(កំពង់ឆ្នាំង)៖ លោក ឆាយ ឫទ្ធិសែន រដ្ឋមន្ដ្រីក្រសួងអភិវឌ្ឍន៍ជនបទ អនុប្រធានទី១ ក្រុមការងាររាជរដ្ឋាភិបាលចុះមូលដ្ឋានខេត្តកំពង់ឆ្នាំង និងជាប្រធានក្រុមការងាររាជរដ្ឋាភិបាល ចុះមូលដ្ឋានស្រុកសាមគ្គីមានជ័យ និងស្រុកទឹកផុស និងលោកស្រី នៅថ្ងៃទី២៣ ខែកក្កដា ឆ្នាំ២០២៦ បាននាំយកទៀនព្រះវស្សា និងទេយ្យវត្ថុ ទៅវេរប្រគេនព្រះសង្ឃគង់ចាំព្រះវស្សាចំនួន ៦០វត្ត-អាស្រម ស្ថិតនៅក្នុងស្រុកសាមគ្គីមានជ័យ និងស្រុកទឹកផុស ខេត្តកំពង់ឆ្នាំង។

ពិធីប្រគេនទៀនព្រះវស្សានេះ បានប្រារព្ធឡើងនៅក្នុងទីតាំងវត្តចំនួន ២វត្ត ដោយទីតាំងវត្តទី១ ស្ថិតនៅវត្តមង្គលខ័ណ្ឌ ហៅវត្តទួលពង្រ ស្ថិតក្នុងភូមិវត្ត ឃុំទួលខ្ពស់ ស្រុកទឹកផុស និងទីតាំងវត្តទី២ ស្ថិតនៅក្នុងវត្តសេដ្ឋី ក្នុងភូមិសេដ្ឋី ឃុំសេដ្ឋី ស្រុកសាមគ្គីមានជ័យ ខេត្តកំពង់ឆ្នាំង។

ក្នុងពិធីនីមួយៗ មានការនិមន្ដ និងអញ្ជើញចូលរួមពីសំណាក់ ព្រះអនុគណៈ និងព្រះចៅអធិការ អាចារ្យ គណៈកម្មការវត្ត-អាស្រម ទាំង៦០ ក្នុងស្រុកទាំងពីរខាងលើ ព្រមទាំងលោក លោកស្រី ថ្នាក់ដឹកនាំក្រសួង ថ្នាក់ដឹកនាំថ្នាក់ខេត្ត រដ្ឋបាលស្រុក ដែលជា ក្រុមការងាររាជរដ្ឋាភិបាលចុះមូលដ្ឋានស្រុកសាមគ្គីមានជ័យ និងស្រុកទឹកផុស ព្រមទាំងអាជ្ញាធរមូលដ្ឋាន និងពុទ្ធបរិស័ទយ៉ាងច្រើនកុះករផងដែរ។

ក្នុងឱកាសនោះ លោករដ្ឋមន្ដ្រី និងលោកស្រី ព្រមទាំងក្រុមការងារ បានអញ្ជើញបូជាគ្រឿងសក្ការៈ មានទៀន ធូប ផ្កា និងទឹកអប់ ដើម្បីបួងសួងដល់វត្ថុសក្តិសិទ្ធិ និងគុណព្រះរតនត្រ័យ។ បន្ទាប់មក លោករដ្ឋមន្ត្រី និងគណៈប្រតិភូ ព្រមទាំងពុទ្ធបរិស័ទ បានអញ្ជើញធ្វើនមស្ការព្រះរតនត្រ័យ សមាទានសីល រម្លឹកដល់គុណព្រះរតនៈត្រៃយ៍ ព្រមទាំងវេរប្រគេនទេយ្យទាន ចំពោះព្រះសង្ឃទាំង ៦០វត្ត-អាស្រម។

ពិធីប្រគេនទៀនព្រះវស្សា និងទេយ្យវត្ថុនេះផងដែរ ត្រូវបានរៀបចំឡើងតាមទំនៀមទម្លាប់ក្នុងព្រះពុទ្ធសាសនា ក្នុងឱកាសនៃពិធីបុណ្យចូលព្រះវស្សា ដែលពុទ្ធបរិស័ទតែងតែ នាំគ្នានាំយកជាសាដក អង្ករ ភេសជ្ជៈ និងគ្រឿងប្រើប្រាស់ផ្សេងៗ សម្រាប់ផ្គត់ផ្គង់ព្រះសង្ឃគង់ចាំព្រះវស្សាអស់ត្រីមាស។

ពិធីបុណ្យចូលព្រះវស្សា មានរយៈពេល ០៣ខែ គឺចាប់ពីថ្ងៃ១រោច ខែអាសាធ ដល់ថ្ងៃ ១៥កើត ខែអស្សុជ ដែលជារយៈពេលមិនអនុញ្ញាតឱ្យព្រះសង្ឃនិមន្តទៅទីឆ្ងាយ ដោយដាច់រាត្រីឆ្លងថ្ងៃនោះឡើយ លើកលែងតែមានភារកិច្ចសំខាន់ចាំបាច់ ដូចជាឪពុកម្តាយឈឺធ្ងន់ រឺនិមន្តទៅសម្តែងធម៌ជាដើម ដោយតាំងចិត្តត្រលប់មកវិញក្នុង រយៈពេល ៧ថ្ងៃ។

សូមជម្រាបជូនដែរថា ទេយ្យវត្ថុដែលវេរប្រគេនព្រះសង្ឃទាំង ៦០វត្ត-អាស្រម នាឱកាសនោះ ដោយវត្តនិងអាស្រមនីមួយៗទទួលបាន ១.ទឹកសុទ្ធ ចំនួន ៣កេស, ២.ភេសជ្ជៈកូកាកូឡា ១កេស, ៣.ទឹកសណ្តែក ១កេស, ៤.ទឹកផ្លែឈើចម្រុះ ១កេស, ៥.កាហ្វេ ២កញ្ចប់ធំ, ៦.ទឹកដោះគោខាប់ ១កេស, ៧.ត្រីខកំប៉ុង ២ឡូ, ៨.ប្រេងឆា(៥លីត្រ) ១ដប, ៩.មីជាតិ ១កេស, ១០.ទឹកត្រី ១យួរ, ១១.ទឹកស៊ីអ៊ីវ ១យួរ, ១២.ទៀនវស្សា និងជើង ១ឈុត, ១៣.អង្ករផ្កាខ្ញី(២៥គក) ២បាវ, និង១៤.សាដក ១ប្រអប់ ព្រមទាំងបច្ច័យសម្រាប់ព្រះសង្ឃ និងសម្រាប់កសាងវត្ដផងដែរ។

ជាមួយគ្នានោះ លោកតាជី យាយជី អាចារ្យ គណៈកម្មការ និងពុទ្ធបរិស័ទ ដែលចូលរួមក្នុងពិធីនោះ ម្នាក់ៗទទួលបានបច្ច័យចំនួន ២០ ០០០រៀល៕