(ភ្នំពេញ)៖ ក្នុងជំនួបសម្ដែងការគួរសម និងពិភាក្សាការងារជាមួយអង្គការ World Vision International, លោកសាស្ដ្រាចារ្យ ឈាង​ រ៉ា​ រដ្ឋមន្ដ្រីក្រសួងសុខាភិបាល បានវាយតម្លៃខ្ពស់ចំពោះកិច្ចសហប្រតិបត្តិការជាង ៥៦ ឆ្នាំ រវាងរាជរដ្ឋាភិបាលកម្ពុជា និងអង្គការ ក្នុងការចូលរួមអភិវឌ្ឍប្រព័ន្ធ សុខាភិបាលជាតិ ជាពិសេសលើសុខភាពមាតា-កុមារ និងអាហារូបត្ថម្ភ។

ជំនួបនេះបានធ្វើឡើងនៅទីស្ដីការក្រសួង នារសៀលថ្ងៃពុធ ទី២២ ខែកក្កដា ឆ្នាំ២០២៦ ដែលគណៈប្រតិភូអង្គការទស្សនៈពិភពលោកអន្តរជាតិប្រចាំកម្ពុជា (World Vision International) ដឹកនាំដោយ លោកស្រីបណ្ឌិត Than Thi Ha នាយិកាស្តីទីប្រចាំប្រទេស។

ក្នុងជំនួបចូលជួបសម្តែងការគួរសម និងពិភាក្សាការងារនេះ ក៏ដើម្បីបន្តពង្រីកកិច្ចសហប្រតិបត្តិការដ៏យូរអង្វែងរវាងភាគីទាំងពីរ ។លើសពីនោះគឺអង្គការ World Vision International បានរាយការណ៍អំពីវឌ្ឍនភាពនៃការអនុវត្តការងារ និងស្វែងរកអនុសាសន៍ណែនាំដ៏ខ្ពង់ខ្ពស់ពី លោកសាស្ត្រាចារ្យរដ្ឋមន្ត្រី ដើម្បីតម្រង់ទិសក្នុងការរៀបចំផែនការយុទ្ធសាស្ត្ររបស់អង្គការ ឆ្នាំ២០២៨-២០៣២ ឱ្យឆ្លើយតបតាមអាទិភាពសុខាភិបាលជាតិ។

ជាការឆ្លើយតបលោកសាស្ត្រាចារ្យរដ្ឋមន្ត្រី ក៏បានផ្តល់អនុសាសន៍ណែនាំគន្លឹះចំនួន ៥ចំណុច ដើម្បីតម្រង់ទិសការងារ៖
១៖ ប្រែក្លាយគំរូសហគមន៍ជោគជ័យ ឱ្យទៅជាគំរូស្តង់ដារសម្រាប់អនុវត្តនៅទូទាំងប្រទេស។
២៖ ពង្រឹងសមត្ថភាពមន្ត្រីសុខាភិបាល ឆ្មប និងក្រុមទ្រទ្រង់សុខភាពភូមិ (VHSG)។
៣៖ ពង្រីកគំរូសេវាសុខភាពដែលមានភាពធន់ និងនិរន្តរភាព។
៤៖ ធ្វើបរិយាបន្នទិន្នន័យតាមដានអាហារូបត្ថម្ភ ទៅក្នុងប្រព័ន្ធទិន្នន័យឌីជីថលសុខាភិបាលជាតិ។
៥៖ រៀបចំផែនការយុទ្ធសាស្ត្រអង្គការ ឆ្នាំ២០២៨-២០៣២ ដោយពិគ្រោះយោបល់ និងសហការយ៉ាងជិតស្និទ្ធជាមួយក្រសួងសុខាភិបាល៕

ជាមួយគ្នានេះលោកស្រីបណ្ឌិត Than Thi Ha បានថ្លែងអំណរគុណយ៉ាងជ្រាលជ្រៅ និងបានរាយការណ៍ជូនអំពីសមិទ្ធផលនៃការអនុវត្តយុទ្ធសាស្ត្រជាតិ ឆ្នាំ២០២៣-២០២៧ ដែលបានគ្របដណ្តប់លើ ២០ រាជធានី-ខេត្ត (៨៤% នៃផ្ទៃប្រទេស) ជាមួយថវិកាវិនិយោគជាង ១៣លានដុល្លារអាមេរិក។ លោកស្រីបណ្ឌិត បានបញ្ជាក់ពីការប្តេជ្ញាចិត្តយ៉ាងមុតមាំក្នុងការបន្តកិច្ចសហប្រតិបត្តិការជិតស្និទ្ធជាមួយក្រសួងសុខាភិបាល ដើម្បីលើកកម្ពស់សុខុមាលភាពមាតា ទារក និងកុមារនៅកម្ពុជា៕