(សៀមរាប)៖ សាខាកាកបាទក្រហមកម្ពុជា ខេត្តសៀមរាប សហការជាមួយអនុសាខាស្រុកពួក និងមន្ទីរអប់រំ យុវជន និងកីឡាខេត្ត នៅថ្ងៃទី២១ ខែកក្កដា ឆ្នាំ២០២៦ បានបើកវគ្គបណ្ដុះបណ្ដាលមូលដ្ឋាន និងបំពាក់កន្សែងជូនយុវជនកាកបាទក្រហមកម្ពុជា ចំនួន ៨៤នាក់ មកពីវិទ្យាល័យចំណេះទូទៅ និងបច្ចេកទេសពួក វិទ្យាល័យអធិបតី និងវិទ្យាល័យរើល ក្រោមអវត្តមានរបស់លោក គុជ លីណា អនុប្រធានអចិន្ត្រៃយ៍គណៈកម្មាធិការសាខា នៅសាលប្រជុំសាលាស្រុកពួក។

ក្នុងឱកាសនោះ លោក គុជ លីណា បាននាំនូវការផ្ដាំផ្ញើសួរសុខទុក្ខ ពីសំណាក់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ក៏ដូចជាលោក ប្រាក់ សោភ័ណ ប្រធានគណៈកម្មាធិការសាខាកាកបាទក្រហមកម្ពុជាខេត្តសៀមរាប ដោយក្តីនឹករលឹកជូនចំពោះបងប្អូនទាំងអស់។

លោកបន្តថា ក្មួយៗសមាជិកយុវជនកាកបាទក្រហម សុទ្ធតែបានចូលរួមដោយស្ម័គ្រចិត្តរាល់សកម្មភាពក្នុងគ្រឹះស្ថានសិក្សា សហគមន៍ ក៏ដូចជាសកម្មភាពមនុស្សធម៌ ទាំងការចូលរួមឆ្លើយតបគ្រោះមហន្តរាយ អប់រំសុខភាពការពារជំងឺឆ្លង គ្រោះថ្នាក់នៃគ្រឿងញៀន គ្រោះថ្នាក់ចរាចរណ៍ និងសម្អាតបរិស្ថានដែលជាប្រយោជន៍ដល់សង្គម។

លោកបានបន្តថា ដើម្បីត្រៀមខ្លួនអនុវត្តតួនាទីឱ្យបានល្អក្នុងនាមជាយុវជនកាកបាទក្រហមកម្ពុជា ត្រូវដឹងពីភារកិច្ចរបស់ខ្លួន ដោយប្អូនទាំងអស់ជាតំណាងឱ្យយុវជនកាកបាទក្រហមកម្ពុជាក្នុងស្រទាប់យុវវ័យ, ជាអ្នកបន្តវេនដ៏សកម្មក្នុងសកម្មភាពមនុស្សធម៌របស់កាកបាទក្រហមកម្ពុជា។

លោកបន្តទៀតថា ត្រូវគោរពវិន័យសាលា ខិតខំរៀនសូត្រឱ្យបានពូកែ និងធ្វើជាគំរូល្អក្នុងស្រទាប់យុវវ័យ, ផ្សព្វផ្សាយពីគោលការណ៍គ្រឹះនៃចលនាអន្តរជាតិ និងសកម្មភាពមនុស្សធម៌ទាំងក្នុងសាលានិងសហគមន៍, បន្តចូលរួមអប់រំសុខភាពអនាម័យ ការបង្ការជំងឺឆ្លង និងគ្រោះថ្នាក់នៃគ្រឿងញៀន, ជួយដល់មិត្តយុវសិស្សក្រីក្រ រៀនខ្សោយ និងលើកទឹកចិត្តមិត្តយុវសិស្សពិការ។

លោកបន្ថែមថា យុវជនត្រូវធ្វើជាគំរូល្អក្នុងការគោរពច្បាប់ចរាចរណ៍ ដើម្បីរួមចំណែកកាត់បន្ថយគ្រោះថ្នាក់ និងពិការភាព និងត្រូវមានទំនាក់ទំនងល្អស្មើភាព និងសហការចែករំលែកបទពិសោធន៍ជាមួយយុវកាយរិទ្ធិជាតិកម្ពុជា សហភាពសហព័ន្ធយុវជនកម្ពុជា ក៏ដូចជាយុវជនកាកបាទក្រហមនៃបណ្តាប្រទេសជាមិត្ត។ ជាពិសេសចូលរួមប្រជុំក្លឹបយុវជន និងរាយការណ៍សកម្មភាពទៀងទាត់ជូនលោកគ្រូ-អ្នកគ្រូទីប្រឹក្សា និងនាយក-នាយិកាសាលា។

លោក គុជ លីណា ក៏បានណែនាំដល់យុវជនស្ម័គ្រចិត្តទាំងអស់ ឱ្យខិតខំរៀនសូត្រឆ្ពោះទៅរកភាពជាសិស្សពូកែ ចេះប្រើប្រាស់ទូរស័ព្ទដៃប្រកបដោយការយល់ដឹង និងមានប្រយោជន៍ ព្រមទាំងប្រកាន់ខ្ជាប់នូវអាកប្បកិរិយាសមរម្យ។

ជាមួយនេះដែរ លោកក៏បានសំណូមពរដល់លោកនាយក លោកនាយករង និងលោកគ្រូ-អ្នកគ្រូតាមវិទ្យាល័យទាំងអស់ បន្តជួយអប់រំ និងបង្កលក្ខណៈងាយស្រួលដល់ប្អូនៗយុវជនទើបបំពាក់កន្សែងថ្មី ឱ្យបានចូលរួមបំពេញការងារមនុស្សធម៌ទាំងក្នុងសាលារៀន សហគមន៍ និងសង្គមជាតិឱ្យកាន់តែផុសផុលបន្ថែមទៀត៕