(ព្រៃវែង)៖ លោកស្រី ឈី វិជ្ជរ៉ា រដ្ឋលេខាធិការក្រសួងមុខងារសាធារណៈ តំណាងឧបនាយករដ្ឋមន្ដ្រី ហ៊ុន ម៉ានី រដ្ឋមន្ដ្រីក្រសួងមុខងារសាធារណៈ និងជាប្រធានគណៈកម្មការជំរឿន នៅថ្ងៃទី២៤ ខែកក្កដា ឆ្នាំ២០២៦ បានប្រកាសបើកយុទ្ធនាការចុះធ្វើជំរឿនមន្ដ្រីជាក់ស្ដែង នៅតាមរចនាសម្ព័ន្ធ នៃគ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាននៅខេត្តព្រៃវែង។

យុទ្ធនាការជំរឿននេះបានប្រព្រឹត្តទៅនៅសាលខេត្តព្រៃវែង ដោយមានការចូលរួមពីលោក ឡុង ថាត សមាជិកក្រុមប្រឹក្សាខេត្ត និងលោក អន ភារៈ អភិបាលរងខេត្ត តំណាងលោក សួន សុម៉ាលីន អភិបាលខេត្ត។

ក្នុងឱកាសនោះ លោក អន ភារៈ បានលើកឡើងថា ការងារដឹកនាំគ្រប់គ្រងរដ្ឋបាល និងមន្ត្រីរាជការ ខេត្តបានខិតខំពង្រឹងការងារដឹកនាំគ្រ​ប់​គ្រ​ង​បានល្អប្រសើរ ធ្វើឲ្យមន្ត្រីរាជការទាំងអស់មានភាពកក់ក្ដៅ និងជឿជាក់លើការដឹកនាំរបស់រាជរដ្ឋាភិបាល​កម្ពុជា។ ដោយឡែកលើការងារដឹកនាំគ្រប់គ្រងរដ្ឋបាល និងមន្ត្រីរាជការខេត្ត បានខិតខំពង្រឹងការងារដឹកនាំគ្រប់គ្រង បានល្អប្រសើរ ធ្វើឲ្យមន្ត្រីរាជការទាំងអស់មានភាពកក់ក្តៅ និងជឿជាក់លើការដឹកនាំរបស់រាជរដ្ឋាភិបាលកម្ពុជា។ ជាក់ស្តែង មន្ត្រីរាជការស៊ីវិលសរុបក្នុងខេត្ត មានចំនួនស្រុក១២,៤៥១នាក់ ស្រីចំនួន៥,៥៧៨នាក់។

លើសពីនេះ លោកអភិបាលរងខេត្ត បានបញ្ជាក់បន្ថែមថា គិតមកដល់ពេលនេះ ក្រុមការងារមន្ទីរមុខងារសាធារណៈខេត្ត បានបញ្ចប់១០០% លើការពិនិត្យផ្ទៀងផ្ទាត់ទិន្នន័យការធ្វើបច្ចុប្បន្នភាពរចនាសម្ព័ន្ធ គ្រឹះស្ថានសិក្សាសាធារណៈ និងអង្គភាពសុខាភិបាលមូលដ្ឋាន រួមមាន សាលាមត្តេយ្យសិក្សា និងសាលាបឋមសិក្សា សរុបមានចំនួន៥៨៣សាលា។ សាលាអនុវិទ្យាល័យ និងសាលាវិទ្យាល័យ សរុបមានចំនួន១២៥សាលា។ មណ្ឌលសុខភាព សរុបមានចំនួន១១៣មណ្ឌល។ មន្ទីរពេទ្យផ្តល់សេវាបង្គ្រប់សកម្មភាពកម្រិត១ និងកម្រិត២ សរុបមានចំនួន១១។

ជាមួយគ្នានេះ លោកស្រី ឈី វិជ្ជរ៉ា បានថ្លែងថា ការធ្វើជំរឿនមន្ដ្រីនេះ គឺធានាឲ្យបាននូវបច្ចុប្បន្នភាពទិន្នន័យមន្ត្រីរាជការស៊ីវិល គ្រូបង្រៀន និងបុគ្គលិកសុខាភិបាល ដែលកំពុងបំពេញភារកិច្ចជាក់ស្តែងតាមអង្គភាព។ បង្កើនការទទួលខុសត្រូវ តម្លាភាព និងការបែងចែកកម្លាំងពលកម្ម ឲ្យចំគោលដៅនៅតាមគ្រឹះស្ថានសិក្សាសាធារណៈ និងមន្ទីរពេទ្យ/មណ្ឌលសុខាភិបាលមូលដ្ឋាន។ ជាមូលដ្ឋានទិន្នន័យដ៏រឹងមាំ សម្រាប់រាជរដ្ឋាភិបាល ក្នុងការរៀបចំគោលនយោបាយ និងផែនការអភិវឌ្ឍធនធានមនុស្សឲ្យកាន់តែមានប្រសិទ្ធភាពខ្ពស់។

លោកស្រីបានបន្ថែមថា យុទ្ធនាការនេះ គឺជាផ្នែកមួយយ៉ាងសំខាន់ នៃបេសកកម្មកែទម្រង់រដ្ឋបាលសាធារណៈរបស់រាជរដ្ឋាភិបាល ដើម្បីធានាថាការផ្តល់សេវាសាធារណៈជូនប្រជាពលរដ្ឋ ក្នុងវិស័យអប់រំ និងសុខាភិបាល កាន់តែមានគុណភាព និងខិតជិតប្រជាពលរដ្ឋនៅមូលដ្ឋាន។ បន្ថែមលើសពីនេះ លោកស្រីបានស្នើឲ្យអាជ្ញាធរដែនដីគ្រប់លំដាប់ថ្នាក់ និងប្រធានអង្គភាពពាក់ព័ន្ធក្នុងខេត្តព្រៃវែង ចូលរួមសហការជាមួយក្រុមការងារបច្ចេកទេសជំរឿន ឲ្យបានជិតស្និទ្ធ ដើម្បីឲ្យដំណើរការចុះស្រង់ទិន្នន័យនេះ ប្រព្រឹត្តទៅដោយរលូន និងទទួលបានលទ្ធផលជោគជ័យតាមផែនការគ្រោងទុក។

ក្នុងឱកាសនោះ លោកស្រី ឈី វិជ្ជរ៉ា បានអញ្ជើញចុះពិនិត្យការធ្វើជំរឿនមន្ត្រីដោយផ្ទាល់ ដែលបានអនុវត្តនូវសាលាបឋមសិក្សា ហ៊ុន សែន ព្រៃវែងក្រុង និងមណ្ឌលសុខភាព ជា ស៊ីម កំពង់ លាវក្រុងព្រៃវែង ផងដែរ៕