(សៀមរាប)៖ លោក ង៉ូវ សេងកាក់ អភិបាលរងខេត្តសៀមរាប បានលើកឡើងថា រដ្ឋបាលខេត្តនឹងបង្កើតគណៈកម្មការថ្នាក់ខេត្ត ដើម្បីជំរុញចលនាប្រកួតប្រជែង «ភូមិទេសចរណ៍ឆ្នើម» នៅតាមបណ្តាក្រុង-ស្រុកទាំង ១៣ ដោយជ្រើសរើសភូមិដែលមានសក្ដានុពលខ្ពស់បំផុត ធ្វើជាបេក្ខភាពតំណាងខេត្ត ចូលរួមប្រកួតប្រជែងនៅថ្នាក់ជាតិ បន្តទៅថ្នាក់តំបន់ និងអន្តរជាតិ។

លោកបានបន្តថា ការវាយតម្លៃនឹងផ្អែកលើសូចនាករសំខាន់ៗ ដូចជា៖ ការអភិរក្ស និងលើកតម្លៃបេតិកភណ្ឌវប្បធម៌ និងធនធានធម្មជាតិ ការអភិវឌ្ឍសេដ្ឋកិច្ចមូលដ្ឋានប្រកបដោយចីរភាព ការចូលរួមរបស់សហគមន៍ និងគុណភាពសេវាកម្មទេសចរណ៍។

ការថ្លែងយ៉ាងដូច្នេះរបស់លោក ង៉ូវ សេងកាក់ នៅក្នុងកិច្ចប្រជុំពិគ្រោះពិភាក្សា និងប្រមូលធាតុចូលលើសេចក្ដីព្រាងផែនការអភិវឌ្ឍន៍ទេសចរណ៍ខេត្តសៀមរាប ឆ្នាំ២០២៦-២០៣០ ព្រមទាំងពិភាក្សាលើវិធានការគន្លឹះសម្រាប់ ជំរុញការអភិវឌ្ឍទេសចរណ៍ឧទ្យានជាតិព្រះជ័យវរ្ម័ន-នរោត្តម «ភ្នំគូលែន» ឆ្នាំ២០២៦-២០២៨ និងការត្រៀមបេក្ខភាព «ភូមិទេសចរណ៍ឆ្នើម» ដើម្បីចូលរួមប្រកួតប្រជែងរបស់អង្គការទេសចរណ៍ពិភពលោក (UNWTO) នារសៀលថ្ងៃទី២២ ខែកក្កដា ឆ្នាំ២០២៦នេះ។

លោកបានណែនាំឱ្យអ្នកពាក់ព័ន្ធ ត្រូវអនុវត្តវិធានការគន្លឹះចំនួន៨ ដើម្បីលើកកម្ពស់ការអភិវឌ្ឍគោលដៅទេសចរណ៍ភ្នំគូលែន រួមមាន៖ ការបង្កើនភាពទាក់ទាញ និងសមត្ថភាពប្រកួតប្រជែង ពង្រឹងសន្តិសុខ និងសុវត្ថិភាពទេសចរណ៍ អភិវឌ្ឍហេដ្ឋារចនាសម្ព័ន្ធ និងសេវាគាំទ្រប្រកបដោយគុណភាព ធ្វើពិពិធកម្មផលិតផលទេសចរណ៍ អភិរក្សបេតិកភណ្ឌវប្បធម៌ និងធម្មជាតិ បង្កើនការចូលរួមរបស់សហគមន៍ អភិវឌ្ឍគោលដៅទេសចរណ៍បៃតង ឆ្លាតវៃ និងធន់ ព្រមទាំងពង្រឹងអភិបាលកិច្ច ភាពជាដៃគូ និងការវិនិយោគក្នុងវិស័យទេសចរណ៍។

ជាមួយនេះដែរ លោកអភិបាលរងខេត្ត ក៏បានអំពាវនាវឱ្យមន្ទីរអង្គភាពពាក់ព័ន្ធ រដ្ឋបាលក្រុងស្រុក និងវិស័យឯកជន បន្តសហការយ៉ាងជិតស្និទ្ធក្នុងការកំណត់សូចនាករ និងប្រមូលធាតុចូលឱ្យបានគ្រប់ជ្រុងជ្រោយ ដើម្បីធានាថា ផែនការអភិវឌ្ឍន៍ទេសចរណ៍ខេត្តសៀមរាប អាចឆ្លើយតបនឹងតម្រូវការអភិវឌ្ឍជាក់ស្ដែង និងរួមចំណែកលើកកម្ពស់សមត្ថភាពប្រកួតប្រជែងរបស់ខេត្ត ក្នុងនាមជាគោលដៅទេសចរណ៍ឈានមុខរបស់កម្ពុជា៕