(ភ្នំពេញ)៖ លោកស្រី Zhu Shaodan ធុរជនក្នុងវិស័យហិរញ្ញវត្ថុ នៅទីក្រុងហុងកុង និងជាគណៈប្រតិភូចិន ១រូប ដែលមកចូលរួមវេទិកាកិច្ចសហប្រតិបត្តិការធុរកិច្ច និងវិនិយោគកម្ពុជា និងចិន បានលើកឡើងថា រាជធានីភ្នំពេញរីកចម្រើន និងអភិវឌ្ឍបានលឿន ទាំងពីអគារ និងហេដ្ឋារចនាសម្ព័ន្ធ។

ធុរជនដែលបានមកកម្ពុជា ចំនួន ៣ដងរូបនេះ បានលើកឡើងទៀតថា សព្វថ្ងៃខ្លួនក៏បានវិនិយោគនៅកម្ពុជា រួចហើយដែរ ព្រោះតែបរិយាកាសវិនិយោគអំណោយផល។

លោកស្រីបានឲ្យដឹងបែបនេះ នៅថ្ងៃទី២៣ ខែកក្កដា ឆ្នាំ២០២៦ ក្នុងឱកាសផ្តល់បទសម្ភាសដល់អ្នកសារព័ត៌មាន ក្នុងវេទិកាកិច្ចសហប្រតិបត្តិការធុរកិច្ច និងវិនិយោគកម្ពុជា និងចិន ក្រោមប្រធានបទ «កម្ពុជា​ស្វាគមន៍ការវិនិយោគពីប្រទេសចិន ដើម្បីអនាគតរួមគ្នា ព្រមទាំងអតីតយុទ្ធជន និងនិវត្តជន» រៀបចំដោយសមាគមអតីតយុទ្ធជន និងនិវត្តជន​ នៅសណ្ឋាគារ Fairfield by Marriott រាជធានីភ្នំពេញ។

លោកស្រី Zhu Shaodan បានបញ្ជាក់ថា «ខ្ញុំមើលឃើញភ្នំពេញរីកចម្រើន និងអភិវឌ្ឍបានលឿន ទាំងពីអគារ និងហេដ្ឋារចនាសម្ព័ន្ធ។ ខ្ញុំគិតថា បើសិនជាលើកនេះមិនចាប់ឱកាសវិនិយោគ ៥ឆ្នាំទៀត ខ្ញុំនឹងយឺតជាងគេ។ អីចឹងចាប់ពីពេលនេះរហូតដល់ ៥ឆ្នាំទៅមុខទៀត កាន់តែរីកចម្រើនថែមទៀត។ ខ្ញុំមើលឃើញឱកាសវិនិយោគមានសក្តានុពលល្អ សម្រាប់ខ្ញុំដែលជាជនជាតិចិន ហើយដោយសារឆ្លងកាត់តាមសមាគមផង ខ្ញុំគិតថា ទុកចិត្តបាន ១០០% បើសិនជាសម្រេចចិត្តដាក់ទុនវិនិយោគនៅទីនេះ។

លោកស្រី មើលឃើញថា ទៅថ្ងៃអនាគត ភ្នំពេញមិនមែនត្រឹមនេះទេ តែនឹងមានការអភិវឌ្ឍរីកចម្រើនទៅមុខទៀត ហើយលោកស្រីមានអារម្មណ៍ថា ទីនេះសមស្របក្នុងការវិនិយោគ។ បន្ថែមលើនេះ ក្នុងចំណោមធុរជនជាង ៧០រូប នឹងមានធុរជនសំឡឹងមើលឃើញរាជធានីភ្នំពេញ ឆ្ពោះទៅមុខ និងសមស្របសម្រាប់ចាប់ឱកាសវិនិយោគដូចគ្នាដែរ។

សូមជម្រាបថា ចាប់ពីថ្ងៃទី២២ ដល់ថ្ងៃទី២៤ ខែកក្កដា ឆ្នាំ២០២៦ លោក ឈី ហ្វាង (Qi Fang) សមាជិកក្រុមប្រឹក្សានៃសមាគម ជីហ្វា (GIFA) និងជាប្រធានគណៈប្រតិភូសម្រាប់ក្រុមអ្នកវិនិយោគ បានដឹកនាំសហគ្រិនឆ្នើមៗ ចំនួន ៧៤នាក់ មាន ៦០ក្រុមហ៊ុន ទស្សនកិច្ចនៅកម្ពុជា ដែលមកពីតំបន់ជាច្រើនដូចជា ក្វាងស៊ី, ក្វាងទុង, ស៊ីឈួន, ហ្វូចៀន, ប៉េកាំង, ឆុងឈីង និងហុងកុង ដោយគ្របដណ្តប់លើវិស័យជាច្រើនរួមមានថាមពល និងថាមពលកកើតឡើងវិញ, យានយន្តថាមពលថ្មី និងការផលិតយានយន្ត, កសិកម្ម និងការកែច្នៃផលិតផលកសិកម្ម, សុខភាព និងបច្ចេកវិទ្យាវេជ្ជសាស្ត្រ, បញ្ញាសិប្បនិម្មិត (AI) និងបច្ចេកវិទ្យាឌីជីថល, ការផលិតបែបឧស្សាហកម្ម, ការកសាងហេដ្ឋារចនាសម្ព័ន្ធ, ការប្លង់ និងការរចនាស្ថាបត្យកម្ម, ពាណិជ្ជកម្មអេឡិចត្រូនិកឆ្លងដែន (E-commerce), ឡូជីស្ទីកទំនើប និងខ្សែច្រវ៉ាក់ផ្គត់ផ្គង់, ឧស្សាហកម្មទេសចរណ៍ និងសណ្ឋាគារ, សេវាកម្មហិរញ្ញវត្ថុ និងវិជ្ជាជីវៈផ្សេងៗទៀត៕