អង្គការសង្គមស៊ីវិលក្នុងខេត្តរតនគិរី បេជ្ញាបន្តពង្រឹងកិច្ចសហការជិតស្និទ្ធជាមួយអាជ្ញាធរមូលដ្ឋានក្នុងការលើកកម្ពស់ការអភិវឌ្ឍសេដ្ឋកិច្ចសង្គមនិងការកសាងសង្គមឌីជីថលនៅកម្ពុជា
22-07-2026 16:17
(រតនគិរី)៖ នៅព្រឹកថ្ងៃទី២២ ខែកក្កដា ឆ្នាំ២០២៦ នៅសណ្ឋាគារ រតនៈលីណា ក្រុងបានលុង វេទិកាសម្ព័ន្ធសង្គមស៊ីវិល (វ.ស.ស.) នៃទីស្តីការគណៈរដ្ឋមន្ត្រី បានសហការជាមួយរដ្ឋបាលខេត្តរតនគិរី រៀបចំវេទិកាសន្ទនាក្រោមប្រធានបទ «ការពង្រឹងសមត្ថភាពអង្គការសង្គមស៊ីវិលក្នុងយុគសម័យឌីជីថល» ដែលបានប្រព្រឹត្តទៅក្រោមអធិបតីភាពលោក ប៉ៃ សំបូរ អគ្គលេខាធិការ វ.ស.ស. តំណាងលោក កឹមរ័ត្ន វិសិដ្ឋ រដ្ឋលេខាធិការទីស្តីការគណៈរដ្ឋមន្រ្តី និងជាប្រធានក្រុមប្រឹក្សាភិបាល វ.ស.ស. និងលោក វ៉ាន់ សោភា អភិបាលរងនៃគណៈអភិបាលខេត្តរតនគិរី តំណាងលោក ញ៉ែម សំអឿន អភិបាលនៃគណៈអភិបាលខេត្តរតនគិរី ដោយមានតំណាងមកពីអង្គការសង្គមស៊ីវិល រួមទាំងអាជ្ញាធរមូលដ្ឋាន និងមន្ទីរជំនាញក្នុងខេត្តរតនគិរី បានចូលរួមយ៉ាងច្រើនកុះករ។
ថ្លែងក្នុងអង្គវេទិកានាព្រឹកនេះលោក ប៉ៃ សំបូរ អគ្គលេខាធិការ វ.ស.ស. បានថ្លែងថា វ.ស.ស. នៅតែបន្តលើកកម្ពស់វប្បធម៌សន្ទនាក្នុងគ្រួសារនៃអង្គការសង្គមស៊ីវិល តាមរយៈការរៀបចំវេទិកាសន្ទនាដូចដែលបានរៀបចំឡើងនាពេលនេះ ក្នុងគោលបំណងថែរក្សាសុខសន្តិភាពនិងសុខដុមនីយកម្មសង្គមស៊ីវិល ព្រមទាំងពង្រឹងកិច្ចសហប្រតិបត្តិការល្អរវាងគ្រប់តួអង្គពាក់ព័ន្ធ ដើម្បីជំរុញការអភិវឌ្ឍលើគ្រប់វិស័យ ស្របតាមយុទ្ធសាស្រ្តអភិវឌ្ឍន៍និងគោលនយោបាយរបស់រាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជា។
លោកបានលើកទឹកចិត្តឱ្យអង្គការសង្គមស៊ីវិលបន្តចាប់យកបច្ចេកវិទ្យាថ្មីៗ សម្រាប់ការអនុវត្តការងាររបស់ខ្លួនឱ្យកាន់តែមានប្រសិទ្ធភាព ដើម្បីឆ្លើយតបទៅនឹងការវិវត្តយ៉ាងលឿននៃបច្ចេកវិទ្យាក្នុងយុគសម័យឌីជីថល និងកិច្ចខិតខំប្រឹងប្រែងរបស់រាជរដ្ឋាភិបាលក្នុងការជំរុញបរិវត្តកម្មឌីជីថល។
ក្នុងឱកាសនេះដែរលោក វ៉ាន់ សោភា បានវាយតម្លៃខ្ពស់ចំពោះកិច្ចសហការយ៉ាងល្អនិងជិតស្និទ្ធរវាងអាជ្ញាធរមូលដ្ឋាននិងអង្គការសង្គមស៊ីវិលទាំងអស់ក្នុងខេត្តរតនគិរី ដែលបានចូលរួមចំណែកយ៉ាងសកម្មក្នុងការអភិវឌ្ឍលើគ្រប់វិស័យ ក៏ដូចជាលើកកម្ពស់ជីវភាពនិងសុខុមាលភាពរបស់ប្រជាពលរដ្ឋនៅទូទាំងខេត្ត។
លោកក៏បានថ្លែងអំណរគុណចំពោះ វ.ស.ស. ដែលតែងតែបានរៀបចំវេទិកាសន្ទនាយ៉ាងទៀងទាត់ សម្រាប់ការផ្លាស់ប្តូរបទពិសោធ ចែករំលែកចំណេះដឹង និងជជែកពិភាក្សាដោយត្រង់ទៅត្រង់មកក្នុងក្រុមគ្រួសារសង្គមស៊ីវិល ដើម្បីរួមគ្នាដោះស្រាយបញ្ហាប្រឈមនានាដែលកើតមានក្នុងមូលដ្ឋាន។ លោកក៏បានលើកទឹកចិត្តឱ្យអង្គការសង្គមស៊ីវិលបន្តចូលរួមលើកកម្ពស់ការអភិវឌ្ឍក្នុងថ្នាក់មូលដ្ឋាន ជាពិសេសជំរុញការអភិវឌ្ឍវិស័យកសិកម្ម កសិ-ឧស្សាហកម្ម និងទេសចរណ៍ ដែលជាវិស័យអាទិភាពសម្រាប់ខេត្តភូមិភាគឦសាននេះ។
ក្នុងអង្គវេទិកាសន្ទនានេះដែរ វ.ស.ស. បានរៀបចំឱ្យមាននូវបទបង្ហាញសម្រាប់ចែករំលែកចំណេះដឹងដល់អង្គការសង្គមស៊ីវិលនិងអាជ្ញាធរមូលដ្ឋានក្នុងខេត្តរតនគិរី លើប្រធានបទ «ការយល់ដឹងអំពីអក្ខរកម្មឌីជីថល និងសុវត្ថិភាពតាមប្រព័ន្ធបច្ចេកវិទ្យា» ក្នុងគោលបំណងផ្សព្វផ្សាយ និងលើកកម្ពស់ការយល់ដឹងអំពីគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ ដោយមានលោក ទ្រី វិទូ ប្រធានដេប៉ាតឺម៉ង់ពាណិជ្ជកម្មអេឡិចត្រូនិក នៃបណ្ឌិត្យសភាបច្ចេកវិទ្យាឌីជីថលកម្ពុជា បានចូលរួមជាវាគ្មិន។
តំណាងអង្គការសង្គមស៊ីវិលក្នុងខេត្តរតនគិរីដែលបានចូលរួមក្នុងអង្គវេទិកាសន្ទនានាព្រឹកនេះ បានបង្ហាញនូវការ ប្ដេជ្ញាចិត្តខ្ពស់ក្នុងការពង្រឹងកិច្ចសហការជិតស្និទ្ធជាមួយអាជ្ញាធរមូលដ្ឋាននិងគ្រប់តួអង្គពាក់ព័ន្ធ ដើម្បីរួមគ្នាអភិវឌ្ឍសេដ្ឋកិច្ចសង្គមមូលដ្ឋានឱ្យកាន់តែល្អប្រសើរថែមទៀត និងចូលរួមលើកកម្ពស់ការកសាងសង្គមឌីជីថលនៅកម្ពុជា តាមរយៈការចូលរួមជំរុញបរិវត្តកម្មឌីជីថលក្នុងសហគមន៍៕
