(ឧត្តរមានជ័យ)៖ នៅថ្ងៃទី២៤ ខែកក្កដា ឆ្នាំ២០២៥ ថ្ងៃទី២៤ ខែកក្កដា ឆ្នាំ២០២៦ អូសរំលងរយៈពេល ១ឆ្នាំ ច្រកទ្វារអន្តរជាតិអូស្មាច់ ក្នុងក្រុងសំរោង ខេត្តឧត្តរមានជ័យ ដែលធ្លាប់តែមានសភាពអ៊ូអរ និងជាទីប្រជុំពាណិជ្ជកម្មដ៏សំខាន់មួយ ត្រូវបានបាត់បង់ភាពអ៊ូអរ ទីតាំងផ្លាស់ប្តូរពាណិជ្ជកម្មដ៏មញាញឹកនៅតាមព្រំដែន ដោយសារតែការឈ្លានពាន និងការរំលោភបំពានព្រំដែនពីសំណាក់យោធាថៃ។

ការបាត់បង់សកម្មភាពពាណិជ្ជកម្ម និងការជួបជុំនៅផ្សារថ្មអូស្មាច់ គឺជាផលប៉ះពាល់មួយក្នុងចំណោមផលប៉ះពាល់ជាច្រើនដែលបណ្តាលមកពីជម្លោះព្រំដែននេះ។

ការរំលោភបំពានរបស់យោធាថៃបានបង្កឱ្យមានការបំផ្លិចបំផ្លាញយ៉ាងធ្ងន់ធ្ងរដល់ផ្ទះសម្បែង និងភូមិឋានរបស់ពលរដ្ឋស្លូតត្រង់ ដោយប្រើប្រាស់កាំភ្លើងធំ និងគ្រាប់បែកទម្លាក់ពីលើយន្តហោះ។

ថ្ងៃទី២៤ ខែកក្កដា មិនមែនគ្រាន់តែជាកាលបរិច្ឆេទមួយនៅក្នុងប្រវត្តិសាស្ត្រឡើយ ប៉ុន្តែជាថ្ងៃដែលប្រជាជនកម្ពុជាត្រូវចងចាំនូវតម្លៃនៃសន្តិភាព អធិបតេយ្យភាព និងបូរណភាពទឹកដី។ កម្ពុជាចងចាំការឈឺចាប់នេះ មិនមែនដើម្បីបណ្តុះការស្អប់ខ្ពើមទេ ប៉ុន្តែដើម្បីទាមទារការពិត យុត្តិធម៌ ការទទួលខុសត្រូវ និងការធានាថា អំពើឈ្លានពាន និងវិនាសកម្មបែបនេះមិនត្រូវកើតឡើងម្តងទៀតឡើយ។

រាជរដ្ឋាភិបាលកម្ពុជា នៅតែបន្តប្រកាន់ជំហរទាមទារយុត្តិធម៌ និងបូរណភាពទឹកដីរបស់ខ្លួនតាមរយៈមធ្យោបាយការទូត និងច្បាប់អន្តរជាតិ ដើម្បីធានាបាននូវសន្តិសុខ និងស្ថិរភាពសម្រាប់ប្រជាពលរដ្ឋនៅតាមតំបន់ព្រំដែន៕