(កណ្តាល)៖ ក្រសួងបរិស្ថាន បានចាត់វិធានការច្បាប់យ៉ាងម៉ឺងម៉ាត់លើសិប្បកម្មកែច្នៃប្លាស្ទិកមួយកន្លែង ស្ថិតនៅភូមិព្រែកសំរោង សង្កាត់រកាខ្ពស់ ក្រុងតាខ្មៅ ខេត្តកណ្តាល បន្ទាប់ពីរកឃើញថា សិប្បកម្មនេះមិនបានគោរពតាមបទដ្ឋានគតិយុត្តទាក់ទងនឹងវិស័យបរិស្ថានត្រឹមត្រូវ។

ប្រតិបត្តិការនេះត្រូវបានដឹកនាំដោយលោក ឡៅ គឹមឈី អនុប្រធាននាយកដ្ឋានអធិការកិច្ច និងពង្រឹងការអនុវត្តច្បាប់ នៃអគ្គនាយកដ្ឋានគាំពារបរិស្ថាន រួមជាមួយមន្រ្តីជំនាញ និងមន្ទីរបរិស្ថានខេត្តកណ្តាល។ ក្រុមការងារបានរកឃើញថា សិប្បកម្មបានបង្ហូរសំណល់រាវចេញពីការលាងសម្អាតប្លាស្ទិក និងទឹកស្អំសរសៃប្លាស្ទិកចូលទៅក្នុងប្រភពទឹកសាធារណៈ ដែលជាការបំពានយ៉ាងធ្ងន់ធ្ងរដល់បរិស្ថាន។

ដើម្បីទប់ស្កាត់ការបំពុល និងធានាការអនុវត្តច្បាប់ ក្រុមការងារបានតម្រូវឱ្យសិប្បកម្មបញ្ឈប់ជាបន្ទាន់នូវការបង្ហូរសំណល់រាវចូលប្រភពទឹកសាធារណៈ។

លើសពីនេះ សិប្បកម្មត្រូវរៀបចំរបាយការណ៍វាយតម្លៃហេតុប៉ះពាល់បរិស្ថានដំបូង រៀបចំអាងប្រព្រឹត្តិកម្មសម្អាតទឹកកខ្វក់សំណល់រាវ និងធ្វើការស្តារកំសំណល់ប្លាស្ទិកប្រមាណ ១០០ម៉ែត្រគូប ឱ្យក្រុមហ៊ុនដឹកជញ្ជូនដែលមានអាជ្ញាបណ្ណពីក្រសួងបរិស្ថាន ដឹកចេញ។ ជាមួយគ្នានេះ សិប្បកម្មក៏ត្រូវស្នើសុំលិខិតអនុញ្ញាតបញ្ចេញសំណល់នៅក្រសួងបរិស្ថានផងដែរ។

ក្រសួងបរិស្ថានក៏បានចាត់វិធានការពិន័យអន្តរការណ៍ចំពោះសិប្បកម្មនេះផងដែរ ដោយសារពុំមានរបាយការណ៍វាយតម្លៃហេតុប៉ះពាល់បរិស្ថានដំបូង គ្មានអាងប្រព្រឹត្តិកម្មសម្អាតសំណល់រាវ និងគ្មានលិខិតអនុញ្ញាតបញ្ចេញសំណល់ ដែលជាការបំពានលើមាត្រា ៦៦៨ មាត្រា ២៨៧ និងមាត្រា ១៧៣ នៃក្រមបរិស្ថាននិងធនធានធម្មជាតិ។

លើសពីនេះ សិប្បកម្មត្រូវផ្តល់សំណងការខូចខាតដល់បរិស្ថាន និងសុខភាពសាធារណៈ ស្របតាមមាត្រា ១៦២ និងមាត្រា ១៦៣ នៃក្រមដដែល។ វិធានការទាំងនេះបង្ហាញពីការប្តេជ្ញាចិត្តរបស់រាជរដ្ឋាភិបាលកម្ពុជាក្នុងការការពារបរិស្ថាន និងធានាការអភិវឌ្ឍប្រកបដោយចីរភាព៕