(កណ្ដាល)៖ លោកស្រី រិន ចាន់ម៉ារីណា ប្រធានគណៈកម្មការពិគ្រោះយោបល់កិច្ចការស្ត្រី និងកុមារ ក្រុងតាខ្មៅ នាថ្ងៃទី២៣ ខែកក្កដា ឆ្នាំ២០២៦នេះ បានដឹកនាំវេទិកាផ្សព្វផ្សាយអប់រំ និងលើកកម្ពស់ការយល់ដឹងដ៏មានសារៈសំខាន់មួយ ស្តីពីសុខុមាលភាពគ្រួសារ កិច្ចការពារកុមារ និងសុខភាពស្ត្រី។ វេទិកានេះបានប្រព្រឹត្តទៅនៅមណ្ឌលសុខភាពស្វាយលំ សង្កាត់ស្វាយលំ ក្រុងតាខ្មៅ ដោយមានការចូលរួមពីពលរដ្ឋ និងសិស្សសាលាសរុបចំនួន ១៣០នាក់។

លោកស្រី រិន ចាន់ម៉ារីណា បានសង្កត់ធ្ងន់ថា រាជរដ្ឋាភិបាលកម្ពុជាជានិច្ចកាលតែងតែយកចិត្តទុកដាក់ខ្ពស់លើការលើកកម្ពស់សុខុមាលភាពគ្រួសារ ការការពារកុមារ និងសុខភាពស្ត្រី ដែលជាមូលដ្ឋានគ្រឹះដ៏សំខាន់សម្រាប់ការអភិវឌ្ឍសង្គមជាតិប្រកបដោយចីរភាព។ វេទិកាផ្សព្វផ្សាយនាពេលនេះ ត្រូវបានរៀបចំឡើងក្នុងគោលបំណងឆ្លើយតបទៅនឹងបញ្ហាប្រឈមសំខាន់ៗចំនួន ៤។

បញ្ហាទាំងនោះរួមមាន៖ ការទប់ស្កាត់ការកេងប្រវ័ញ្ចផ្លូវភេទលើកុមារតាមប្រព័ន្ធអនឡាញ ដែលជាហានិភ័យធ្ងន់ធ្ងរក្នុងយុគសម័យឌីជីថល។ ការចិញ្ចឹមកូនតាមបែបវិជ្ជមាន ដោយផ្តោតលើការអប់រំដោយក្តីស្រឡាញ់ និងគ្មានអំពើហិង្សា ដើម្បីកសាងផ្លូវចិត្ត និងអនាគតកុមារ។ ការថែទាំសុខភាពមាតា និងទារក ចាប់តាំងពីដំណាក់កាលពពោះ រហូតដល់ក្រោយសម្រាល ដែលទាមទារការទទួលសេវាសុខភាពត្រឹមត្រូវនៅតាមមណ្ឌលសុខភាព។ ជាពិសេស ការការពារ និងពិនិត្យជំងឺមហារីកមាត់ស្បូន និងមហារីកសុដន់ ដែលស្ត្រីគ្រប់រូបត្រូវយល់ដឹងពីវិធីសាស្ត្របង្ការ និងការពិនិត្យសុខភាពជាទៀងទាត់ ដើម្បីស្វែងរក និងព្យាបាលទាន់ពេលវេលា។

លោកស្រីបានបញ្ជាក់ថា លោកស្រីនឹងបន្តចុះទៅមូលដ្ឋានផ្សេងៗទៀត ដើម្បីពង្រីកវិសាលភាពនៃវេទិកាអប់រំនេះ ក្នុងគោលបំណងផ្ដល់ជាប្រយោជន៍ដល់សង្គម ពលរដ្ឋ និងសិស្សសាលាឲ្យកាន់តែទូលំទូលាយឡើងៗ សំដៅរួមចំណែកកសាងសង្គមមួយដែលមានសុខុមាលភាព និងការអភិវឌ្ឍប្រកបដោយចីរភាព៕