(ភ្នំពេញ)៖ ដោយមានការគាំទ្រពីភេសជ្ជៈ Pocari Sweat ក្រុមបាល់ទាត់ FCA ដែលដឹកនាំដោយលោក លឹម ជាវុត្ថា អគ្គនាយកបណ្តាញព័ត៌មាន Fresh News កម្មវិធីផ្ញើសារ CoolApp និងកម្មវិធីឆ្លាតវៃ Fresh AI នឹងត្រូវជួបប្រកួតមិត្តភាពតតាំងគ្នាលើវាលស្មៅ ជាមួយក្រុមបាល់ទាត់កងរាជអាវុធហត្ថរាជធានីភ្នំពេញ នៅតារាងបាល់ទាត់ឃីងស្ពត នាល្ងាចថ្ងៃទី២៥ ខែកក្កដា ឆ្នាំ២០២៦ ដើម្បីរឹតចំណងមិត្តភាព និងសុខភាព។

នេះជាការប្រកួតមិត្តភាពលើកទី២ រវាងក្រុមបាល់ទាត់ទាំងពីរ ដើម្បីបង្កបរិយាកាសសប្បាយរីករាយ បង្កើនមិត្តភាព និងសុខភាពសម្រាប់បុគ្គលិក និងមន្ត្រីនៃអង្គភាពទាំងពីរ។

គួររំលឹកថា ការប្រកួតមិត្តភាពលើកទី១ កាលពីថ្ងៃទី៦ ខែមិថុនា ឆ្នាំ២០២៦ ក្រុមទាំងពីរទទួលបានលទ្ធផលស្មើគ្នា ១៣:១៣។ ចុះនៅថ្ងៃស្អែកនេះ តើលទ្ធផលនឹងប្រែប្រួលបែបណា?

ទោះបីត្រូវតតាំងគ្នាលើវាលស្មៅក្តី តែថ្នាក់ដឹកនាំនៃស្ថាប័នទាំងពីរ មិនផ្តោតលើលទ្ធផលនោះទេ អ្វីដែលសំខាន់បំផុត គឺមិត្តភាព និងសុខភាពប៉ុណ្ណោះ។

សូមជម្រាបថា ក្នុងគោលបំណងជួយឱ្យបុគ្គលិក មានសុខភាពល្អ រហ័សរហួន ពង្រឹងសាមគ្គីភាព មិត្តភាព លោក លឹម ជាវុត្ថា បានបង្កើតឱ្យក្រុមបាល់ទាត់ប្រចាំអង្គភាពនេះឡើង ដើម្បីប្រកួតក្នុងក្របខណ្ឌផ្ទៃក្នុងផង និងប្រកួតមិត្តភាពជាមួយស្ថាប័នផ្សេងៗផង។

លោកអគ្គនាយកជាប្រចាំតែងតែណែនាំ អូសទាញឱ្យបុគ្គលិកទាំងអស់ ជាពិសេសបុគ្គលិកដែលមានសុខភាពមិនសូវល្អ និងមានជំងឺ នាំគ្នាលេងកីឡា ឬហាត់ប្រាណឱ្យបានគ្រប់គ្នា ដើម្បីសុខភាព ព្រោះមានសុខភាពល្អ ទើបមានអ្វីៗតាមក្រោយ៕