(កំពង់ធំ)៖ លោក សាយ គឹមឡម អភិបាលស្រុកស្ទោង បានអំពាវនាវដល់ប្រជាពលរដ្ឋក្នុងមូលដ្ឋាន ឲ្យមានជំនឿជាក់ខ្ពស់លើលោក ចាន់ ស៊ីណាត ប្រធានក្រុមការងារចុះមូលដ្ឋានឃុំចំណាលើ ដែលតែងតែយកចិត្តទុកដាក់ខ្ពស់ចំពោះសុខទុក្ខ និងការអភិវឌ្ឍក្នុងឃុំ។

ការថ្លែងនេះធ្វើឡើងក្នុងឱកាសដែលលោកបានដឹកនាំក្រុមការងារចុះជួបសំណេះសំណាល សួរសុខទុក្ខ និងនាំយកអំណោយទៅចែកជូនពុកម៉ែ បងប្អូនប្រជាពលរដ្ឋងាយរងហានិភ័យ និងមានពិការភាព ចំនួន ២៣ គ្រួសារ នៅក្នុងភូមិធ្លក ឃុំចំណាលើ ស្រុកស្ទោង ខេត្តកំពង់ធំ កាលពីថ្ងៃទី២១ ខែកក្កដា ឆ្នាំ២០២៦។

ក្នុងដំណើរចុះសួរសុខទុក្ខនេះ លោក សាយ គឹមឡម ក៏បានពាំនាំនូវការផ្ដាំផ្ញើសួរសុខទុក្ខពីសំណាក់លោក ចាន់ ស៊ីណាត ដែលតែងតែគិតគូរពីសុខុមាលភាពរបស់ប្រជាពលរដ្ឋ។
លោកអភិបាលស្រុកបានគូសបញ្ជាក់ពីសមិទ្ធផលជាច្រើនដែលក្រុមការងារបានកសាងឡើង រួមមានផ្លូវបេតុងប្រវែងជាង ១០ គីឡូម៉ែត្រ តភ្ជាប់ពីឃុំចំណាលើ រហូតដល់ព្រំប្រទល់ឃុំដំរីស្លាប់ ដែលបានជួយសម្រួលដល់ការធ្វើដំណើររបស់បងប្អូនប្រជាពលរដ្ឋឲ្យកាន់តែងាយស្រួល ឆាប់រហ័ស និងមានសុវត្ថិភាព។

លោកបានលើកទឹកចិត្តឲ្យបងប្អូនខិតខំប្រកបរបរចិញ្ចឹមជីវិត ថែរក្សាសុខភាព និងរួមគ្នាថែរក្សាសុខសន្តិភាព ស្ថិរភាព ក៏ដូចជាសមិទ្ធផលនានាដែលក្រុមការងារបានកសាងជូន ដើម្បីជាប្រយោជន៍រួម និងចូលរួមកសាងអភិវឌ្ឍមូលដ្ឋានឲ្យកាន់តែរីកចម្រើន។

ក្នុងនាមប្រជាពលរដ្ឋឃុំចំណាលើទាំងមូល ក៏បានថ្លែងអំណរគុណយ៉ាងជ្រាលជ្រៅចំពោះលោក ចាន់ ស៊ីណាត និងក្រុមការងារ ដែលបានសម្របសម្រួលនាំទឹកមកស្រោចស្រពសង្គ្រោះស្រែស្រូវដែលជួបបញ្ហារាំងស្ងួត ឲ្យបានស្រស់បំព្រងឡើងវិញ។ អំណោយដែលបានចែកជូនរួមមាន អង្ករ សារុង សម្លៀកបំពាក់ គ្រឿងឧបភោគបរិភោគ និងថវិកាមួយចំនួន ដើម្បីរួមចំណែកសម្រាលបន្ទុកជីវភាពរបស់បងប្អូនប្រជាពលរដ្ឋ៕