(ភ្នំពេញ)៖ សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រីកម្ពុជា បាន​ណែ​នាំឱ្យក្រសួង ស្ថាប័នពាក់ព័ន្ធទាំងអស់សម្រួលនីតិវិធីនានាឱ្យបានលឿន​រហ័សសម្រាប់ការចុះបញ្ជីសហគ្រាសខ្នាតតូច និងមធ្យម។

ការណែនាំរបស់សម្តេចមហាបវរធិបតី ហ៊ុន ម៉ាណែត បានធ្វើឡើងក្នុងកិច្ច​ប្រជុំ​គណៈរដ្ឋមន្ត្រីនាព្រឹកថ្ងៃសុក្រ ទី២៤ ខែកក្កដា ឆ្នាំ២០២៦នេះ។

សម្តេចមហាបវរធិបតី បានលើកឡើងថា ការចុះបញ្ជីសហគ្រាសខ្នាតតូច និងមធ្យមនេះ មិនត្រូវ​ឱ្យសហគ្រិន​សុំ​ច្បាប់​ក្រសួង ស្ថាប័នច្រើនកន្លែង​ដូចពី​មុនឡើយ។ ក្រសួង ស្ថាប័នពាក់​ព័ន្ធ​ត្រូវ​ធ្វើការជាមួយគ្នា ដើម្បីសម្រួល​នីតិវិធី​ទាំងអស់ជូនអ្នកស្នើសុំចុះបញ្ជី ហើយត្រូវការពារផលប្រយោជន៍របស់ពួកគេ តាមរយៈការប្រយុទ្ធប្រឆាំង​ផលិត​ផល​ក្លែងក្លាយឱ្យមានប្រសិទ្ធភាព។

សម្តេចមហាបវរធិបតី បានបញ្ជាក់ថា សម្តេចនឹងតាមដានដោយផ្ទាល់​ ដើម្បី​ជំរុញឱ្យការងារនេះសម្រេចបានជោគជ័យ៕