបច្ចេកវិទ្យា» ដោយលោក ទ្រី វិទូ ប្រធានដេប៉ាតឺម៉ង់ពាណិជ្ជកម្មអេឡិចត្រូនិកនៃបណ្ឌិត្យសភាបច្ចេកវិទ្យាឌីជីថលកម្ពុជា ក្នុងគោលបំណងផ្សព្វផ្សាយ និងលើកកម្ពស់ការយល់ដឹងអំពីគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ ផងដែរ។
