ខួបមួយឆ្នាំនៃសង្គ្រាមឈ្លានពាន, សម្តេចមហាបវរធិបតី បង្ហាញការដឹងគុណ និងអរគុណដល់កងកម្លាំង និងក្រើនរំលឹកពលរដ្ឋប្រែក្លាយការឈឺចាប់ ទៅជាការពង្រឹងខ្លួន (Video inside)
24-07-2026 21:14
(ភ្នំពេញ)៖ ខួបមួយឆ្នាំនៃសង្គ្រាមឈ្លានពានរបស់កងទ័ពថៃ មកលើបូរណភាពទឹកដីកម្ពុជានាថ្ងៃទី២៤ ខែកក្កដា នេះ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានសម្តែងការដឹងគុណយ៉ាងជ្រាលជ្រៅចំពោះវីរៈកងកម្លាំង រួមមានកងទ័ព នគរបាលជាតិ និងកងរាជអាវុធហត្ថដែលបានពលីជីវិតដើម្បីបុព្វហេតុការពារទឹកដី។ សម្តេចមហាបវរធិបតី ក៏បានកោតសរសើរចំពោះវីរយុទ្ធជន ដែលកំពុងឈរជើងនៅជួរមុខ ដើម្បីការពារអធិតេយ្យភាព បូរណភាពទឹកដី និងរក្សាសេចក្ដីសុខសាន្តរបស់ប្រជាជន។
សម្តេចមហាបវរធិបតី បានបង្ហាញការដឹងគុណ និងអរគុណដល់វីរៈកងកម្លាំង នៅក្នុងឱកាសដឹកនាំកិច្ចប្រជុំគណៈរដ្ឋមន្ត្រីនាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦នេះ។
ខួបមួយឆ្នាំនៃការឈ្លានពាននេះ សម្តេចមហាបវរធិបតីនាយករដ្ឋមន្ត្រី ក៏បានក្រើនរម្លឹកដល់ប្រជាជាតិខ្មែរឱ្យប្រែក្លាយការឈឺចាប់នេះ ទៅជាការពង្រឹងខ្លួនលើគ្រប់វិស័យទាំងសេដ្ឋកិច្ច ការពារជាតិ និងធនធានមនុស្សជាដើម៕
