(ស្វាយរៀង)៖ កម្លាំងសមត្ថកិច្ចខេត្តស្វាយរៀង កាលពីរសៀលថ្ងៃទី២២ ខែកក្កដា ឆ្នាំ២០២៦ បានឃាត់ខ្លួនបុរសម្នាក់ឈ្មោះ ហិន រិទ្ធី អាយុ ៤១ឆ្នាំ បន្ទាប់ពីជននេះបានប្រើអំពើហិង្សាលើប្រពន្ធរបស់ខ្លួនឈ្មោះ ឃ្លោក សំអន់ អាយុ ៣៦ឆ្នាំ ដោយសារភ្លើងប្រច័ណ្ឌ។ ហេតុការណ៍នេះបានកើតឡើងនៅត្រង់ចំណុចតូបលក់ដូរមួយកន្លែង ជាប់មាត់ទន្លេវ៉ៃគោ ស្ថិតក្នុងភូមិស្រះវង់ សង្កាត់ស្វាយរៀង ក្រុងស្វាយរៀង។

យោងតាមរបាយការណ៍របស់សមត្ថកិច្ច ជនសង្ស័យឈ្មោះ ហិន រិទ្ធី បានចោទប្រកាន់ប្រពន្ធរបស់ខ្លួនថា លួចលាក់មានសង្សារ រួចក៏បានវាយទៅលើប្រពន្ធចំនួន ២ដៃ ត្រូវចំថ្ពាល់បណ្តាលឲ្យដួលទៅលើដី និងមានស្នាមជាំ។ មិនតែប៉ុណ្ណោះ ជនសង្ស័យថែមទាំងបានយកកាំបិតចិតបន្លែភ្ជង់ប្រពន្ធ ព្រមទាំងស្រែកគម្រាមថា នឹងចាក់សម្លាប់បើសិនជានរណាហ៊ានចូលទៅក្បែរ។

ភ្លាមៗនោះ លោកវរសេនីយ៍ឯក សោម សុភ័ណ្ឌ អធិការនគរបាលក្រុងស្វាយរៀង បានដឹកនាំកម្លាំងនគរបាល សហការជាមួយកម្លាំងកងរាជអាវុធហត្ថខេត្ត ចុះទៅដល់កន្លែងកើតហេតុ ដើម្បីអន្តរាគមន៍។ ក្នុងពេលសមត្ថកិច្ចចូលទៅឃាត់ខ្លួន ជនសង្ស័យបានព្យាយាមយកកាំបិតចាក់ប្រពន្ធចំនួន ២កាំបិតទៀត តែត្រូវបានសមត្ថកិច្ចជួយឃាត់ទាន់ពេលវេលា មិនបណ្តាលឲ្យរងរបួសឡើយ។ បន្ទាប់ពីតដៃជាមួយសមត្ថកិច្ចមួយសន្ទុះ ជនសង្ស័យក៏ត្រូវបានឃាត់ខ្លួនបាន រួមទាំងវត្ថុតាងកាំបិតចិតបន្លែមួយដើម។

បច្ចុប្បន្ន ជនសង្ស័យ រួមទាំងវត្ថុតាង កំពុងត្រូវបានកសាងសំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់៕