អ្នករាយការណ៍ពិសេសផ្នែកសិទ្ធិមនុស្សរបស់ UN នឹងចុះទៅមើលការលំបាករបស់ជនភៀសសឹកកម្ពុជា ព្រោះសង្គ្រាមឈ្លានពានពីសំណាក់ទ័ពថៃ (Video inside)
22-07-2026 13:07
(ភ្នំពេញ)៖ លោក ថូម៉ាស់ អេនឌ្រូ អ្នករាយការណ៍ពិសេសផ្នែកសិទ្ធិមនុស្សរបស់អង្គការសហប្រជាជាតិប្រចាំនៅកម្ពុជា នឹងធ្វើដំណើរទៅកាន់បណ្តាខេត្តរបស់កម្ពុជា ជាប់ព្រំដែនថៃ ដើម្បីពិនិត្យមើលដោយផ្ទាល់នូវស្ថានភាពជនភៀសសឹករបស់កម្ពុជា ដែលបានរងគ្រោះ និងបាត់បង់ផ្ទះសម្បែង ដោយសារទង្វើឈ្លានពានរបស់កងទ័ពថៃ។
លោក អេនឌ្រូ បានបញ្ជាក់បែបនេះ ក្នុងពេលអញ្ជើញជួបសម្តែងការគួរសមជាមួយសម្តេចតេជោ ហ៊ុន សែន ប្រធានព្រឹទ្ធសភាកម្ពុជា នាព្រឹកថ្ងៃពុធ ទី២២ ខែកក្កដា ឆ្នាំ២០២៦នេះ។
លោក ជា ធីរិទ្ធ អ្នកនាំពាក្យព្រឹទ្ធសភា បានឱ្យដឹងថា នៅក្នុងជំនួបនោះ លោក អេនឌ្រូ បានបង្ហាញពីការតាមដានស្ថានភាពព្រំដែនកម្ពុជា និងថៃ។ លោក អេនឌ្រូ បានបញ្ជាក់ថា លោកគ្រោងជួបជនភៀសសឹករបស់កម្ពុជា ដែលទទួលរងឥទ្ធិពល ទទួលការលំបាកកើតចេញអំពីសង្គ្រាមរវាងកម្ពុជា និងថៃ។ អ្នករាយការណ៍ពិសេសផ្នែកសិទ្ធិមនុស្សរូបនេះ ចង់ទៅឃើញទិដ្ឋភាពជាក់ស្ដែងពីផលលំបាករបស់ជនភៀសសឹក តើជួបការលំបាកយ៉ាងដូចម្ដេច? លោកចង់ឃើញផ្ទាល់ភ្នែករបស់លោកតែម្ដង។
សម្ដេចតេជោ ហ៊ុន សែន បានថ្លែងអំណរគុណអ្នករាយការណ៍ពិសេសរបស់អង្គការសហប្រជាជាតិ ចំពោះការចាប់អារម្មណ៍លើរឿងព្រំដែនរវាងកម្ពុជា និងថៃ។ សម្ដេចតេជោ បានថ្លែងថា សម្តេចពិតជាអរគុណចំពោះការចាប់អារម្មណ៍ក្នុងការធ្វើដំណើរទៅដោយផ្ទាល់ ទៅជួបជនភៀសសឹករបស់កម្ពុជាតាមព្រំដែន ដែលទទួលរងផលប៉ះពាល់កើតចេញពីសង្គ្រាមរវាងកម្ពុជា និងថៃនោះ។
សម្ដេចតេជោ ហ៊ុន សែន សង្ឃឹមថា អ្នករាយការណ៍ពិសេសផ្នែកសិទ្ធិមនុស្សរូបនេះ នឹងបានឃើញអំពីទិទ្ធភាពជាក់ស្ដែងថា តើប្រជាជនកម្ពុជា ដែលជាជនភៀសសឹកនោះ ទទួលរងនូវផលប៉ះពាល់ និងភាពពិតប្រាកដលំបាកយ៉ាងដូចម្ដេចផ្ទាល់នឹងភ្នែករបស់លោកតែម្ដងទាក់ទងទៅនឹងរឿងរ៉ាវព្រំដែននេះ។
សម្ដេចតេជោ ហ៊ុន សែន ក៏បានពន្យល់ប្រវត្តិកើតឡើងនៃជម្លោះព្រំដែនកម្ពុជា និងថៃ ដល់លោក អេនទ្រូ ឲ្យបានយល់បន្ថែមទៀត។
សង្គ្រាមឈ្លានពានរបស់កងទ័ពថៃ មកលើទឹកដីកម្ពុជា នឹងដល់ខួបគម្រប់មួយឆ្នាំនៅថ្ងៃទី២៤ ខែកក្កដា ឆ្នាំ២០២៦នេះ។ សង្គ្រាមឈ្លានពីរលើកនៅឆ្នាំ២០២៥ ពីសំណាក់កងទ័ពថៃ មកលើបូរណភាពទឹកដីកម្ពុជា បានធ្វើឱ្យប្រជាពលរដ្ឋជិត១លាននាក់ បង្ខំចិត្តចាកចោលទីជម្រក ដើម្បីសុវត្ថិភាព។
បើទោះបីសំឡេងផ្ទុះអាវុធបានបិទបញ្ចប់ទៅហើយក្តីកាលពីចុងខែធ្នូ ឆ្នាំ២០២៥ តែមានប្រជាពលរដ្ឋកម្ពុជា ជាង៣ពាន់គ្រួសារទៀត មិនទាន់បានត្រឡប់ទៅផ្ទះសម្បែងរបស់ពួកគេនៅឡើយ ដោយសារដី និងផ្ទះសម្បែងរបស់ពួកគេ ត្រូវបានកាន់កាប់ដោយខុសច្បាប់ពីកងទ័ពថៃ៕
