(ខេត្តបន្ទាយមានជ័យ)៖ លោក ប្រាក់ ប៉ូលី អភិបាលរងខេត្តបន្ទាយមានជ័យ នៅថ្ងៃទី២២ ខែកក្កដា ឆ្នាំ២០២៦ បានដឹកនាំក្រុមការងារចម្រុះខេត្ត ដោយមានការសម្របសម្រួលនីតិវិធីពីលោក សំរិទ្ធ សុខុន ព្រះរាជអាជ្ញារង នៃអយ្យការអមសាលាដំបូងខេត្ត បានចុះត្រួតពិនិត្យទីតាំងចំនួន៤កន្លែង ក្នុងនោះបានបិទជាបណ្ដោះអាសន្ន១ទីតាំង។

ប្រតិបត្តិការនេះក្រោមការដឹកនាំពីលោក អុំ រាត្រី អភិបាលខេត្តបន្ទាយមានជ័យ និងលោក កើត វណ្ណារ៉េត ព្រះរាជអាជ្ញាអមសាលាដំបូងខេត្តបន្ទាយមានជ័យ។

ប្រតិបត្តិការនេះ បានរកឃើញជនបរទេសសរុបចំនួន៤៨នាក់ ក្នុងនោះមានស្រី៣នាក់ ដែលមាន២សញ្ជាតិ រួមមានជនជាតិចិន៣២នាក់ (ស្រី១នាក់) និងជនជាតិឥណ្ឌូនេស៊ី១៦នាក់ (ស្រី២នាក់)។

ក្នុងចំណោមទីតាំងទាំង៤ ទីតាំងសំខាន់មួយគឺផ្ទះ២ល្វែង កម្ពស់២ជាន់ មាន៧បន្ទប់ ដែលស្ថិតនៅភូមិក្បាលស្ពាន១ សង្កាត់អូរជ្រៅ ត្រូវបានរកឃើញជនជាតិចិនចំនួន៣២នាក់ (ស្រី១នាក់)។

ជាមួយគ្នានេះ ក្រុមការងារក៏បានរកឃើញសម្ភារសង្ស័យ បម្រើឱ្យបទល្មើសឆបោកតាមប្រព័ន្ធបច្ចេកវិទ្យាជាច្រើន រួមមានទូរសព្ទចំនួន៣៤០គ្រឿង ម៉ូនីទ័រចំនួន១៦គ្រឿង ធុងស៊ីភីយូ១៧ និងកុំព្យូទ័រAll-in-one ចំនួន៧៧គ្រឿង។

បន្ទាប់ពីការត្រួតពិនិត្យ អាជ្ញាធរបានចាត់វិធានការបញ្ជូនជនបរទេសទាំងអស់ ទៅកាន់មណ្ឌលកងវ៉ាខេត្ត ដើម្បីបន្តនីតិវិធីតាមផ្លូវច្បាប់ និងតាមស្វែងរកម្ចាស់ទីតាំងផងដែរ៕