អតីតនគរបាលនាយកដ្ឋានប្រឆាំងភេរវកម្ម សុំកិច្ចអន្ដរាគមន៍ពីក្រសួងយុត្តិធម៌ ដើម្បីឲ្យតុលាការពិចារណារឿងក្ដីរបស់ខ្លួន ពាក់ព័ន្ធកំហុសបច្ចេកទេសនៃការវាស់វែងប្លង់
22-07-2026 15:10
(ភ្នំពេញ)៖ លោក យែម វណ្ណា អតីតនគរបាល នៃនាយកដ្ឋានប្រឆាំងភេរវកម្ម និងឧក្រិដ្ឋកម្មឆ្លងដែន អគ្គស្នងការដ្ឋាននគរបាលជាតិ បានដាក់លិខិតស្នើសុំអន្ដរាគមន៍ពីឧបនាយករដ្ឋមន្ដ្រី កើត រិទ្ធ រដ្ឋមន្ដ្រីក្រសួងយុត្តិធម៌ លើសំណុំរឿងអនុវត្តដោយបង្ខំរបស់អាជ្ញាសាលាលេខ២០ ចុះថ្ងៃទី២៧ ខែមីនា ឆ្នាំ២០២៦ របស់សាលាដំបូងរាជធានីភ្នំពេញ និងស្នើសុំបង្អង់នីតិវិធី នៃការអនុវត្តដោយបង្ខំ លើដីទំហំ១៧ម៉ែត្រការ៉េ ស្ថិតនៅផ្លូវលេខ៣បេតេ ភូមិចំរើនផល១ សង្កាត់បឹងទំពុន ខណ្ឌមានជ័យ រាជធានីភ្នំពេញ។
ក្នុងលិខិតស្នើសុំកិច្ចអន្ដរាគមន៍ លោក យែម វណ្ណា បានអះអាងថា ខ្លួនបានទិញផ្ទះ១ល្វែងសាងសង់ពីជញ្ជាំងថ្ម ចាក់បេតុងប្លង់សេ ប្រក់ដំបូលស័ង្កសីនៅជាន់ទី១ ដោយមានរបងថ្មព័ទ្ធជុំវិញរួចជាស្រេច ពីម្ចាស់ដីដើមឈ្មោះ ម៉ាង ផល្លា និងប្រពន្ធឈ្មោះ ជា ចាន់រស្មី នៅឆ្នាំ២០១១ ដោយមានព្រំប្រទល់ខាងជើង៖ មានរបងថ្មផ្នែកខាងមុខបន្ទាប់តួជញ្ជាំងផ្ទះល្វែង និងរបងថ្មចំពោះព្រំប្រទល់ដីខាងជើង ផ្នែកខាងក្រោយ និងបានកាន់កាប់គ្រប់គ្រង ប្រើប្រាស់ អាស្រ័យផលជាក់ស្តែង រហូតមកដោយផ្អែកលើវិញ្ញាបនប័ត្រសំគាល់ម្ចាស់អចលនវត្ថុលេខ ១២០៦០២០១-១២១៧ ចុះថ្ងៃទី ២១ខែកញ្ញា ឆ្នាំ២០១០ ដោយមិនមានទំនាស់ទេ និងមិនមានសាងសង់សំណង់អ្វីបនែ្ថមនោះដែរ។
ស្រាប់តែនៅឆ្នាំ២០២០ ម្ចាស់បំណុល នៃការអនុវត្តឈ្មោះ ទេព វណ្ណៈ បានប្តឹងទាមទារឲ្យប្រគល់ដីទំហំ ១៧ម៉ែត្រការ៉េ ត្រង់ចំណុចជណ្តើរឡើងរួម និងវេរ៉ង់ដាខាងឆ្វេងផ្ទះជាន់ទី១ ជាកម្មសិទ្ធិរបស់លោក (បានសាងសង់តាំងពីឆ្នាំ២០០៦ ដោយម្ចាស់ដីផ្ទះមុន) ឲ្យប្រគល់ទៅម្ចាស់បំណុលនៃអនុវត្ត ដោយអះអាងថា តាមនិយាមការព្រំដី ដែលបានកំណត់ក្នុងវិញ្ញាបនប័ត្រសំគាល់ម្ចាស់អចលនវត្ថុលេខ ១២០៦០២០១-១២១៨ ចុះថ្ងៃទី ២១ ខែកញ្ញា ឆ្នាំ២០១០ របស់ម្ចាស់បំណុលនៃការអនុវត្តឈ្មោះ ទេព វណ្ណៈ គឺដីជណ្តើរឡើងវ៉េរ៉ងដាខាងធ្វេង ស្ថិតក្នុងប័ណ្ណកម្មសិទ្ធិរបស់ខ្លួន (ក្រោយពីឈ្មោះ ទេព វណ្ណៈ បានដាក់ពាក្សសុំស្វែងរកព្រំដី និងបានផ្ទៀងផ្ទាត់ទំហំក្រឡាផ្ទៃខ្លួនកាន់កាប់ជាក់ស្តែង មានទំហំតូចជាងក្រឡាផ្ទៃដី ដែលមានក្នុងប័ណ្ណរបស់ខ្លួន)។
ការកំណត់និយាមការនៃប័ណ្ណ ដែលមានក្បាលដីលេខ ១២១៨ របស់ម្ចាស់បំណុលនៃការអនុវត្ត តាមទិន្នន័យក្នុងប្លង់សុរិយោដីដែលមានស្រាប់របស់អនុវិស័យរដ្ឋបាលដីធ្លី (LMAP) ដែលបានកសាង (ចុះបញ្ជី) នាឆ្នាំ២០០៩ និងទទួលបានប័ណ្ណឆ្នាំនៅចុងឆ្នាំ២០១០ គឺខុសពីកាន់កាប់ជាក់ស្តែង ដែលមានស្រាប់រវាងកូនបំណុលនៃការអនុវត្ត និងម្ចាស់បំណុលនៃការអនុវត្តដែល សំណង់បានសាងរួចហើយជាក់ស្តែងនៅឆ្នាំ២០០៦យ៉ាងធ្ងន់ធ្ងរ។
និយាមការព្រំប្រទល់ដីខាងជើង ដោយផ្អែកលើប័ណ្ណដែលបានកសាងឡើងដោយមន្រ្តីសុរិយោដីនេះ បានលេបយកមិនត្រឹមតែដីជណ្តើរឡើង វេរ៉ង់ដាខាងឆ្វេងផ្ទះ តែបានលេបយកអស់តួជញ្ជាំងផ្ទះល្វែងសង់ពីថ្មបេតុងអាមេ ដែលមានស្រាប់អស់មួយចំហៀង ពីជាន់ផ្ទាល់ដីដល់ជាន់ទី១ ប្រវែង២០ម៉ែត្រជាង (ប្រវែងជាក់ស្តែង) បើទោះជាផ្ទះបានសាងសង់នៅឆ្នាំ២០០៦ មុនការចុះបញ្ជីលក្ខណៈជាប្រព័ន្ធទៅទៀតក្តី។
ការណ៍នេះគឺជា «ការចេញប័ណ្ណកម្មសិទ្ធិ រំកិលនិយាមការខុសពីការកាន់កាប់ស្តែង» (ផ្ទះល្វែងសាងសង់មុនការកសាងប័ណ្ណកម្មសិទ្ធិ តែចុងក្រោយ បែជាផ្ទះមានទីតាំងនៅក្រៅប័ណ្ណ កម្មសិទ្ធិរបស់ខ្លួនទៅវិញ និងក្លាយជាកម្មសិទ្ធិអ្នកផ្សេង និងផ្តល់សិទ្ធិឲ្យអ្នកផ្សេងប្តឹងទាមទារឲ្យុម្ចាស់ផ្ទះរុះរើសំណង់ផ្ទះខ្លួនឯង ដែលមានតាំងដើមចោល ហើយប្រគល់ដីឲ្យគេទៀត) ដែលប៉ះពាល់ដល់កម្មសិទ្ធិដីធ្លីផ្ទះសម្បែងជាក់ស្តែង ស្របច្បាប់របស់កូនបំណុលយ៉ាងធ្ងន់ធ្ងរ៕
