(ភ្នំពេញ)៖ គណៈបញ្ជាការឯកភាពរាជធានីភ្នំពេញ ក្រោមការបញ្ជាពីលោក ឃួង ស្រេង ប្រធានគណ:បញ្ជាការឯកភាពរាជធានី បានដឹកនាំកម្លាំងចម្រុះចុះត្រួតពិនិត្យ និងឆែកឆេរទីតាំងសង្ស័យមួយកន្លែង ស្ថិតនៅផ្ទះលេខ ០០៦ ផ្លូវលេខ ៥៦៨ ភូមិ៤ សង្កាត់បឹងកក់ទី២ ខណ្ឌទួលគោក រាជធានីភ្នំពេញ ដែលសង្ស័យប្រព្រឹត្តបទល្មើសឆបោកតាមប្រព័ន្ធបច្ចេកវិទ្យា (ONLINE SCAMS) ដោយបានរកឃើញជនបរទេស ២៥នាក់ និងសម្ភារមួយចំនួន។

ប្រតិបត្តិការនេះ ធ្វើឡើងនៅថ្ងៃទី២២ ខែកក្កដា ឆ្នាំ២០២៦ វេលាម៉ោងប្រមាណ ១៩:២០នាទី ដឹកនាំដោយលោក ហ៊ុន សុរិទ្ធី អភិបាលរងរាជធានីភ្នំពេញ ដោយមានកិច្ចសម្របសម្រួលពីលោក តូច ឧត្តម ព្រះរាជអាជ្ញារង នៃអយ្យការអមសាលាដំបូងរាជធានីភ្នំពេញ។

ក្នុងប្រតិបត្តិការចុះត្រួតពិនិត្យ និងឆែកឆេរទីតាំងខាងលើ កម្លាំងចម្រុះបានរកឃើញជនបរទេសចំនួន ២៥នាក់ ក្នុងនោះមានស្រី ០៤នាក់ ដែលជាជនជាតិភូមា ចិន និងចិនតៃវ៉ាន់។ ជាមួយគ្នានេះ កម្លាំងជំនាញក៏បានរុករកឃើញវត្ថុតាងមួយចំនួន រួមមាន CPU និង Monitor ជាច្រើនគ្រឿង ដែលត្រូវបានសង្ស័យថាអាចពាក់ព័ន្ធនឹងបទល្មើសបច្ចេកវិទ្យា។

បច្ចុប្បន្ន វត្ថុតាងទាំងអស់ រួមទាំងសម្ភារៈកុំព្យូទ័រដែលបានរកឃើញ ត្រូវបានបញ្ជូនទៅការិយាល័យបទល្មើសបច្ចេកវិទ្យា នៃស្នងការដ្ឋាននគរបាលរាជធានីភ្នំពេញ ដើម្បីធ្វើកោសល្យវិច័យ និងបន្តនីតិវិធីស្រាវជ្រាវរកការពិត៕