(ស្ទឹងត្រែង)៖ នៅថ្ងៃទី២៤ ខែកក្កដា ឆ្នាំ២០២៦ ក្រសួងទេសចរណ៍ សហការជាមួយរដ្ឋបាលខេត្តស្ទឹងត្រែង បានរៀបចំ «វេទិកាអេកូទេសចរណ៍ផ្សព្វផ្សាយសាធារណៈកម្រិតបច្ចេកទេសថ្នាក់តំបន់» នៅសណ្ឋាគារអង្គរមាស ខេត្តស្ទឹងត្រែង។

វេទិកានេះមានគោលបំណងសំខាន់ក្នុងការជំរុញការពិភាក្សា និងការចែករំលែកបទពិសោធន៍លើការអភិវឌ្ឍអេកូទេសចរណ៍ ការអភិរក្សធនធានធម្មជាតិ និងការលើកកម្ពស់ជីវភាពសហគមន៍មូលដ្ឋាន នៅតំបន់ភូមិភាគឦសាន និងតំបន់ព្រៃឡង់ ដែលមានសក្តានុពលខ្ពស់។

ពិធីនេះបានប្រព្រឹត្តទៅក្រោមវត្តមានរបស់លោកបណ្ឌិត ជុក ជំនោរ អគ្គនាយកអភិវឌ្ឍន៍ទេសចរណ៍ និងសហប្រតិបត្តិការអន្តរជាតិ និងជាប្រធានលេខាធិការដ្ឋាន គ.ជ.អ.អ. រួមជាមួយលោក សែម វ៉ាន ស៊ីម អភិបាលរងខេត្តស្ទឹងត្រែង។ វេទិកាបានប្រមូលផ្តុំអ្នកពាក់ព័ន្ធជាច្រើនរូប រួមមានតំណាងមន្ទីរ អង្គភាព ស្ថាប័នពាក់ព័ន្ធ អង្គការដៃគូអភិវឌ្ឍន៍ អាជ្ញាធរមូលដ្ឋាន និងតំណាងសហគមន៍។

ថ្លែងក្នុងឱកាសនោះ លោក សែម វ៉ាន ស៊ីម បានគូសបញ្ជាក់ថា ខេត្តស្ទឹងត្រែង ដែលត្រូវបានគេស្គាល់ថាជា «ទឹកដីជំនួបនៃទន្លេបួន» មានប្រព័ន្ធអេកូឡូស៊ីធម្មជាតិ និងវប្បធម៌ដ៏សម្បូរបែប។ លោកបានបន្ថែមថា ខេត្តបានដាក់ចេញនូវយុទ្ធសាស្ត្រផ្សព្វផ្សាយថ្មី «ស្ទឹងត្រែងលើសពីទន្លេ លើសពីធម្មតា» ដើម្បីទាក់ទាញភ្ញៀវទេសចរ និងវិនិយោគិន។

លោកបណ្ឌិត ជុក ជំនោរ បានសង្កត់ធ្ងន់ថា អេកូទេសចរណ៍គឺជាវិស័យសំខាន់ក្នុងការរួមចំណែកការពារបរិស្ថាន និងជំរុញការអភិវឌ្ឍសេដ្ឋកិច្ចបៃតង។ លោកបានលើកឡើងថា ក្រសួងទេសចរណ៍កំពុងផ្តោតលើការអភិវឌ្ឍ អេកូទេសចរណ៍ដោយផ្អែកលើគោលការណ៍ចីរភាព ការចូលរួមរបស់សហគមន៍ និងការពង្រឹងសមត្ថភាពអ្នកពាក់ព័ន្ធ។

លោកក៏បានអំពាវនាវឲ្យគ្រប់ភាគីបន្តរួមគ្នាការពារធនធានធម្មជាតិ និងលើកកម្ពស់គុណភាពសេវាកម្មទេសចរណ៍ ដើម្បីធានាថាអេកូទេសចរណ៍នឹងក្លាយជាប្រភពចំណូលសម្រាប់ប្រជាពលរដ្ឋ និងជាគន្លងសម្រាប់ការអភិវឌ្ឍសេដ្ឋកិច្ចក្នុងតំបន់ប្រកបដោយចីរភាព៕