(តាកែវ)៖ លោក វ៉ី សំណាង អភិបាលខេត្តតាកែវ បានជម្រុញ និងលើកទឹកចិត្តដល់គរុសិស្សទាំងអស់ ដែលនឹងក្លាយជាគ្រូបង្រៀននៅសាលាបឋមសិក្សា នាពេលខាងមុខ ឱ្យប្រឹងប្រែងបណ្ដុះបណ្ដាលចំណេះដឹងដល់ សិស្សឱ្យរៀនពូកែតាំងពីតូចទៅ ព្រមទាំងត្រូវបណ្ដុះស្មារតីស្នេហាជាតិដល់កុមារតាំងពីថ្នាក់បឋមសិក្សា។

ការជំរុញនេះបានធ្វើឡើងនៅក្នុងឱកាសអញ្ជើញចូលរួមពិធីបិទវគ្គបណ្ដុះបណ្ដាលគរុសិស្សកម្រិតបឋមសិក្សា ១២+២ ជំនាន់ទី៤០ នៅសាលាគរុកោសល្យ និងវិក្រិតការខេត្តតាកែវ កាលពីរសៀលថ្ងៃទី២១ ខែកក្កដា ឆ្នាំ២០២៦។

អភិបាលខេត្តបានសង្កត់ធ្ងន់ថា តួនាទីរបស់គ្រូបង្រៀនមិនត្រឹមតែបង្រៀនអក្សរ ឬលេខប៉ុណ្ណោះទេ ប៉ុន្តែត្រូវបណ្តុះគុណធម៌ សីលធម៌ វិន័យ ស្មារតីស្នេហាជាតិ និងការរស់នៅល្អដល់កុមារកម្ពុជាផងដែរ ស្របតាមពាក្យស្លោកខ្មែរ «ដំដែកទាន់នៅក្ដៅ អប់រំកូនចៅទាន់នៅក្មេង»។

ជាមួយគ្នានេះ លោក វ៉ី សំណាង ក៏បានផ្តាំផ្ញើដល់គ្រូបង្រៀនថ្មីទាំងអស់ ត្រូវតែប្រកាន់ខ្ជាប់នូវក្រមសីលធម៌ និងវិជ្ជាជីវៈគ្រូបង្រៀន ដោយធ្វើជាគំរូល្អដល់សិស្ស និងសហគមន៍ ស្រឡាញ់សិស្ស ស្រឡាញ់វិជ្ជាជីវៈ និងបំពេញភារកិច្ចដោយការទទួលខុសត្រូវខ្ពស់។ លើសពីនេះ ត្រូវរួមចំណែកអនុវត្តចលនាសាលារៀនគំរូ និងការកែលម្អគុណភាពសិក្សា ស្របតាមគោលនយោបាយរបស់ក្រសួងអប់រំ យុវជន និងកីឡា ដើម្បីរួមចំណែកកសាងធនធានមនុស្សប្រកបដោយគុណភាពសម្រាប់ប្រទេសជាតិ៕