(ភ្នំពេញ)៖ កងរាជអាវុធហត្ថរាជធានីភ្នំពេញ បានបង្ហាញពីប្រសិទ្ធភាពខ្ពស់ក្នុងការបម្រើសេវាសាធារណៈ និងដោះស្រាយបញ្ហាជូនប្រជាពលរដ្ឋក្នុងភូមិសាស្ត្ររាជធានីភ្នំពេញ តាមរយៈលេខទូរស័ព្ទបន្ទាន់ ១២៩១ ដោយបានសម្របសម្រួល និងដោះស្រាយករណីសរុបចំនួន ៩០១ ករណី ក្នុងរយៈពេល ០៦ ខែ ដើមឆ្នាំ២០២៦ នេះ។

លេខទូរស័ព្ទបន្ទាន់ ១២៩១ នេះ ត្រូវបានផ្តួចផ្តើមបំពាក់ឡើងដោយលោក ឧត្តមសេនីយ៍ឯក រ័ត្ន ស៊្រាង មេបញ្ជាការរង កងរាជអាវុធហត្ថលើផ្ទៃប្រទេស និងជាមេបញ្ជាការ កងរាជអាវុធហត្ថរាជធានីភ្នំពេញ ព្រមទាំងទទួលបានការអនុញ្ញាតពីលោកនាយឧត្តមសេនីយ៍ សៅ សុខា អគ្គមេបញ្ជាការរង កងយោធពលខេមរភូមិន្ទ មេបញ្ជាការ កងរាជអាវុធហត្ថលើផ្ទៃប្រទេស។

គោលបំណងសំខាន់គឺដើម្បីបម្រើជូនប្រជាពលរដ្ឋក្នុងការផ្តល់ព័ត៌មានអំពីហេតុការណ៍បន្ទាន់ ឬបទល្មើសគ្រប់ប្រភេទ ក៏ដូចជាបណ្តឹងបន្ទាន់ចំពោះបញ្ហាប្រឈមក្នុងជីវភាពប្រចាំថ្ងៃ។ ក្នុងរយៈពេលកន្លងមក កម្លាំងអាវុធហត្ថរាជធានីភ្នំពេញ បានចុះជួយដោះស្រាយជូនប្រជាពលរដ្ឋភ្លាមៗ ប្រកបដោយភាពកក់ក្តៅ។

ក្នុងចំណោម ៩០១ ករណី ដែលបានដោះស្រាយ មានដូចជា ករណីហិង្សា ករណីបែកថ្នាំអុកឡុកគ្រួសារ ករណីក្មេងទំនើង ករណីគ្រោះថ្នាក់ចរាចរណ៍ ករណីអគ្គិភ័យ ករណីចាក់ធុងបាសរំខានអ្នកជិតខាង ករណីទំនាស់អ្នកជិតខាង ករណីចែកចាយ និងប្រើប្រាស់គ្រឿងញៀន ករណីដេញកាប់ប្លន់យកម៉ូតូ និងករណីលួច ឆក់ រួមទាំងករណីជាច្រើនទៀត ដែលជាកង្វល់របស់ប្រជាពលរដ្ឋ។

ដើម្បីទទួលបានជំនួយបន្ទាន់ពីកងរាជអាវុធហត្ថរាជធានីភ្នំពេញ ប្រជាពលរដ្ឋអាចហៅទូរស័ព្ទទៅកាន់លេខ ១២៩១ ឬទំនាក់ទំនងតាមបណ្តាញ Telegram, WhatsApp, CoolApp លេខ 031 5555 669 ឬឆាតទៅកាន់ផេកហ្វេសប៊ុក Phnom Penh Gendarmerie។

កងរាជអាវុធហត្ថរាជធានីភ្នំពេញ ក៏សូមអភ័យទោស និងសំណូមពរដល់បងប្អូនប្រជាពលរដ្ឋមេត្តាកុំហៅទូរស័ព្ទទៅរំខានក្រុមការងារ ប្រសិនបើពុំមានការចាំបាច់ជាក់ស្តែង ដើម្បីទុកពេលវេលាឲ្យក្រុមការងារបម្រើពលរដ្ឋផ្សេងទៀតដែលត្រូវការជំនួយបន្ទាន់ពិតប្រាកដ។