(ភ្នំពេញ)៖ មជ្ឈមណ្ឌលបណ្តុះធុរកិច្ចថ្មី តេជោ (ម.ធ.ត.) នាថ្ងៃទី២២ ខែកក្កដា ឆ្នាំ២០២៦នេះ បានរៀបចំ «ថ្ងៃបទបង្ហាញជាសាធារណៈ» នៃកម្មវិធីពន្លឿនអាជីវកម្មថ្នាលឌីជីថល រដូវកាលទី៥ និងដោយផ្អែកលើលទ្ធផលនៃការវាយតម្លៃយ៉ាងយកចិត្តទុកដាក់ និងប្រកួតប្រជែងខ្ពស់ បានរកឃើញក្រុមធុរកិច្ចថ្មីឆ្នើមចំនួន៥ ត្រូវបានជ្រើសរើសដោយផ្អែកលើវឌ្ឍនភាព ការអនុវត្តផែនការទីផ្សារ និងមានសក្តានុពលខ្ពស់ក្នុងការលូតលាស់ ដែលទទួលបានថវិកាគាំទ្រជាទុនឧបត្ថម្ភដែលមិនយកភាគហ៊ុន (Equity-free Investment) សរុបចំនួន ១២០លានរៀល។

កម្មវិធីនេះបានប្រព្រឹត្តទៅក្រោមអធិបតីភាពលោកបណ្ឌិត តាំង ងួនលី នាយកប្រតិបត្តិមជ្ឈមណ្ឌល​បណ្ដុះធុរកិច្ចថ្មី "តេជោ” និងមានការចូលរួមពី តំណាងដៃគូ ឧបត្ថម្ភធំពី ធនាគារវឌ្ឍនៈ អាស៊ី ចំកាត់ (ហៅកាត់ថា ធនាគារ ABA) ព្រមទាំងដៃគូអភិវឌ្ឍន៍, វិនិយោគិន, ធុរកិច្ចថ្មី និងតួអង្គពាក់ព័ន្ធក្នុងប្រព័ន្ធ​អេកូឡូស៊ីធុរកិច្ចថ្មីកម្ពុជា ប្រមាណ ១០០នាក់។

កម្មវិធីពន្លឿនអាជីវកម្មថ្នាលឌីជីថល រដូវកាលទី៥ ត្រូវបានបញ្ចប់ជាផ្លូវការ ដោយបានអបអរសាទរនូវ​លទ្ធិផលខិតខំប្រឹងប្រែងអស់រយៈពេលជាច្រើនខែរបស់ធុរកិច្ចថ្មីដែលចូលរួម និងបានស្វែងរកឃើញ​ក្រុមធុរកិច្ចថ្មីឆ្នើមចំនួន ៥ ដែលទទួលបានថវិកាគាំទ្រ​ជាទុនឧបត្ថម្ភដែលមិនយក ភាគហ៊ុន (Equity-free Investment) សរុបចំនួន ១២០ លានរៀល។

ក្នុងចំណោមបេក្ខជនដាក់ពាក្យសរុបចំនួន ៦៦ធុរកិច្ចថ្មី មានធុរកិច្ចថ្មីចំនួន ១២ប៉ុណ្ណោះត្រូវបានជ្រើសរើស​ឱ្យចូលរួមក្នុងកម្មវិធីដែល មានភាពប្រកួតប្រជែង​រយៈពេល ១៨សប្តាហ៍ ដោយរាប់បញ្ចូលទាំង វគ្គទទួលពាក្យ និងជម្រុះជ្រើសរើស រយៈពេល ៣ សប្តាហ៍, វគ្គជំរុំចាប់ផ្តើម (Bootcamp) រយៈពេល ៤ សប្តាហ៍ និងវគ្គពន្លឿនអាជីវកម្ម (Acceleration Phase) រយៈពេល ១១សប្តាហ៍។

នារដូវកាលទី៥ នេះ កម្មវិធីត្រូវបានរចនាឡើងដោយ ផ្ដោតលើ«ការគាំទ្រតាមដំណាក់កាល» ដល់ធុរកិច្ចថ្មីនៅក្នុង ៣ផ្នែកសំខាន់ៗគឺ៖ (១) ដំណាក់កាល ស្វែងយល់, (២) ដំណាក់កាលវាស់ស្ទង់ទីផ្សារ, និង (៣) ដំណាក់កាលពង្រីកអាជីវកម្ម។

ឆ្លងកាត់វគ្គ ជម្រុះកម្មវិធីសម្រិតសម្រាំង​បានធុរកិច្ចថ្មី​ឆ្នើមចំនួន៩ ដែលអាចឈានចូលដល់វគ្គ​ពន្លឿនអាជីវកម្ម ដែលក្នុងវគ្គនេះ ធុរកិច្ចថ្មីទទួលបានការតម្រង់ទិស ការណែនាំជាយុទ្ធសាស្ត្រពីអ្នកជំនាញ និង ការគាំទ្រដើម្បីត្រៀមខ្លួនសម្រាប់ការវិនិយោគ។

ផ្អែកលើលទ្ធផលនៃការវាយតម្លៃយ៉ាងយកចិត្តទុកដាក់ និង ប្រកួតប្រជែងខ្ពស់ធុរកិច្ចថ្មីឆ្នើមចំនួន៥ ត្រូវបានជ្រើសរើសដោយផ្អែកលើវឌ្ឍនភាព ការអនុវត្តផែនការទីផ្សារ និង មានសក្តានុពលខ្ពស់ក្នុងការលូតលាស់មានដូចជា៖ (១) ម្ចាស់ពាន "Top Performance” ធុរកិច្ចថ្មី SMEAN AI ទទួលបានថវិកាគាំទ្រចំនួន ៤០ លានរៀល, (២) ម្ចាស់ពាន "Excellence” ធុរកិច្ចថ្មីចំនួន២ ក្រុមគឺក្រុម AVA Hospitality និងក្រុម UMAMI ទទួលបានថវិកាគាំទ្រចំនួន ២៥លានរៀលក្នុងមួយក្រុម, និង (៣) ម្ចាស់ពាន "Merit” ធុរកិច្ចថ្មីចំនួន២ ក្រុមគឺក្រុម HORPAO និង ក្រុម EZEPOS ទទួលបានថវិកាគាំទ្រចំនួន ១៥លានរៀលក្នុងមួយក្រុម។

នាឱកាសដ៏ពិសេសនេះលោកបណ្ឌិត តាំង ងួនលី បានបញ្ជាក់ឱ្យដឹងថា កម្មវិធី Demo Day មិនមែនត្រឹមតែជាអ្វីដែលបង្ហាញនៅលើអេក្រង់ ឬ ភាពស្ទាត់ជំនាញនៃការធ្វើបទបង្ហាញ របស់ក្រុមនីមួយៗនោះទេ ប៉ុន្តែវាគឺជាការឆ្លុះបញ្ចាំងថា តើស្ថាបនិកពិតជាយល់ច្បាស់ពីបញ្ហាស្តាប់តម្រូវការ ទីផ្សារ និង ប្រែក្លាយមតិត្រឡប់ទៅជា​សកម្មភាពជាក់ស្ដែងដែរឬទេ។

លោកបណ្ឌិត ក៏បានចែករំលែកនូវអនុសាសន៍​គន្លឹះជាយុទ្ធសាស្ត្រចំនួន ៣ ចំណុច ជូនដល់ក្រុមធុរកិច្ចថ្មីនារដូវកាលទី៥ មានដូចជា៖ ទី១. ត្រូវពង្រឹងទំនាក់ទំនងជាមួយអតិថិជន ទី២. ត្រូវចាត់ទុកទុនវិនិយោគជាទំនួលខុសត្រូវ, និងទី៣. ត្រូវរក្សាឆន្ទៈក្នុងការរៀនសូត្រជានិច្ច។

សូមបញ្ជាក់ថា មជ្ឈមណ្ឌលបណ្តុះធុរកិច្ចថ្មី តេជោ នៃក្រសួងសេដ្ឋកិច្ច និងហិរញ្ញវត្ថុនឹងបន្តដឹកនាំ​បេសកកម្ម យ៉ាងមុតមាំក្នុងការចូលរួមសម្រេច​ឱ្យបាននូវចក្ខុវិស័យរបស់រាជរដ្ឋាភិបាល ក្នុងការជំរុញសេដ្ឋកិច្ចឌីជីថល និង លើកកម្ពស់ការអភិវឌ្ឍប្រព័ន្ធអេកូឡូស៊ីធុរកិច្ចថ្មីកម្ពុជាប្រកបដោយបរិយាបន្ន៕