(កំពង់ធំ)៖ ក្រុមគ្រូពេទ្យស្ម័គ្រចិត្តមកពីខេត្តឃ្យុងសាងប៊ុកដូ នៃសាធារណរដ្ឋកូរ៉េ បានអញ្ជើញមកពិនិត្យ និងព្យាបាលជំងឺជូនប្រជាពលរដ្ឋនៅខេត្តកំពង់ធំដោយឥតគិតថ្លៃ រយៈពេលពីរថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែកក្កដា ឆ្នាំ២០២៦។ សកម្មភាពមនុស្សធម៌នេះ ធ្វើឡើងនៅមន្ទីរពេទ្យបង្អែកខេត្តកំពង់ធំ ក្រោម «កម្មវិធីអ្នកតំណាងរាស្ត្រដើម្បីសុខភាពប្រជាជន»។

កិច្ចសហប្រតិបត្តិការដ៏មានសារៈសំខាន់នេះ កើតចេញពីចំណងមិត្តភាពរវាងខេត្តឃ្យុងសាងប៊ុកដូ និងក្រុមប្រឹក្សាវប្បធម៌អាស៊ី (ACC) ព្រមទាំងក្រោមការសម្របសម្រួលយ៉ាងយកចិត្តទុកដាក់ពីសំណាក់ លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងជាអ្នកតំណាងរាស្រ្តមណ្ឌលខេត្តកំពង់ធំ។ ក្រុមគ្រូពេទ្យស្ម័គ្រចិត្តកូរ៉េ បានសហការយ៉ាងជិតស្និទ្ធជាមួយមន្ទីរពេទ្យបង្អែកខេត្តកំពង់ធំ និងសមាគមប្រឹក្សាសុខភាពប្រជាជន ដើម្បីផ្តល់សេវាព្យាបាលប្រកបដោយគុណភាពខ្ពស់។

សេវាវេជ្ជសាស្ត្រដែលបានផ្តល់ជូនរួមមាន ការពិនិត្យជំងឺទូទៅ ជំងឺមាត់ធ្មេញ ការថតឆ្លុះក្រពះ ពោះវៀន រោគស្ត្រី ជំងឺកុមារ ចក្ខុរោគ (ជំងឺភ្នែក) និងការចាក់ម្ជុលវិទ្យាសាស្ត្រ។ លើសពីនេះ ក្រុមគ្រូពេទ្យក៏បានធ្វើតេស្តឈាមដោយប្រើប្រាស់បរិក្ខារវេជ្ជសាស្ត្រទំនើបៗ និងបានផ្តល់ឱសថដោយឥតគិតថ្លៃផងដែរ ដើម្បីធានាបាននូវប្រសិទ្ធភាពព្យាបាល។

នៅថ្ងៃទីមួយនៃកម្មវិធី គឺថ្ងៃទី២៤ ខែកក្កដា ឆ្នាំ២០២៦ ប្រជាពលរដ្ឋជាច្រើនមកពីបណ្តាស្រុកនានាក្នុងខេត្ត បានអញ្ជើញមកទទួលសេវាព្យាបាលជំងឺដោយឥតគិតថ្លៃនេះយ៉ាងច្រើនកុះករ។ កម្មវិធីនេះបានបង្ហាញពីការយកចិត្តទុកដាក់ខ្ពស់ចំពោះសុខភាពសាធារណៈ និងបានរួមចំណែកយ៉ាងសំខាន់ក្នុងការលើកកម្ពស់សុខុមាលភាពរបស់ប្រជាពលរដ្ឋក្នុងខេត្តកំពង់ធំ៕