(តាកែវ)៖ នៅថ្ងៃទី២១ ខែកក្កដា ឆ្នាំ២០២៦ ក្រសួងប្រៃសណីយ៍និងទូរគមនាគមន៍ (ក.ប.ទ.) បានរៀបចំសិក្ខាសាលាស្តីពី «ការពង្រឹងប្រតិបត្តិការសម្រាប់មជ្ឈមណ្ឌលបច្ចេកវិទ្យាសហគមន៍ (ម.ប.ស)» នៅសាលប្រជុំសាលាខេត្តតាកែវ ដើម្បីជំរុញការរៀបចំផែនការពង្រឹងប្រសិទ្ធភាពប្រតិបត្តិការ ម.ប.ស. ជាប្រយោជន៍យូរអង្វែងដល់សិស្ស និងសហគមន៍មូលដ្ឋាន។

ពិធីនេះបានប្រព្រឹត្តទៅក្រោមអធិបតីភាពដ៏ខ្ពង់ខ្ពស់របស់ លោក ម៉ៅ សិលា អនុរដ្ឋលេខាធិការ ក.ប.ទ. និងជាប្រធានក្រុមការងារ ម.ប.ស. រួមជាមួយ លោក វ៉ី សំណាង អភិបាល នៃគណៈអភិបាលខេត្តតាកែវ ដោយមានការចូលរួមពីថ្នាក់ដឹកនាំ ក.ប.ទ. តំណាងក្រសួងអប់រំ យុវជន និងកីឡា នាយកវិទ្យាល័យ ប្រធាន ម.ប.ស. និងអង្គភាពពាក់ព័ន្ធសរុបប្រមាណ ១៨០នាក់។

សិក្ខាសាលានេះមានគោលបំណងសំខាន់ៗចំនួនបី រួមមាន៖ ទី១ ពិនិត្យលើគំរូប្រតិបត្តិការ និងការគ្រប់គ្រង ដើម្បីស្វែងយល់ពីបញ្ហាប្រឈម និងរៀបចំដំណោះស្រាយសមស្រប ធានាភាពម្ចាស់ការ និងនិរន្តរភាពនៃប្រតិបត្តិការ ម.ប.ស.។ ទី២ ចែករំលែកឧត្តមានុវត្តន៍ បទពិសោធជោគជ័យ និងយុទ្ធសាស្ត្រគន្លឹះក្នុងការដឹកនាំ និងគ្រប់គ្រងសាលារៀន ឱ្យស្របតាមបរិបទការអប់រំសតវត្សទី២១ និងការអប់រំឌីជីថល។ ទី៣ ជំរុញការរៀបចំផែនការពង្រឹងប្រសិទ្ធភាពប្រតិបត្តិការ ម.ប.ស. ដើម្បីជាប្រយោជន៍យូរអង្វែងដល់សិស្ស និងសហគមន៍មូលដ្ឋាន។

ក្នុងឱកាសនោះ សម្តេចព្រះឧត្តមវង្សា បណ្ឌិត គូ សុភាព ក៏បាននិមន្តសម្តែងធម្មទេសនាអំពី «បរិស្ថាន និងការអប់រំ» ដោយផ្តោតលើការបណ្ដុះបណ្ដាលធនធានមនុស្សប្រកបដោយចរិយាសម្បត្តិ វិន័យ សីលធម៌ និងការថែរក្សាបរិស្ថាន ចាប់ផ្ដើមពីសាលារៀន។ ព្រះអង្គក៏បានលើកឡើងពីទំនាក់ទំនងរវាងបរិស្ថានជាមួយគុណភាពអប់រំ សុខុមាលភាព និងអាកប្បកិរិយារបស់សិស្ស ព្រមទាំងយុទ្ធសាស្ត្រសំខាន់ៗក្នុងការកៀរគរសិស្ស និងសហគមន៍ឱ្យចូលរួមរៀបចំសម្អាតបរិស្ថាន និងថែរក្សាសមិទ្ធផលក្នុងសាលារៀន។

ភាគីពាក់ព័ន្ធទាំងអស់បានឯកភាពគ្នាលើស្មារតី «រួមគ្នាគិត រួមគ្នាដោះស្រាយ ដើម្បីធានានិរន្តរភាព» ដោយជំរុញឱ្យវិទ្យាល័យនានាពង្រឹងភាពម្ចាស់ការ និងបញ្ចូលសកម្មភាព ម.ប.ស. ទៅក្នុងផែនការសកម្មភាពរបស់សាលា។ ការប្តេជ្ញាចិត្តនេះមានគោលដៅបន្តបណ្តុះបណ្តាលធនធានមនុស្សឌីជីថលជំនាន់ក្រោយ ឆ្ពោះទៅសម្រេចបាននូវចក្ខុវិស័យកម្ពុជាឆ្នាំ២០៥០ ប្រកបដោយភាពរីកចម្រើន៕