បង្កភាពងាយស្រួលដល់អ្នកជាប់ពន្ធ! និន្នាការប្រើប្រាស់ប្រព័ន្ធអេឡិចត្រូនិក ដើម្បីដាក់លិខិតស្នើសុំនានា មកអគ្គនាយកដ្ឋានពន្ធដារមានការកើន
23-07-2026 08:27
(ភ្នំពេញ)៖ លោក កែ ឈុំបញ្ញា អនុប្រធាននាយកដ្ឋានរដ្ឋបាល និងកិច្ចការទូទៅនៃអគ្គនាយកដ្ឋានពន្ធដារ បានបញ្ជាក់ឱ្យដឹងថា ស្របតាមយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា ក៏ដូចជាការបន្តកំណែទម្រង់នៅក្នុងក្របខ័ណ្ឌក្រសួងសេដ្ឋកិច្ច និងហិរញ្ញវត្ថុ ក្រោមការដឹកនាំរបស់អគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អគ្គនាយកដ្ឋានពន្ធដារតែងតែយកចិត្តទុកដាក់ខ្ពស់ក្នុងការធ្វើបរិវត្តកម្មឌីជីថល ដើម្បីធ្វើយ៉ាងណាផ្តល់នូវភាពងាយស្រួល លឿនរហ័ស ចំណេញពេលវេលា និងផ្តល់ជំនឿទុកចិត្តលើការផ្តល់សេវា ជូនដល់អ្នកជាប់ពន្ធ។
ក្នុងន័យនេះ ដើម្បីផ្តល់ជម្រើសបន្ថែមពីការមកដាក់លិខិតស្នើសុំនានាដោយផ្ទាល់ អគ្គនាយកដ្ឋានពន្ធដារបានដាក់ឱ្យប្រើប្រាស់ កម្មវិធីរដ្ឋបាលអេឡិចត្រូនិកពន្ធដារ (GDT e-Administration) ដែលអនុញ្ញាតឱ្យអ្នកជាប់ពន្ធដាក់លិខិតស្នើសុំនានា មកអគ្គនាយកដ្ឋានពន្ធដារ ដោយមិនចាំបាច់ចំណាយពេលវេលា និងសោហ៊ុយធ្វើដំណើរមកអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌនោះឡើយ។
ជាមួយនឹងភាពងាយស្រួល រហ័ស និងអាចតាមដានបាន ក្នុងរយៈពេល ៦ខែឆ្នាំ២០២៦ និន្នាការប្រើប្រាស់ប្រព័ន្ធអេឡិចត្រូនិកនេះ ដើម្បីដាក់លិខិតស្នើសុំនានាមកអគ្គនាយកដ្ឋានពន្ធដារ មានការកើនឡើង ៣៤.៤១% បើធៀបនឹងរយៈពេលដូចគ្នាឆ្នាំ២០២៥ ពោលគឺមានចំនួន ១០ ១២០ឯកសារ។
តាមរយៈកម្មវិធីរដ្ឋបាលអេឡិចត្រូនិកពន្ធដារ (GDT e-Administration) អ្នកជាប់ពន្ធអាចដាក់ពាក្យស្នើសុំមួយចំនួនមកអគ្គនាយកដ្ឋានពន្ធដារ រួមមាន៖
* ការស្នើសុំធ្វើបច្ចុប្បន្នភាពព័ត៌មានសហគ្រាស ដូចជា ការផ្លាស់ប្តូរអាសយដ្ឋាន នាមករណ៍ ដំឡើងដើមទុន ជាដើម។
* ការតវ៉ាលើការកំណត់ពន្ធឡើងវិញ ដូចជាតវ៉ាលើការគិតពន្ធប្រថាប់ត្រា ពន្ធអចលនទ្រព្យ...
* ការស្នើសុំទូទាត់ប្រាក់ពន្ធជាដំណាក់កាល
* ការស្នើសុំវិញ្ញាបនបត្រ អាជ្ញាបណ្ណ ឬលិខិតអនុញ្ញាតនានា ដូចជាការស្នើសុំវិញ្ញាបនបត្រភ្នាក់ងារសេវាកម្មពន្ធដារ ឬវិញ្ញាបនបត្របញ្ជាក់ អនុលោមភាពលិខិតរដ្ឋបាលទូទៅ និងឯកសារផ្សេងៗ។
បន្ថែមពីនេះ លោក កែ ឈុំបញ្ញា ក៏បានបញ្ជាក់ផងដែរថា នៅពេលដែលអ្នកជាប់ពន្ធបាន Upload ចូលក្នុងប្រព័ន្ធ GDT e-Administration បានជោគជ័យ ក្នុងប្រព័ន្ធផ្នែកបញ្ជីឯកសារ អ្នកជាប់ពន្ធនឹងទទួលបានលិខិតបញ្ជាក់ការទទួលឯកសារ ពីអគ្គនាយកដ្ឋានពន្ធដារដែលមាន QR Code សម្រាប់ការតាមដានឯកសារជាបន្តបន្ទាប់បានយ៉ាងងាយស្រួល។ ប្រសិនបើឯកសារដែលដាក់ចូលមានភាពមិនត្រឹមត្រូវ មន្ត្រីជំនាញ នឹងបញ្ជាក់ពីកំហុសតាមរយៈប្រព័ន្ធ និងតាមរយៈទូរស័ព្ទ៕
