(ភ្នំពេញ)៖ ភាពក្រីក្រមិន​មែនជាឧបសគ្គក្នុងការសម្រេចក្ដីស្រមៃរបស់ខ្លួនឡើយ។ នេះបើយោងតាមលោក សួន សុកជា ជានិស្សិតឆ្នាំទី២ ជំនាញ Media នៃសាកលវិទ្យាល័យកម្ពុជា បាននិយាយថា កាលពីថ្ងៃទី១៥ ខែកក្កដា ឆ្នាំ២០២៦កន្លងទៅ។

លោក សួន សុកជា ថ្លែងថា សេដ្ឋកិច្ចគ្រួសារជារឿងសំខាន់ បើសិនជាគេជាកូនដែលកើតក្នុងគ្រួសារដែលមានជីវភាពធូរធាស្រាប់វាពុំសូវមានភាពលំបាកទេ ក៏ប៉ុន្តែសម្រាប់យើងដែលកើតក្នុងគ្រួសារដែលលំបាកក្ដី ក៏មិនស្រូវតូចចិត្តនិងទីកន្លែងដែលយើងកើតនោះដែរ ឬយកភាពលំបាកទាំងនោះជាឧបសគ្គក្នុងការបន្តការសិក្សានៅមហាវិទ្យាល័យ ដើម្បីសម្រេចក្ដីរបស់របស់ខ្លួននោះទេ។

និស្សិតជំនាញ Media បានលើកឡើងថា «ខ្ញុំកើតមកជាកូនពៅក្នុងគ្រួសារក៏ពិតមែន ប៉ុន្តែខ្ញុំពុំមានបងៗណាម្នាក់ នៅក្នុងគ្រួសារដែលចាំជួយទំនុកបម្រុងដល់ខ្ញុំឡើយ ហើយខ្ញុំក៏មិនបានយកចំណុចទាំងនេះជាការរាំងស្ទះ ដល់ការសិក្សា នៅមហាវិទ្យារបស់ខ្ញុំដែរ ទោះខ្ញុំពុំមាននាក់ចាំជួយជ្រោមជ្រែងផ្នែកថវិកាដូចគេក៏ពិតមែន ក៏ប៉ុន្តែគ្រួសាររបស់ខ្ញុំតែងតែលើកទឹកចិត្ត និងជួយជំរុញខ្ញុំក្នុងការបន្តការសិក្សាជានិច្ច»។

ចំណែក កញ្ញា សន កាណាន់ ជានិស្សិតផ្នែក Media នៅសាកលវិទ្យាល័យកម្ពុជា បានថ្លែងថា ការខ្វះខាតផ្នែកសេដ្ឋកិច្ចគ្រួសារមិនមែនជាបញ្ហាចម្បងដែលរារាំងដល់ការបន្តការសិក្សានៅសាកលវិទ្យាល័យរបស់យើងទេ​ ឲ្យតែយើងមានការតាំងចិត្ត តស៊ូព្យាយាម ជឿជាក់លើខ្លួនឯងជានិច្ច និងសម្លឹងទៅមើលគោលដៅដោយក្ដីសង្ឃឹម នោះមិនថាជួបឧបសគ្គប៉ុណ្ណាក៏យើងនៅតែអាចជម្នះវាបានគ្រប់យ៉ាង។

លោកស្រី ថា «ខ្ញុំបច្ចុប្បន្ននេះក៏មិនបានពឹងផ្អែកទាំងស្រុងទៅលើគ្រួសារដែរ ខ្ញុំបានឆ្លៀតពេលវេលាពីការសិក្សារៀនសូត្រដើម្បីធ្វើការងាររកប្រាក់ចំណូលបន្ថែមសម្រាប់ចាយវាយប្រចាំថ្ងៃដោយខ្លួនឯង បើទោះបីជាត្រូវលំបាក និងនឿយហត់បន្តិចក៏ដោយតែរាល់ពេលខ្ញុំសម្លឹងមើលទៅកាន់គោលដៅរបស់ខ្ញុំ វាធ្វើឲ្យខ្ញុំមានកម្លាំងចិត្តក្នុងការបន្តដំណើរបន្តទៀត»។

សម្រាប់និស្សិត សួន សុកជា, មូលហេតុដែលលោក តស៊ូព្យាយាមរស់នៅទីក្រុងភ្នំពេញ ដើម្បីបន្តការសិក្សាលើមុខជំនាញ Media​ ទាំងត្រូវជូបការលំបាកផ្នែកថវិកា គឺដោយសារតែតាំងពីក្មេងវ័យមក លោកមានចំណង់ចំណូល ចិត្តលើ ការថតរូប​ ថតវិដេអូ កាត់តវីដេអូ និងការសរសេរព័ត៌មាន ដូច្នេះលោកតែងតែមានក្ដីស្រមៃថា ថ្ងៃមួយលោកនឹងអាចធ្វើវាបានជោគជ័យ និងសម្រេចក្ដីប្រាថ្នារបស់ខ្លួន ស្រពពេលដែលបច្ចុប្បន្នបច្ចេកវិទ្យាឌីជីថល បានអភិវឌ្ឍយ៉ាងឆាប់រហ័សដែលធ្វើឱ្យការទទួលព័ត៌មានរបស់មនុស្សមានការផ្លាស់ប្តូរយ៉ាងខ្លាំង។

ជាចុងក្រោយលោកបានបន្ថែថា តាមបទពិសោធន៍របស់ខ្លួនផ្ទាល់ សូមលើកទឹកចិត្តដល់ប្អូនៗដែលរស់នៅជនបទ ដែលចង់មកបន្តការសិក្សានៅទីក្រុងភ្នំពេញ។ លោកថ្លែងថា «ខ្ញុំសូមលើកទឹកចិត្តដល់ប្អូនៗ កុំដោយសារតែភាពខ្វះខាត ធ្វើឲ្យយើងបោះបង់ចោលការសិក្សានៅថ្នាក់មហាវិទ្យាល័យ។ ប្អូនៗនៅមានជម្រើសច្រើន​ដូចជាការរៀនបណ្ដើរធ្វើការងារបណ្ដើរដើម្បីបានជាចំណូលសម្រាប់ចំណាយប្រចាំថ្ងៃផង និងបានជាបទពិសោធន៍សម្រាប់ខ្លួនផងដែរក្រោយពេលយើងរៀនចប់បរិញ្ញាប័ត្រយើងមានបទពិសោធន៍ការងារស្រាប់ងាយស្រួលក្នុងការរកការងារធ្វើ និងទទួលបានប្រាក់ចំណូលខ្ពស់ជាងអ្នកគ្មានបទពិសោធន៍ការងារ»។

អត្ថបទដោយ Sroeuy Khanoeng និស្សិត មកសាកលវិទ្យាល័យកម្ពុជា!