(កែប)៖​ លោក ឈិត សុខុន ប្រធានគណៈកម្មការទី៧ នៃព្រឹទ្ធសភា នារសៀលថ្ងៃទី២៣ ខែកក្កដា ឆ្នាំ២០២៦នេះ បានដឹកនាំគណៈប្រតិភូពាក់ព័ន្ធចុះជំនួបពិភាក្សា​ ដើម្បីឈ្វេងយល់ និងប្រមូលព័ត៌មានអំពីវឌ្ឍនភាពការងារបញ្ហាប្រឈម និងចក្ខុវិស័យ របស់រដ្ឋបាលខេត្ត ដោយទទួល​ស្វាគមន៍​ ពីសំណាក់ លោក អ៊ុក ថា ប្រធានក្រុមប្រឹក្សាខេត្ត និងលោក សោម ពីសិដ្ឋ អភិបាលខេត្តកែប ព្រមទាំងមន្ទីរជំនាញចំនួន៤ និងវិស័យពាក់ព័ន្ធ នៅសាលប្រជុំសាលាខេត្តកែប។

ក្នុងឱកាសនោះលោក សោម ពិសិដ្ឋ បានបញ្ជាក់ឱ្យដឹងថា ខេត្តកែប បាននិងកំពុងអភិវឌ្ឍលើគ្រប់វិស័យ ទាំងហេដ្ឋារចនាសម្ព័ន្ធជារូបវន្ត ការផ្តល់សេវាសាធារណៈ និងការអភិរក្សធនធានធម្មជាតិ ដែលជាកត្ដាដ៏សំខាន់ ក្នុងការជួយជំរុញកំណើនវិស័យទេសចរណ៍ និងសំដៅធានាបាននូវស្ថិរភាពសេដ្ឋកិច្ចមូលដ្ឋាន។ ទន្ទឹមនោះវឌ្ឍនភាពជាក់ស្តែង សម្រាប់ឆមាសទី១ ឆ្នាំ២០២៦ លើវិស័យទាំង៤ រួមមាន អប់រំយុវជន​ និងកីឡា, ធម្មការ​ និងសាសនា, វប្បធម៌វិចិត្រសិល្បៈ, ទេសចរណ៍ ក៏បានឆ្លុះបញ្ចាំងអំពីធនធានមនុស្ស ការថែរក្សាតំលៃវប្បធម៌ សីលធម៌សង្គម ការផ្តល់សេវាកម្មប្រកបដោយបរិយាបន្នជូនដល់ប្រជាពលរដ្ឋ​ និងភ្ញៀរទេសចរ បានយ៉ាងល្អប្រសើរ។

ជាមួយគ្នានេះលោក ឈិត សុខុន បានកោតសរសើរ និងវាយតំលៃខ្ពស់ ចំពោះរដ្ឋបាលខេត្តកែប និងមន្ទីរជំនាញទាំង៤ ព្រមទាំងវិស័យពាក់ព៏ន្ធ ដែលបានយកចិត្តទុកដាក់ខ្ពស់ និងសហការគ្នាអនុវត្តបានយ៉ាងល្អ​ ស្របតាមគោលនយោបាយផែនការយុទ្ធសាស្ត្រ របស់រាជរដ្ឋាភិបាល។

លោកប្រធានគណៈកម្មការទី៧ នៃព្រឹទ្ធសភា ក៏បានផ្ដល់អនុសាសន៍មួយចំនួន ជូនដល់​រដ្ឋបាលខេត្ត មន្ទីរជំនាញទាំង៤ និងវិស័យពាក់ព័ន្ធ ត្រូវបន្តចូលរួមចំណែកអភិវឌ្ឍនូវសមិទ្ធផលនានា ជាបន្តទៀត ដើម្បីជួយជំរុញកំណើនសេដ្ឋកិច្ច​ និងជីវភាពរស់នៅរបស់ប្រជាពលរដ្ឋឱ្យកាន់តែល្អប្រសើរបន្ថែមទៀត៕