(ភ្នំពេញ)៖ លោក តាំង សុខង៉ន់ អគ្គកុងស៊ុលកម្ពុជាប្រចាំទីក្រុងណាននីង (Nanning) ខេត្តក្វាងស៉ី សាធារណរដ្ឋប្រជាមានិតចិន បានបង្ហាញពីឆន្ទៈចង់ឃើញកម្ពុជាជោគជ័យ លើវិស័យកសិកម្មវ័យឆ្លាត (Smart agriculture)។ ហេតុនេះហើយបានជាលោកអគ្គកុងស៊ុល បានខិតខំជំរុញក្នុងការរៀបចំអញ្ជើញសហគ្រិនឆ្នើមៗ ចំនួន ៧៤នាក់ មាន ៦០ក្រុមហ៊ុន ទស្សនកិច្ចនៅកម្ពុជា ចាប់ពីថ្ងៃទី២២ ដល់ថ្ងៃទី២៤ ខែកក្កដា ឆ្នាំ២០២៦។

លោកបានឲ្យដឹងបែបនេះ នៅថ្ងៃទី២៣ ខែកក្កដា ឆ្នាំ២០២៦ ក្នុងឱកាសផ្តល់បទសម្ភាសដល់អ្នកសារព័ត៌មាន ក្នុងវេទិកាកិច្ចសហប្រតិបត្តិការធុរកិច្ច និងវិនិយោគកម្ពុជា និងចិន ក្រោមប្រធានបទ «កម្ពុជា​ស្វាគមន៍ការវិនិយោគពីប្រទេសចិន ដើម្បីអនាគតរួមគ្នា ព្រមទាំងអតីតយុទ្ធជន និងនិវត្តជន» រៀបចំដោយសមាគមអតីតយុទ្ធជន និងនិវត្តជន​ នៅសណ្ឋាគារ Fairfield by Marriott រាជធានីភ្នំពេញ។

លោក តាំង សុខង៉ន់ បានឲ្យដឹងថា ក្វាងស៉ី គឺជាខេត្តមួយដែលមានសក្តានុពលនៅក្នុងវិស័យកសិកម្ម ទាំងធនធានមនុស្ស ទាំងបច្ចេកវិទ្យា មានន័យថា វាជាខេត្តដែលមានសក្តានុពលនៅក្នុងកិច្ចសហប្រតិបត្តិការរបស់កម្ពុជា នៅក្នុងការអភិវឌ្ឍវិស័យកសិកម្មកម្ពុជា។

លោកបានបញ្ជាក់ថា «ដោយសារថា កម្ពុជាយើងមានភូមិសាស្ត្រដ៏សមស្រប មានទឹក អាកាសធាតុ ដី និងគោលនយោបាយរបស់រាជរដ្ឋាភិបាលយើង បានលើកទឹកចិត្តដល់ការវិនិយោគដល់វិស័យកសិកម្ម ហេតុនេះហើយ ថ្ងៃនេះក្នុងចំណោមជាង ៧០រូប នៃធុរជន ទាំងអ្នកបច្ចេកទេស អ្នកសិក្សាស្រាវជ្រាវ ក៏ដូចជាបច្ចេកវិទ្យាពាក់ព័ន្ធនឹងកសិកម្មវ័យឆ្លាត (Smart agriculture) ដែលនឹងអាចចូលរួមចំណែកអភិវឌ្ឍវិស័យកសិកម្មរបស់យើង ឲ្យកាន់តែមានភាពល្អប្រសើរឡើង និងទិន្នផលកាន់តែខ្ពស់ ការចំណាយកាន់តែតិច»។

សូមជម្រាបថា ចាប់ពីថ្ងៃទី២២ ដល់ថ្ងៃទី២៤ ខែកក្កដា ឆ្នាំ២០២៦ លោក ឈី ហ្វាង (Qi Fang) សមាជិកក្រុមប្រឹក្សានៃសមាគម ជីហ្វា (GIFA) និងជាប្រធានគណៈប្រតិភូសម្រាប់ក្រុមអ្នកវិនិយោគ បានដឹកនាំសហគ្រិនឆ្នើមៗ ចំនួន ៧៤នាក់ មាន ៦០ក្រុមហ៊ុន ទស្សនកិច្ចនៅកម្ពុជា ដែលមកពីតំបន់ជាច្រើនដូចជា ក្វាងស៊ី, ក្វាងទុង, ស៊ីឈួន, ហ្វូចៀន, ប៉េកាំង, ឆុងឈីង និងហុងកុង ដោយគ្របដណ្តប់លើវិស័យជាច្រើនរួមមានថាមពល និងថាមពលកកើតឡើងវិញ, យានយន្តថាមពលថ្មី និងការផលិតយានយន្ត, កសិកម្ម និងការកែច្នៃផលិតផលកសិកម្ម, សុខភាព និងបច្ចេកវិទ្យាវេជ្ជសាស្ត្រ, បញ្ញាសិប្បនិម្មិត (AI) និងបច្ចេកវិទ្យាឌីជីថល, ការផលិតបែបឧស្សាហកម្ម, ការកសាងហេដ្ឋារចនាសម្ព័ន្ធ, ការប្លង់ និងការរចនាស្ថាបត្យកម្ម, ពាណិជ្ជកម្មអេឡិចត្រូនិកឆ្លងដែន (E-commerce), ឡូជីស្ទីកទំនើប និងខ្សែច្រវ៉ាក់ផ្គត់ផ្គង់, ឧស្សាហកម្មទេសចរណ៍ និងសណ្ឋាគារ, សេវាកម្មហិរញ្ញវត្ថុ និងវិជ្ជាជីវៈផ្សេងៗទៀត៕