(ព្រៃវែង)៖ លោកស្រី ឯក គន្ធវារី អនុរដ្ឋលេខាធិការ ក្រសួងអភិវឌ្ឍន៍ជនបទ តំណាងលោក ឆាយ ឫទ្ធិសែន រដ្ឋមន្ត្រីក្រសួងអភិវឌ្ឍន៍ជនបទ កាលពីថ្ងៃទី២២ ខែកក្កដា ឆ្នាំ២០២៦ បានអញ្ជើញចុះពិនិត្យ និងវាយតម្លៃដំណាក់កាលទី១ លើការងារថែទាំផ្លូវក្រាលកៅស៊ូប្រភេទពីរជាន់ (DBST) និងផ្លូវក្រាលល្បាយក្រួស ជាលក្ខណៈប្រចាំ ចំនួន ៧ខ្សែ ប្រវែងសរុប ៧៣.៧០០ម៉ែត្រ ស្ថិតនៅស្រុកកញ្ចៀច កំចាយមារ ស្វាយអន្ទរ មេសាង និងស្រុកបាភ្នំ ខេត្តព្រៃវែង។

ក្នុងចំណោមផ្លូវទាំង៧ខ្សែនេះ មានផ្លូវក្រាលកៅស៊ូ DBST ចំនួន ៤ខ្សែ ប្រវែង ៤២.៧០០ម៉ែត្រ ទទឹងខ្នងលើ ៦ម៉ែត្រ និងផ្លូវក្រាលល្បាយក្រួស ចំនួន ៣ខ្សែ ប្រវែង ៣១.០០០ម៉ែត្រ ទទឹងខ្នងលើ ៥ម៉ែត្រ និង៦ម៉ែត្រ។ ការចុះពិនិត្យ និងវាយតម្លៃនេះ ក៏មានការចូលរួមអមដំណើរដោយ លោក ឈន សេដ្ឋា អនុរដ្ឋលេខាធិការ និងក្រុមការងារគណៈកម្មការអន្តរក្រសួង រួមមាន ក្រសួងអភិវឌ្ឍន៍ជនបទ ក្រសួងសេដ្ឋកិច្ច និងហិរញ្ញវត្ថុ ព្រមទាំងក្រុមការងារបច្ចេកទេសពាក់ព័ន្ធជាច្រើនរូបទៀត។

បន្ទាប់ពីបានធ្វើការពិនិត្យ និងវាយតម្លៃយ៉ាងល្អិតល្អន់រួចមក គណៈកម្មការអន្តរក្រសួងបានប្រជុំពិភាក្សា និងសម្រេចឯកភាពទទួលយកនូវការថែទាំផ្លូវជាលក្ខណៈប្រចាំខាងលើ ដោយបញ្ចប់ការថែទាំដំណាក់កាលទី១ ជាស្ថាពរ និងបានត្រឹមត្រូវតាមស្តង់ដាបច្ចេកទេសដែលក្រសួងបានកំណត់។

ក្នុងឱកាសនោះ លោកស្រី អនុរដ្ឋលេខាធិការ ក៏បានណែនាំបន្ថែមដល់មន្ទីរអភិវឌ្ឍន៍ជនបទខេត្តព្រៃវែង ឱ្យបន្តខិតខំថែទាំផ្លូវទាំងនេះឱ្យបានល្អប្រសើរ ដើម្បីជាប្រយោជន៍រួម និងផ្តល់ភាពងាយស្រួលដល់ប្រជាពលរដ្ឋក្នុងការធ្វើដំណើរ និងដឹកជញ្ជូនកសិផលប្រកបដោយសុវត្ថិភាព និងយូរអង្វែង៕