(កំពង់ធំ)៖ ក្រុមគ្រូពេទ្យស្ម័គ្រចិត្តមកពីខេត្តឃ្យុងសាងប៊ុកដូ នៃសាធារណរដ្ឋកូរ៉េ បានអញ្ជើញមកផ្តល់សេវាពិនិត្យ និងព្យាបាលជំងឺដោយឥតគិតថ្លៃជូនប្រជាពលរដ្ឋខេត្តកំពង់ធំ រយៈពេល២ថ្ងៃ ចាប់ពីថ្ងៃទី២៤ ដល់ថ្ងៃទី២៥ ខែកក្កដា ឆ្នាំ២០២៦ នៅមន្ទីរពេទ្យបង្អែកខេត្តកំពង់ធំ។

កម្មវិធីនេះរៀបចំឡើងក្រោម «កម្មវិធីអ្នកតំណាងរាស្ត្រដើម្បីសុខភាពប្រជាជន» តាមរយៈកិច្ចសហប្រតិបត្តិការរវាងខេត្តឃ្យុងសាងប៊ុកដូ និងក្រុមប្រឹក្សាវប្បធម៌អាស៊ី (ACC) ដោយមានការសម្របសម្រួលពី លោក សួស យ៉ារ៉ា ប្រធានគណៈកម្មការកិច្ចការបរទេស សហប្រតិបត្តិការអន្តរជាតិ និងព័ត៌មាន នៃរដ្ឋសភា និងជាតំណាងរាស្ត្រមណ្ឌលខេត្តកំពង់ធំ។

កម្មវិធីនេះអនុវត្តដោយសហការជាមួយរដ្ឋបាលខេត្តកំពង់ធំ មន្ទីរពេទ្យបង្អែកខេត្តកំពង់ធំ និងសមាគមប្រឹក្សាសុខភាពប្រជាជន។ ក្នុងអំឡុងពេលបេសកកម្ម ក្រុមគ្រូពេទ្យបានផ្តល់សេវាវេជ្ជសាស្ត្រ ជាច្រើនប្រភេទ ដូចជា ការពិនិត្យជំងឺទូទៅ ជំងឺមាត់ធ្មេញ រោគស្ត្រី ជំងឺកុមារ ចក្ខុរោគ ការថតឆ្លុះក្រពះ និងពោះវៀន ការចាក់ម្ជុលវិទ្យាសាស្ត្រ ការពិនិត្យឈាមដោយប្រើប្រាស់បរិក្ខារទំនើប និងការចែកឱសថ ដោយឥតគិតថ្លៃ និងបានបរិច្ចាគម៉ាស៊ីនត្រជាក់ចំនួន៣គ្រឿង និងសម្ភារៈបរិក្ខារប្រើប្រាស់ផ្នែកវេជ្ជសាស្ត្រមួយចំនួន ជូនមន្ទីរពេទ្យបង្អែកខេត្តកំពង់ធំ ដើម្បីចូលរួមលើកកម្ពស់បរិយាកាស និងគុណភាព នៃការផ្តល់សេវាថែទាំសុខភាពជូនអ្នកជំងឺ។

នៅថ្ងៃបើកកម្មវិធី មានប្រជាពលរដ្ឋប្រមាណ១,៤៥០នាក់ មកពីទូទាំងខេត្តកំពង់ធំ និងខេត្តជិតខាង បានមកទទួលសេវាពិនិត្យ និងព្យាបាលជំងឺដោយឥតគិតថ្លៃ ដែលឆ្លុះបញ្ចាំងពីការយកចិត្តទុកដាក់រួមគ្នា ក្នុងការលើកកម្ពស់សុខុមាលភាព និងការពង្រឹងសេវាសុខាភិបាលសម្រាប់សហគមន៍៕