ឯកអគ្គរដ្ឋទូតបារាំង និងអភិបាលរាជធានីភ្នំពេញ ជួបពិភាក្សាការងារពង្រឹងកិច្ចសហប្រតិបត្តិការទ្វេភាគី
24-07-2026 08:34
(ភ្នំពេញ)៖ លោក អូលីវិយេ រីស្ហា ឯកអគ្គរដ្ឋទូត នៃសាធារណរដ្ឋបារាំង ប្រចាំព្រះរាជាណាចក្រកម្ពុជា នៅរសៀលថ្ងៃទី២៣ ខែកក្កដា ឆ្នាំ២០២៦ បានអញ្ជើញជួបសម្តែងការគួរសម និងពិភាក្សាការងារជាមួយលោក ឃួង ស្រេង អភិបាលរាជធានីភ្នំពេញ នៅសាលារាជធានីភ្នំពេញ ដើម្បីពង្រឹងទំនាក់ទំនងកិច្ចសហប្រតិបត្តិការរវាងប្រទេសទាំងពីរឱ្យកាន់តែល្អប្រសើរ។
ក្នុងជំនួបនោះ លោកឯកអគ្គរដ្ឋទូតបានលើកឡើងថា ជំនួបរវាងប្រធានាធិបតីបារាំង លោក អេម៉ានុយអែល ម៉ាក្រុង និងសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា នៅខែវិច្ឆិកា ឆ្នាំ២០២៦ ខាងមុខនេះ នឹងរួមចំណែកធ្វើឱ្យទំនាក់ទំនងកិច្ចសហប្រតិបត្តិការទ្វេភាគីកាន់តែរឹងមាំ ខណៈកម្ពុជាមានការអភិវឌ្ឍរីកចម្រើនលើគ្រប់វិស័យ។
លោកក៏បានកត់សម្គាល់ពីការផ្លាស់ប្តូរ និងភាពទំនើបនៃរាជធានីភ្នំពេញយ៉ាងខ្លាំង បើប្រៀបធៀបនឹងរយៈពេល ៣០ឆ្នាំមុន។ បារាំងបានជួយកម្ពុជាយ៉ាងច្រើន ដូចជាវិស័យទឹកស្អាត អគ្គិសនី និងវិស័យផ្សេងៗទៀត។ លោកឯកអគ្គរដ្ឋទូតបានបន្តថា បារាំងនឹងបន្តសហការជាមួយរដ្ឋបាលរាជធានីភ្នំពេញ ជាពិសេសតាមរយៈទីភ្នាក់ងារបារាំងសម្រាប់អភិវឌ្ឍន៍ (AFD) លើបញ្ហាគ្រប់គ្រងទឹកកខ្វក់នៅភាគខាងជើងរាជធានីភ្នំពេញ ហើយនឹងមានការចុះអនុស្សរណៈនៃការយោគយល់គ្នា (MoU) មុនដំណើរទស្សនកិច្ចផ្លូវរដ្ឋរបស់ប្រធានាធិបតីបារាំង។
ជាការឆ្លើយតប លោក ឃួង ស្រេង បានជម្រាបជូនអំពីស្ថានភាពទូទៅ និងការរីកចម្រើនរបស់រាជធានីភ្នំពេញលើគ្រប់វិស័យនាប៉ុន្មានឆ្នាំចុងក្រោយនេះ។ លោកអភិបាលបានថ្លែងអំណរគុណចំពោះការជួយជ្រោមជ្រែងរបស់បារាំងកន្លងមក ទាំងបញ្ហាទឹកស្អាត អគ្គិសនី ហេដ្ឋារចនាសម្ព័ន្ធ និងជាពិសេសការនាំមកនូវសន្តិភាពដល់កម្ពុជា តាមរយៈកិច្ចចរចាសន្តិភាពទីក្រុងប៉ារីស។
លោកក៏បានបញ្ជាក់ថា រដ្ឋបាលរាជធានីភ្នំពេញបានត្រៀមខ្លួនរួចរាល់ហើយ ក្នុងការការពារសន្តិសុខ សុវត្ថិភាព សម្រាប់កិច្ចប្រជុំកំពូលហ្វ្រង់កូហ្វូនី និងដំណើរទស្សនកិច្ចរបស់លោកប្រធានាធិបតីបារាំង នៅខែវិច្ឆិកា ឆ្នាំ២០២៦ ខាងមុខនេះ។
