អំពីកសិកម្ម៖ ការចិញ្ចឹម ការប្រមូល និងអត្ថប្រយោជន៍សំបុកត្រចៀកកាំ
22-07-2026 14:18
(ភ្នំពេញ)៖ ត្រចៀកកាំ ជាប្រភេទបក្សីតូចមួយនៃអំបូរសត្វស្លាបហោះលឿន ដែលត្រូវបានគេរកឃើញនៅអាស៊ីអាគ្នេយ៍។ ពួកវាបង្កើតសំបុកជាមួយនឹងទឹកមាត់ជាសរសៃស្អិត ដែលផលិតដោយក្រពេញធំទាំងគូក្រោម អណ្តាតរបស់ពួកគេ ហើយបន្ទាប់មកបង្កើតកូន និងបង្កាត់ពូជកូនរបស់វានៅក្នុងសំបុក។ រដូវបន្តពូជ និងចិញ្ចឹមកូនរបស់វាជាលើកដំបូងចាប់ផ្តើមនៅខែធ្នូ ដល់ខែមីនា ពីខែមេសា ដល់ខែកក្កដា ដែលជាបន្តបន្ទាប់ដល់ខែវិច្ឆិកា។
គិតត្រឹមដើមឆ្នាំ២០២៦នេះ ផ្ទះត្រចៀកកាំប្រមាណជិត ១ពាន់ខ្នងផ្ទះ ត្រូវបានក្រសួងកសិកម្មចុះបញ្ជី។ ផលិតកម្មសំបុកត្រចៀកកាំនៅកម្ពុជា ភាគច្រើនផលិតនៅខេត្តជាប់មាត់សមុទ្រ ដូចជា ខេត្តកំពត ខេត្តកោះកុង ប៉ុន្តែសក្ដានុពលសម្រាប់ការវិនិយោគបន្ត បច្ចុប្បន្នបានប្ដូរមកខេត្តភូមិភាគកណ្ដាល ដូចជាខេត្តកំពង់ធំ ខេត្តជុំវិញបឹងទន្លេសាប ខេត្តស្ទឹងត្រែង និងព្រះវិហារវិញ ដោយសារខេត្តជាប់មាត់សមុទ្រ មានការសាងសង់ច្រើនលើសលប់។ តាមការប៉ាន់ស្មាន កម្ពុជាផលិតបានសំបុកត្រចៀកកាំប្រមាណ ១០០តោនក្នុងមួយឆ្នាំ ដែលផលិតផលទាំងនេះ ត្រូវបានកែច្នៃក្នុងស្រុក និងនាំចេញទៅប្រទេសជិតខាង ដែលមានអាជ្ញាបណ្ណនាំចេញទៅចិន។ នេះបើតាមការបញ្ជាក់របស់លោក ស៊ុយ កុកធាន ប្រធានសមាគមត្រចៀកកាំកម្ពុជា។
*អំពីអាជីវកម្មត្រចៀកកាំ
មុខរបរអាជីវកម្មចិញ្ចឹមសត្វត្រចៀកកាំ គឺជាមុខរបរបន្ទាប់បន្សំមួយបែប ដែលក្រោយពីកិច្ចការងារធ្វើស្រែចម្ការ និងការងាររកស៊ី ពួកគាត់ក៏បានសាងសង់លំនៅដ្ឋានជាផ្ទះសម្រាប់ចិញ្ចឹមសត្វត្រចៀកកាំនេះតែម្ដងទៅ។ ហើយការចំណាយទុនទៀតសោត ត្រូវការថវិកាយ៉ាងច្រើនសន្ធឹកសន្ធាប់នៅក្នុងការសាងសង់ និងរៀបចំរចនាបទសម្រាប់លំនៅដ្ឋានរបស់សត្វប្រចៀកកាំនេះ ដើម្បីឱ្យមានរបៀប និងសណ្ដាប់ធ្នាប់សម្រាប់សត្វប្រចៀកកាំនេះចូលជ្រក និងធ្វើជាសំបុកជាដើម។
ចំពោះការសាងសង់ផ្ទះ ឬអគាថែរក្សាសត្វត្រចៀកកាំជាលក្ខណៈគ្រួសារទាំងអស់ ត្រូវអនុវត្តស្របតាមអនុក្រឹត្យលេខ៤២ អនក្រ.បក ចុះថ្ងៃទី១០ ខែកក្កដា ឆ្នាំ២០០០ ស្តីពីការត្រួតពិនិត្យ ការបំពុលខ្យល់ និងការរំខានដោយសំឡេង នៅក្នុងតារាងឧបសម្ព័ន្ធ ៦ កម្រិតកំណត់ស្តង់ដារសំឡេងអតិបរិមា ដែលអនុញ្ញាតនៅតំបន់សារធារណៈ និងតំបន់លំនៅឋាន (dB(A))។
សំបុកត្រចៀកកាំ ត្រូវបានគេស្គាល់ថាជាផលិតផលធម្មជាតិដ៏មានតម្លៃ ដែលអាចកែច្នៃជាអាហារបំប៉នសុខភាព និងភេសជ្ជៈប៉ូវកម្លាំង។ ជាទូទៅ សំបុកត្រចៀកកាំត្រូវបានយកមកលាងសម្អាត និងចម្អិនជាស៊ុប ឬចាហួយ ដើម្បីទទួលទាន។
ផលិតផលនេះមានផ្ទុកនូវសារធាតុចិញ្ចឹមសំខាន់ៗជាច្រើនដូចជា ប្រូតេអ៊ីន អាស៊ីតអាមីណូ និងសារធាតុរ៉ែ ដែលជួយពង្រឹងប្រព័ន្ធភាពស៊ាំ បំប៉នស្បែក និងសុខភាពទូទៅ។ ក្រៅពីនេះ សំបុកត្រចៀកកាំក៏អាចយកទៅកែច្នៃជាផលិតផលផ្សេងៗទៀតដូចជា គ្រឿងសម្អាង និងឱសថបុរាណផងដែរ។ បច្ចុប្បន្ន កម្ពុជាកំពុងមានសក្ដានុពលក្នុងការនាំចេញសំបុកត្រចៀកកាំទៅកាន់ទីផ្សារអន្តរជាតិ ជាពិសេសប្រទេសចិន ដែលជាទីផ្សារដ៏ធំមួយសម្រាប់ផលិតផលនេះ។ កាលពីថ្ងៃទី២០ ខែកក្កដា ឆ្នាំ២០២៦កន្លងទៅ អគ្គរដ្ឋបាលគយចិន បានសម្រេចអនុញ្ញាតជាផ្លូវការឱ្យក្រុមហ៊ុន Best Life Product Co., Ltd. របស់កម្ពុជា អាចនាំចេញផលិតផល «សំបុកត្រចៀកកាំ» ទៅកាន់ទីផ្សារប្រទេសចិន ដែលក្រុមហ៊ុនខ្មែរដំបូងគេបង្អស់ ទទួលបានការអនុញ្ញាតជាផ្លូវការពីគយចិន បន្ទាប់ពីចំណាយពេលជាច្រើនឆ្នាំ ក្នុងការពង្រឹងគុណភាព និងចរចានាំចេញ។
*អត្ថប្រយោជន៍នៃទឹកត្រចៀកកាំ
ទឹកត្រចៀកកាំ ប្រើប្រាស់បានល្អបំផុតនៅពេលពោះទទេ។ ក្នុងវេជ្ជសាស្ត្របុរាណចិន, ទឹកត្រចៀកកាំត្រូវបានចាត់ថ្នាក់ជាអាហារប៉ូវកំលាំងមួយ។ ដូច្នេះហើយទឹកត្រចៀកកាំ គួរតែត្រូវបានប្រើប្រាស់មុនពេលទទួលទានអាហារដើម្បីឱ្យរាងកាយ ស្រូបយកសារធាតុចិញ្ចឹមចេញពីទឹកត្រចៀកកាំបានល្អប្រសើរ ។
សំបុកត្រចៀកកាំដែលមានព័ណ៌រាងក្រហម មិនមែនមកពីឈាមរបស់សត្វត្រចៀកកាំទេ។ ផ្ទុយទៅវិញ បើយោងតាមជំនឿ និងការពេញនិយម សំបុកត្រចៀកកាំដែលមានព័ណ៌រាងក្រហមនេះ គឺដោយសារការស្រូបយកសារធាតុរ៉ែ និងអុកស៊ីតកម្មពីបរិយាកាស។
បុរសទទួលទានទឹកត្រចៀកកាំដើម្បីបង្កើនប្រព័ន្ធភាពស៊ាំក្នុងរាង្គកាយ។ ទឹកត្រចៀកកាំមានជាតិប្រូតេអ៊ីន (glycoprotein) ខ្ពស់ មានកត្តាបង្កើនរាង្គកាយ និងជាឃ្លាំងថាមពលធម្មជាតិ ដែលជួយជំរុញប្រព័ន្ធការពាររាងកាយខ្សោយអោយខ្លាំងបាន។
តាមប្រពៃណីបុរាណ ទឹកត្រចៀកកាំ ត្រូវបានគេប្រើជាអាហារជួយបង្កើន និងថែរក្សាសម្រស់។ ទឹកត្រចៀកកាំ មានភាពល្បីល្បាញក្នុងការជួយរក្សាភាពយុវវ័យ និងការលើកកំពស់ព័ណ៌សម្បុរស្បែក។ តាមការសិក្សាសម័យទំនើបបានបង្ហាញថា ទឹកត្រចៀកកាំគឺសម្បូរទៅដោយកត្តាបង្កើនការលូតលាស់ (epidermal)។ សារធាតុនេះគឺមានសារៈប្រយោជន៍សម្រាប់ស្បែក និងការជួសជុលជាលិកា។
ទឹកត្រចៀកកាំត្រូវបានគេជឿថា មានសារជាតុជួយបង្កើនល្បឿននៃការជាសះស្បើយឡើងវិញ។ នៅពេលដែល គេប្រើប្រាស់ទឹកត្រចៀកកាំក្នុងកម្រិតមធ្យម វាជាទម្រង់តែមួយគត់ដែល ជួយការពារការរំលាយ នៃប្រូតេអ៊ីន និងសារជាតិចិញ្ចឹម ដែលអាចជួយព្យាបាលជំងឺរ៉ាំរ៉ៃ អោយឆាប់ជាសះស្បើយឡើងវិញ។ ជាពិសេសជាងនេះទៅទៀត នៅក្នុងទឹកត្រចៀកកាំ អាចជួយព្យាបាលជំងឺផ្លូវដង្ហើម ដូចជាជំងឺហឺត ឬក្អករ៉ាំរ៉ៃបានទៀតផង។
សម្រាប់មនុស្សមានវ័យចំណាស់ ទទួលទានទឹកត្រចៀកកាំ ដើម្បីរក្សា និងលើកកំពស់សុខភាព។ ទឹកត្រចៀកកាំ ត្រូវបានគេប្រើជាប្រពៃណីដើម្បីជម្រះកំហាក និងស្លេសរាវ បន្ធូរបន្ថយការក្អកស្ងួតរ៉ាំរ៉ៃ និងបន្ថយការអស់កម្លាំង-លទ្ធផលទាំងអស់នេះ ត្រូវបានគេទទួលបានពី មនុស្សចាស់ជាច្រើន ដែលបានទទួលទានទឹកត្រចៀកកាំ។ ទឹកត្រចៀកកាំ អាចត្រូវបានប្រើដើម្បីជំរុញអោយមានចំណង់អាហារ ដែលបង្កើនការរំលាយអាហារ និងជំរុញចលនាពោះវៀន។
ទឹកត្រចៀកកាំ គឺជាអាហារបំប៉នដ៏ល្អបំផុតសម្រាប់ ការលូតលាស់របស់កុមារ។ ពីទស្សនៈជីវសាស្រ្ត, ទឹកត្រចៀកកាំ មានប្រូតេអ៊ីនអាស៊ីដអាមីណូ និងសារធាតុរ៉ែ ដែលមានសារៈសំខាន់សម្រាប់ការអភិវឌ្ឍប្រកបដោយសុខភាពល្អ។ តាមវេជ្ជសាស្ត្របុរាណចិន, ការទទួលទានទឹកត្រចៀកកាំជាប្រចាំ ជួយបង្ការជំងឺផ្តាសាយ និង ផ្តាសាយធំបាន។ តាមរយៈការធ្វើឱ្យប្រសើរឡើងមុខងារនៃសួត និងតម្រងនោម, ទឹកត្រចៀកកាំជួយបង្កើនប្រព័ន្ធភាពស៊ាំរបស់រាងកាយ និងបង្កើនភាពធន់ទៅនឹងកត្តាបរិស្ថានខាងក្រៅបាន៕
