(កណ្តាល)៖ ហេតុការណ៍គ្រោះថ្នាក់ចរាចរណ៍ បានកើតឡើងកាលពីថ្ងៃទី២១ ខែកក្កដា ឆ្នាំ២០២៦ នៅលើស្ពានព្រែកតាមាក់ ស្ថិតក្នុងភូមិព្រែកតាមាក់ ឃុំព្រែកតាមាក់ ស្រុកខ្សាច់កណ្ដាល ខេត្តកណ្ដាល បណ្ដាលឲ្យមនុស្សចំនួន ៣នាក់បានបាត់បង់ជីវិត និង៣នាក់ផ្សេងទៀតរងរបួសធ្ងន់។ ករណីនេះបង្កឡើងដោយរថយន្តធុនធ្ងន់មួយគ្រឿងបានដាច់ហ្វ្រាំង ខណៈកំពុងចុះពីលើស្ពាន។

លោកវរសេនីយ៍ឯក ម៉ែន សុខឃឿន អធិការនគរបាលស្រុកខ្សាច់កណ្ដាល បានឲ្យដឹងថា រថយន្តបង្កម៉ាក Hyundai ប្រភេទដឹកទំនិញធំ ពាក់ស្លាកលេខ ភ្នំពេញ3យ-1608 បានធ្វើដំណើរពីលិចទៅកើត។ លុះមកដល់ចំណុចការដ្ឋានជួសជុលផ្លូវ រថយន្តនេះបានដាច់ហ្វ្រាំង ហើយជ្រុលទៅបុកគៀររថយន្តម៉ាក Sangyong ពាក់ស្លាកលេខ ភ្នំពេញ2V-0284 ដែលបើកបរស្របគ្នា បន្ទាប់មកក៏បន្តបុកម៉ូតូចំនួន ៣គ្រឿងទៀតដែលកំពុងបើកបញ្ច្រាសទិសគ្នា។

គ្រោះថ្នាក់នេះបានបណ្ដាលឲ្យជនរងគ្រោះចំនួន ៣នាក់បានស្លាប់បាត់បង់ជីវិតនៅនឹងកន្លែងកើតហេតុ រួមមាន៖ ឈ្មោះ ផុន ផេន ភេទប្រុស អាយុ ៤៨ឆ្នាំ, ឈ្មោះ ភី ពៅ ភេទស្រី អាយុ ៣៩ឆ្នាំ និងឈ្មោះ លី សុភ័ក្រ ភេទប្រុស អាយុ ៣៥ឆ្នាំ។ ចំណែកឯជនរងគ្រោះ ៣នាក់ផ្សេងទៀតបានរងរបួសធ្ងន់។

ក្រោយកើតហេតុ កម្លាំងជំនាញបានចុះទៅដល់កន្លែងកើតហេតុភ្លាមៗ ដើម្បីអន្តរាគមន៍ និងបានឃាត់ខ្លួនអ្នកបើកបររថយន្ត Sangyong ឈ្មោះ ឈន ប៊ុនឈឿន ភេទប្រុស អាយុ ៤៨ឆ្នាំ ដើម្បីធ្វើតេស្តជាតិអាល់កុល និងសារធាតុញៀន ដែលលទ្ធផលបង្ហាញថាអវិជ្ជមាន។

បច្ចុប្បន្ន សមត្ថកិច្ចបានប្រគល់សពជនរងគ្រោះជូនក្រុមគ្រួសារដើម្បីយកទៅធ្វើបុណ្យតាមប្រពៃណី និងបានដកហូតមធ្យោបាយពាក់ព័ន្ធទាំងអស់មករក្សាទុកនៅអធិការដ្ឋាននគរបាលស្រុកខ្សាច់កណ្ដាល ដើម្បីបន្តនីតិវិធីដោះស្រាយតាមផ្លូវច្បាប់។

ហេតុការណ៍នេះជាការក្រើនរំលឹកដល់អ្នកបើកបរទាំងអស់ឲ្យបង្កើនការប្រុងប្រយ័ត្នខ្ពស់ និងគោរពច្បាប់ចរាចរណ៍ ដើម្បីជៀសវាងគ្រោះថ្នាក់ជាយថាហេតុ៕