(ព្រៃវែង)៖ មន្ត្រីជំនាញរដ្ឋបាលជលផល សហការជាមួយអាជ្ញាធរស្រុកពាមរក៍ ខេត្តព្រៃវែង បានចុះបង្ក្រាបបទល្មើសនេសាទ និងដុតបំផ្លាញចោលឧបករណ៍នេសាទខុសច្បាប់មួយចំនួនធំ នៅក្នុងដែនអភិរក្សកំពង់ចំណា ស្ថិតក្នុងឃុំបាបោង ស្រុកពាមរក៍។ ប្រតិបត្តិការនេះធ្វើឡើងក្នុងគោលបំណងការពារ និងអភិរក្សធនធានមច្ឆាជាតិ ពិសេសក្នុងរដូវបិទនេសាទ។

លោក ហ៊ុន សាវី នាយរងសង្កាត់រដ្ឋបាលជលផលស្ទឹងស្លូត បានបញ្ជាក់ថា ដើម្បីធានាបាននូវនិរន្តរភាពធនធានជលផល មន្ត្រីជំនាញតែងតែចុះល្បាតត្រួតពិនិត្យជាប្រចាំនៅតាមដងស្ទឹង ទន្លេ ព្រែក និងតំបន់អភិរក្សនានា។ កាលពីព្រឹកថ្ងៃទី២២ ខែកក្កដា កម្លាំងចម្រុះដឹកនាំដោយលោក ប៉ែត សាវេន អភិបាលរងស្រុកពាមរក៍ បានចុះល្បាតនៅតាមដងទន្លេតូច និងក្នុងដែនអភិរក្សកំពង់ចំណា ក៏ប្រទះឃើញមានការលួចដាក់របាំងស្បៃមុងជាច្រើនកន្លែង។

ជាលទ្ធផលនៃការបង្ក្រាប មន្ត្រីជំនាញបានដកហូតឧបករណ៍នេសាទខុសច្បាប់រួមមាន ស្បៃមុងប្រវែង ៦៥០ ម៉ែត្រ បង្គោលចម្រឹង ៣៤០ ដើម និងលូស្បៃមុងចំនួន ១២ មាត់។ ឧបករណ៍ទាំងនេះត្រូវបានបំផ្លាញចោលភ្លាមៗនៅនឹងកន្លែង ដើម្បីទប់ស្កាត់ការប្រើប្រាស់បន្ត។

ជាមួយគ្នានោះ កូនត្រីចម្រុះដែលជាប់ក្នុងឧបករណ៍នេសាទទាំងនោះ ត្រូវបានចាក់ព្រលែងចូលទៅក្នុងបឹងធម្មជាតិវិញបានជាង ១០ គីឡូក្រាម។ ប្រតិបត្តិការនេះបង្ហាញពីការប្តេជ្ញាចិត្តរបស់អាជ្ញាធរក្នុងការអនុវត្តច្បាប់ជលផល និងថែរក្សាប្រព័ន្ធអេកូឡូស៊ីទឹកសាបរបស់កម្ពុជា៕