(កូរ៉េខាងត្បូង)៖ លោក ឃួន ផុនរតនៈ ឯកអគ្គរាជទូតកម្ពុជាប្រចាំសាធារណរដ្ឋកូរ៉េ នៅថ្ងៃទី២១ ខែកក្កដា ឆ្នាំ២០២៦ បានអញ្ជើញជួបសម្តែងការគួរសម និងពិភាក្សាការងារជាមួយលោក WOO Keehong អនុប្រធាន​ និងជាអគ្គនាយកក្រុមហ៊ុន Korean Air នៅទីស្នាក់ការកណ្តាលនៃក្រុមហ៊ុន Korean Air ក្នុងតំបន់គីមផូ ខេត្តខ្យង់គីដូ សាធារណរដ្ឋកូរ៉េ។

ក្នុងឱកាសនៃជំនួបភាគីទាំងពីរ បានផ្លាស់ប្តូរយោបល់អំពីស្ថានភាពវិវត្តន៍ថ្មីៗ នៃការធ្វើដំណើររបស់ប្រជាជនកម្ពុជា និងកូរ៉េ តាមជើងហោះហើររបស់ក្រុមហ៊ុន Korean Air។

លោកឯកអគ្គរាជទូត បានលើកឡើងថាក្រុមហ៊ុន Korean Air បាននិងកំពុងដើរតួនាទីយ៉ាងសំខាន់ក្នុងវិស័យដឹកជញ្ជូនតាមផ្លូវអាកាសរបស់ប្រទេសកម្ពុជា​ ដែលបានតភ្ជាប់រាជធានីភ្នំពេញទៅកាន់ទីក្រុងសេអ៊ូល និងទីក្រុងធំៗ ក្នុងសហរដ្ឋអាមេរិក ដូចជាទីក្រុងញ៉ូវយ៉ក ប៊ូសស្តុន និងទីក្រុងវ៉ាស៊ីនតោន ជាដើម។

លោកឯកអគ្គរាជទូតសង្ឃឹមថា ក្រុមហ៊ុន Korean Air នឹងបន្តរក្សា និងពង្រីកទីផ្សារអាកាសចរណ៍របស់ខ្លួន ក្នុងប្រទេសកម្ពុជាក្នុងនាមជាអាកាសចរណ៍ឈានមុខទី១ របស់ប្រទេសកូរ៉េ៕